ਨਿਊ ਯਾਰਕ, 18 ਫਰਵਰੀ (ਪੋਸਟ ਬਿਊਰੋ)- ਅਮਰੀਕਾ ਦੇ ਕੈਲੀਫੋਰਨੀਆ ਰਾਜ ਵਿੱਚ ਇੱਕ ਸਿੱਖ ਨੂੰ ਮੁਸਲਿਮ ਸਮਝ ਕੇ ਉਸ ਨਾਲ ਕੁੱਟਮਾਰ ਕਰਨ ਅਤੇ ਉਸ ਉੱਤੇ ਗਰਮ ਕੌਫੀ ਸੁੱਟਣ ਵਾਲੇ ਇੱਕ ਵਿਅਕਤੀ 'ਤੇ ਨਫਰਤੀ ਅਪਰਾਧ ਦਾ ਕੇਸ ਦਰਜ ਕੀਤਾ ਗਿਆ ਹੈ। ਸਥਾਨਕ ਮੀਡੀਆ ਅਨੁਸਾਰ ਹਮਲਾਵਰ ਦੀ ਪਛਾਣ ਜਨ ਕਰੇਨ ਵਜੋਂ ਹੋਈ ਹੈ ਜਿਸ ਦੀ ਪਛਾਣ ਜੌਨ ਕਰੇਨ ਵਜੋਂ ਹੋਈ ਹੈ ਜਿਸ ਨੇ ਮੈਰੀਸਵਿਲ ਵਿੱਚ ਸਿੱਖ 'ਤੇ ਹਮਲਾ ਕੀਤਾ ਤੇ ਫਰਾਰ ਹੋ ਗਿਆ।
ਮੈਰੀਵਿਲ ਪੁਲਸ ਨੇ ਇੱਕ ਬਿਆਨ ਜਾਰੀ ਕਰ ਕੇ ਕਿਹਾ ਕਿ ਉਕਤ ਸਿੱਖ ਕਲਰਕ ਨੇ ਅਧਿਕਾਰੀਆਂ ਨੂੰ ਦੱਸਿਆ ਕਿ ਕਰੇਨ ਨੇ ਉਸ ਤੋਂ ਇੱਕ ਕੱਪ ਕੌਫੀ ਬਣਵਾਈ ਅਤੇ ਫਿਰ ਪੈਸੇ ਦੇਣ ਤੋਂ ਬਿਨਾਂ ਜਾਣ ਲੱਗਾ। ਸੀ ਸੀ ਟੀ ਵੀ ਫੁਟੇਜ 'ਚ ਦੇਖਿਆ ਜਾ ਸਕਦਾ ਹੈ ਕਿ ਸਿੱਖ ਵੱਲੋਂ ਰੋਕੇ ਜਾਣ ਉੱਤੇ ਉਸ ਨੇ ਸਿੱਖ 'ਤੇ ਹਮਲਾ ਕਰ ਦਿੱਤਾ। ਪੁਲਸ ਦਾ ਕਹਿਣਾ ਹੈ ਕਿ ਗਰਮ ਕੌਫੀ ਪੈਣ ਨਾਲ ਪੀੜਤ ਦਾ ਚਿਹਰਾ ਕੁਝ ਸੜ ਗਿਆ ਹੈ।
ਅਧਿਕਾਰੀਆਂ ਨੇ ਦੱਸਿਆ ਕਿ ਅਗਲੀ ਦੁਪਹਿਰ ਕੁੱਟ-ਮਾਰ ਦੀ ਘਟਨਾ ਦੀ ਇੱਕ ਹੋਰ ਸੂਚਨਾ ਮਿਲੀ ਅਤੇ ਪਤਾ ਲੱਗਾ ਕਿ ਹਮਲਾਵਰ ਉਸੇ ਇਲਾਕੇ ਵਿੱਚ ਫਿਰਦਾ ਹੈ। ਸੂਚਨਾ ਮਿਲਦਿਆਂ ਸਾਰ ਪੁਲਸ ਨੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ। ਉਸ ਨੇ ਆਪਣਾ ਅਪਰਾਧ ਕਬੂਲ ਕਰ ਲਿਆ ਅਤੇ ਪੁਲਸ ਨੂੰ ਦੱਸਿਆ ਕਿ ਉਸ ਨੇ ਮੁਸਲਿਮ ਸਮਝ ਕੇ ਸਿੱਖ 'ਤੇ ਹਮਲਾ ਕੀਤਾ ਸੀ। ਪੁਲਸ ਨੇ ਉਸ ਉੱਤੇ ਕੁੱਟਮਾਰ, ਚੋਰੀ ਅਤੇ ਨਫਰਤੀ ਅਪਰਾਧ ਦੇ ਦੋਸ਼ ਲਾ ਕੇ ਉਸ ਨੂੰ ਯੂਬਾ ਕਾਊਂਟੀ ਜੇਲ੍ਹ ਭੇਜ ਦਿੱਤਾ ਹੈ। ਅਮਰੀਕੀ ਇਸਲਾਮਕ ਕੌਂਸਲ ਅਤੇ ਸਿੱਖ ਭਾਈਚਾਰੇ ਵੱਲੋਂ ਇਸ ਘਟਨਾ ਦੀ ਨਿੰਦਾ ਕੀਤੀ ਜਾ ਰਹੀ ਹੈ।