ਵਾਸ਼ਿੰਗਟਨ, 17 ਫਰਵਰੀ (ਪੋਸਟ ਬਿਊਰੋ)- ਪ੍ਰਮੁੱਖ ਅਮਰੀਕੀ ਆਈ ਟੀ ਕੰਪਨੀ ਕਾਗਨੀਜੈਂਟ ਯੂ ਐਸ ਸਕਿਓਰਿਟੀ ਐਂਡ ਐਕਸਚੇਂਜ ਕਮਿਸ਼ਨ (ਐਸ ਈ ਸੀ) ਨੂੰ ਰਿਸ਼ਵਤ ਦੇ ਦੋਸ਼ਾਂ ਦੇ ਨਿਪਟਾਰੇ ਲਈ 2.5 ਕਰੋੜ ਅਮਰੀਕੀ ਡਾਲਰ ਦਾ ਭੁਗਤਾਨ ਕਰੇਗੀ। ਨਿਆਂ ਵਿਭਾਗ ਨੇ ਕੰਪਨੀ ਦੇ ਦੋ ਸਾਬਕਾ ਉਚ ਅਧਿਕਾਰੀਆਂ ਖਿਲਾਫ ਅਪਰਾਧਿਕ ਕੇਸ ਦਰਜ ਕੀਤੇ ਹਨ। ਐਸ ਈ ਸੀ ਨੇ ਕਿਹਾ ਕਿ ਦੋ ਸਾਬਕਾ ਅਧਿਕਾਰੀਆਂ 'ਤੇ ਦੋਸ਼ ਹੈ ਕਿ ਉਨ੍ਹਾਂ ਨੇ ਇਕ ਭਾਰਤੀ ਸਰਕਾਰੀ ਅਧਿਕਾਰੀ ਨੂੰ ਕਰੋੜਾਂ ਡਾਲਰ ਦੀ ਰਿਸ਼ਵਤ ਦੇ ਭੁਗਤਾਨ ਵਿੱਚ ਸਹੂਲਤ ਪ੍ਰਦਾਨ ਕਰਨ ਵਿੱਚ ਭੂਮਿਕਾ ਨਿਭਾਈ।
ਇਸ ਸੰਬੰਧ ਵਿੱਚ ਐਸ ਈ ਸੀ ਨੇ ਕਿਹਾ ਕਿ ਕਾਗਨੀਜੈਂਟ ਇਨ੍ਹਾਂ ਦੋਸ਼ਾਂ ਦੇ ਨਿਪਟਾਰੇ ਲਈ 2.5 ਕਰੋੜ ਡਾਲਰ ਦਾ ਭੁਗਤਾਨ ਕਰੇਗੀ ਕਿ ਉਸ ਨੇ ਵਿਦੇਸ਼ੀ ਭਿ੍ਰਸ਼ਟ ਵਿਹਾਰ ਕਾਨੂੰਨ (ਐਫ ਸੀ ਪੀ ਏ) ਦੀ ਉਲੰਘਣਾ ਕੀਤੀ। ਸ਼ਿਕਾਇਤ ਵਿੱਚ ਦੋਸ਼ ਲਾਇਆ ਗਿਆ ਹੈ ਕਿ 2014 ਵਿੱਚ ਤਾਮਿਲ ਨਾਡੂ ਦੇ ਇਕ ਉਚ ਅਧਿਕਾਰੀ ਨੇ ਉਸ ਕੰਪਨੀ ਤੋਂ 20 ਲੱਖ ਡਾਲਰ ਰਿਸ਼ਵਤ ਮੰਗੀ, ਜੋ ਚੇਨਈ ਵਿੱਚ ਕਾਗਨੀਜੈਂਟ ਦੇ 27 ਲੱਖ ਵਰਗ ਫੁੱਟ ਕੰਪਲੈਕਸ ਦੀ ਉਸਾਰੀ ਲਈ ਜ਼ਿੰਮੇਵਾਰ ਸੀ। ਸ਼ਿਕਾਇਤ ਵਿੱਚ ਇਹ ਦੋਸ਼ ਲਾਇਆ ਗਿਆ ਹੈ ਕਿ ਕਾਗਨੀਜੈਂਟ ਦੇ ਪ੍ਰਧਾਨ ਗਾਰਡਨ ਕੋਬਰਨ ਅਤੇ ਮੁੱਖ ਕਾਨੂੰਨ ਅਧਿਕਾਰੀ ਸਟੀਵਨ ਈ ਸ਼ਵਾਟਰਜ ਨੇ ਠੇਕੇਦਾਰ ਨੂੰ ਰਿਸ਼ਵਤ ਦੇਣ ਲਈ ਅਧਿਕਾਰਤ ਕੀਤਾ। ਐਸ ਈ ਸੀ ਨੇ ਇਹ ਵੀ ਦੋਸ਼ ਲਾਇਆ ਕਿ ਕਾਗਨੀਜੈਂਟ ਨੇ ਇਸ ਦੇ ਨਾਲ ਹੀ ਨਿਰਮਾਣ ਕੰਪਨੀ ਨੂੰ ਦੋ ਹੋਰ ਮਾਮਲਿਆਂ 'ਚ ਰਿਸ਼ਵਤ ਦੇਣ ਲਈ ਅਧਿਕਾਰਤ ਕੀਤਾ ਜੋ ਕੁੱਲ ਮਿਲਾ ਕੇ 16 ਲੱਖ ਡਾਲਰ ਹੁੰਦਾ ਹੈ।