ਮਿਊਨਿਖ, 16 ਫਰਵਰੀ (ਪੋਸਟ ਬਿਊਰੋ)- ਗੈਰ ਸਰਕਾਰੀ ਸੰਗਠਨ ‘ਸੇਵ ਦਿ ਚਿਲਡਰਨ ਇੰਟਰਨੈਸ਼ਨਲ' ਨੇ ਕੱਲ੍ਹ ਕਿਹਾ ਕਿ ਯੁੱਧ ਅਤੇ ਉਸ ਦੇ ਪ੍ਰਭਾਵ ਕਾਰਨ ਹਰ ਸਾਲ ਘੱਟ ਤੋਂ ਘੱਟ ਇਕ ਲੱਖ ਬੱਚਿਆਂ ਦੀ ਮੌਤ ਹੋ ਜਾਂਦੀ ਹੈ। ਇਸ 'ਚ ਭੁੱਖ ਅਤੇ ਮਦਦ ਨਾ ਮਿਲਣ ਵਰਗੇ ਪ੍ਰਭਾਵ ਸ਼ਾਮਲ ਹਨ।
ਇਕ ਅਨੁਮਾਨ ਮੁਤਾਬਕ ਦਸ ਜੰਗ ਵਾਲੇ ਦੇਸ਼ਾਂ 'ਚ 2013 ਤੋਂ 2017 ਦਰਮਿਆਨ ਜੰਗ ਕਾਰਨ 550000 ਬੱਚੇ ਦਮ ਤੋੜ ਚੁੱਕੇ ਹਨ। ਉਨ੍ਹਾਂ ਦੀ ਮੌਤ ਜੰਗ ਅਤੇ ਉਸ ਦੇ ਪ੍ਰਭਾਵਾਂ ਨਾਲ ਹੋਈ ਹੈ, ਜਿਸ 'ਚ ਭੁੱਖ, ਹਸਪਤਾਲਾਂ ਅਤੇ ਬੁਨਿਆਦੀ ਢਾਂਚਿਆਂ ਨੂੰ ਹੋਇਆ ਨੁਕਸਾਨ, ਸਿਹਤ ਸਬੰਧੀ ਦੇਖਭਾਲ ਤੱਕ ਪਹੁੰਚ ਦੀ ਕਮੀ, ਸਵੱਛਤਾ ਅਤੇ ਮਦਦ ਨਾ ਮਿਲ ਸਕਣ ਵਰਗੇ ਕਾਰਨ ਸ਼ਾਮਲ ਹਨ।
ਸੰਗਠਨ ਦੀ ਮੁੱਖ ਕਾਰਜਕਾਰੀ ਅਧਿਕਾਰੀ ਥਾਰਨਿੰਗ ਸ਼ਿਮਿਡਟ ਨੇ ਇਕ ਬਿਆਨ 'ਚ ਕਿਹਾ ਕਿ ਹਰ ਪੰਜ 'ਚੋਂ ਲਗਭਗ ਇਕ ਬੱਚਾ ਸੰਕਟ ਪੀੜਤ ਇਲਾਕਿਆਂ 'ਚ ਰਹਿ ਰਿਹਾ ਹੈ। ਬੀਤੇ ਦੋ ਦਹਾਕੇ 'ਚ ਇਹ ਸਭ ਤੋਂ ਵੱਡੀ ਗਿਣਤੀ ਹੈ। ਸੇਵ ਦਿ ਚਿਲਡਰਨ ਨੇ ਕਿਹਾ ਕਿ ਉਸ ਨੇ ਓਸਲੋ ਸਥਿਤ ‘ਪੀਸ ਰਿਸਰਚ ਇੰਸਟੀਚਿਊਟ' ਨਾਲ ਅਧਿਐਨ 'ਚ ਦੇਖਿਆ ਕਿ 2017 'ਚ 42 ਕਰੋੜ ਬੱਚੇ ਸੰਕਟ ਪੀੜਤ ਇਲਾਕਿਆਂ 'ਚ ਰਹਿ ਰਹੇ ਸਨ।
ਇਸ ਦੁਨੀਆ ਭਰ ਦੇ ਬੱਚਿਆਂ ਦੀ ਗਿਣਤੀ ਦਾ 18 ਫੀਸਦੀ ਹਿੱਸਾ ਹੈ ਅਤੇ ਬੀਤੇ ਸਾਲ ਦੇ ਮੁਕਾਬਲੇ ਇਸ 'ਚ ਤਿੰਨ ਕਰੋੜ ਬੱਚਿਆਂ ਦਾ ਵਾਧਾ ਹੋਇਆ ਹੈ। ਅਫਗਾਨਿਸਤਾਨ, ਮੱਧ ਅਫਰੀਕੀ ਗਣਰਾਜ, ਕਾਂਗੋ, ਇਰਾਕ, ਮਾਲੀ, ਨਾਈਜੀਰੀਆ, ਸੋਮਾਲੀਆ, ਦੱਖਣੀ ਸੂਡਾਨ, ਸੀਰੀਆ ਅਤੇ ਯਮਨ ਸਭ ਤੋਂ ਸੰਕਟ ਪੀੜਤ ਦੇਸ਼ ਹਨ।