ਵਾਸ਼ਿੰਗਟਨ, 16 ਫਰਵਰੀ (ਪੋਸਟ ਬਿਊਰੋ)- ਅਮਰੀਕੀ ਸਪੇਸ ਏਜੰਸੀ ਨਾਸਾ ਨੇ 2028 ਵਿੱਚ ਪੁਲਾੜ ਯਾਤਰੀਆਂ ਨੂੰ ਚੰਦਰਮਾ ਉੱਤੇ ਭੇਜਣ ਦੀ ਯੋਜਨਾ ਜਾਰੀ ਕੀਤੀ ਹੈ। ਇਸ ਮਿਸ਼ਨ ਵਿੱਚ ਚਾਰ ਪੁਲਾੜ ਯਾਤਰੀ ਚੰਦਰਮਾ 'ਤੇ ਸੱਤ ਦਿਨ ਗੁਜ਼ਾਰਨ ਪਿੱਛੋਂ ਮੁੜਨਗੇ। ਏਜੰਸੀ ਦੇ ਮੁਖੀ ਜਿਮ ਬ੍ਰਾਈਡੇਂਸਟਾਈਨ ਨੇ ਕਿਹਾ ਕਿ 2028 ਤੋਂ ਪਹਿਲਾਂ 2024 ਤੇ 2026 'ਚ ਟਰਾਇਲ ਮਾਨਵ ਰਹਿਤ ਮਿਸ਼ਨ ਭੇਜੇ ਜਾਣਗੇ। ਬੀਤੇ ਦਿਨੀਂ ਉਨ੍ਹਾਂ ਪੂਰੇ ਮਿਸ਼ਨ ਦਾ ਪਲਾਨ ਲਾਂਚ ਕੀਤਾ।
ਬ੍ਰਾਈਡੇਂਸਟਾਈਨ ਨੇ ਕਿਹਾ, ‘ਇਸ ਵਾਰ ਅਸੀਂ ਉਥੇ ਆਪਣੇ ਦੇਸ਼ ਦਾ ਝੰਡਾ ਜਾਂ ਪੈਰਾਂ ਦੇ ਨਿਸ਼ਾਨ ਛੱਡਣ ਨਹੀਂ ਜਾ ਰਹੇ, ਅਸੀਂ ਉਥੇ ਰੁਕਣ ਜਾ ਰਹੇ ਹਾਂ।' ਇਸੇ ਕਾਰਨ ਨਵੇਂ ਮਿਸ਼ਨ ਦੀ ਯੋਜਨਾ ‘ਅਪੋਲੋ' ਤੋਂ ਵੱਖ ਬਣਾਈ ਗਈ ਹੈ। ਅਪੋਲੋ 11 ਮਿਸ਼ਨ ਤਹਿਤ ਹੀ 1969 'ਚ ਨੀਲ ਆਰਮਸਟ੍ਰਾਂਗ ਚੰਦਰਮਾ ਦੀ ਸਤਹਿ 'ਤੇ ਉਤਰਨ ਵਾਲੇ ਪਹਿਲੇ ਵਿਅਕਤੀ ਬਣੇ ਸਨ। ਉਸ ਮਿਸ਼ਨ ਦੇ ਕਰੀਬ 60 ਸਾਲ ਬਾਅਦ ਦੁਬਾਰਾ ਪੁਲਾੜ ਯਾਤਰੀਆਂ ਨੂੰ ਉਪਗ੍ਰਹਿ ਉਤੇ ਭੇਜਿਆ ਜਾਵੇਗਾ। ਇਸ ਨਵੇਂ ਮਿਸ਼ਨ ਲਈ ਜੰਤਰ ਤੇ ਪੁਲਾੜ ਜਹਾਜ਼ ਵਿਕਸਿਤ ਕਰਨ 'ਚ ਇਸ ਵਾਰ ਕਮਰਸ਼ੀਅਲ ਕੰਪਨੀਆਂ ਦੀ ਮਦਦ ਲਈ ਜਾ ਰਹੀ ਹੈ। ਨਾਸਾ ਨੇ ਕੰਪਨੀਆਂ ਨੂੰ ਚੰਦਰਮਾ 'ਤੇ ਉਤਰਨ ਲਈ ਜਹਾਜ਼, ਇਕ ਜਹਾਜ਼ ਤੋਂ ਦੂਜੇ 'ਚ ਜਾਣ ਲਈ ਵਾਹਨ ਤੇ ਈਂਧਣ ਭਰਨ ਵਾਲੀ ਪ੍ਰਣਾਲੀ ਵਿਕਸਿਤ ਕਰਨ ਦਾ ਪ੍ਰਸਤਾਵ ਦੇਣ ਨੂੰ ਕਿਹਾ ਹੈ। ਚੁਣੀਆਂ ਗਈਆਂ ਕੰਪਨੀਆਂ ਨੂੰ ਆਪਣੇ ਪ੍ਰਸਤਾਵ 'ਤੇ ਕੰਮ ਲਈ ਨਾਸਾ 90 ਲੱਖ ਡਾਲਰ ਦੇਵੇਗੀ। ਸਭ ਤੋਂ ਬਿਹਤਰੀਨ ਪ੍ਰਸਤਾਵ ਦੇਣ ਰਹੀਆਂ ਦੋ ਕੰਪਨੀਆਂ ਨੂੰ ਆਪਣੀ ਯੋਜਨਾ ਨੂੰ ਮੂਰਤ ਰੂਪ ਦੇਣ ਦਾ ਮੌਕਾ ਮਿਲੇਗਾ। ਉਨ੍ਹਾਂ ਵੱਲੋਂ ਬਣਾਏ ਗਏ ਜਹਾਜ਼ ਤੇ ਉਪਕਰਨ ਨੂੰ ਚੰਦਰਮਾ ਦੇ ਪੰਧ 'ਚ ਬਣਾਏ ਗਏ ਸਪੇਸ ਸਟੇਸ਼ਨ 'ਚ ਲਾਂਚ ਕੀਤਾ ਜਾਵੇਗਾ। ਨਾਸਾ ਆਪਣੇ ਕੌਮਾਂਤਰੀ ਸਹਿਯੋਗੀਆਂ ਨਾਲ 2020 ਤੱਕ ਚੰਦਰਮਾ ਦੇ ਪੰਧ 'ਚ ਲੂਨਰ ਆਰਬਿਟਲ ਪਲੇਟਫਾਰਮ ਵਿਕਸਿਤ ਕਰਨ ਦੀ ਦਿਸ਼ਾ 'ਚ ਕੰਮ ਕਰ ਰਹੀ ਹੈ।