ਗੁਰਦਾਸਪੁਰ, 15 ਫਰਵਰੀ, (ਪੋਸਟ ਬਿਊਰੋ)- ਪਠਾਨਕੋਟ ਏਅਰਬੇਸ ਉੱਤੇ 1 ਜਨਵਰੀ 2016 ਨੂੰ ਅੱਤਵਾਦੀ ਹਮਲੇ ਦੌਰਾਨ ਚਰਚਾ ਵਿੱਚ ਆਏ ਗੁਰਦਾਸਪੁਰ ਦੇ ਓਦੋਂ ਦੇ ਐੱਸ ਪੀ ਹੈੱਡਕੁਆਰਟਰ ਸਲਵਿੰਦਰ ਸਿੰਘ ਨੂੰ ਅੱਜ ਗੁਰਦਾਸਪੁਰ ਦੇ ਐਡੀਸ਼ਨਲ ਜ਼ਿਲਾ ਤੇ ਸੈਸ਼ਨ ਜੱਜ ਪ੍ਰੇਮ ਕੁਮਾਰ ਦੀ ਅਦਾਲਤ ਨੇ ਇਕ ਔਰਤ ਨਾਲ ਬਲਾਤਕਾਰ ਕਰਨ, ਰਿਸ਼ਵਤ ਲੈਣ ਤੇ ਅਹੁਦੇ ਦਾ ਦੁਰਵਰਤੋਂ ਦਾ ਦੋਸ਼ੀ ਮੰਨ ਕੇ ਜੇਲ ਭੇਜ ਦਿੱਤਾ ਹੈ। ਸਜ਼ਾ 21 ਫਰਵਰੀ ਨੂੰ ਸੁਣਾਈ ਜਾਵੇਗੀ।
ਅਸਲ ਵਿੱਚ ਸਾਲ 2015 ਵਿੱਚ ਜਦ ਸਲਵਿੰਦਰ ਸਿੰਘ ਗੁਰਦਾਸਪੁਰ ਵਿਚ ਐੱਸ ਪੀ ਹੈੱਡਕੁਆਰਟਰ ਤਾਇਨਾਤ ਸੀ ਤਾਂ ਇਕ ਪਰਿਵਾਰਿਕ ਝਗੜੇ ਦੀ ਜਾਂਚ ਉਨ੍ਹਾਂ ਨੂੰ ਸੌਂਪੀ ਗਈ ਸੀ, ਜਿਸ ਵਿਚ ਧਾਰੀਵਾਲ ਦੇ ਵਿਕਰਮ ਦੇ ਵਿਰੁੱਧ ਉਸ ਦੀ ਪਤਨੀ ਨੇ ਕੁਝ ਦੋਸ਼ ਲਾਏ ਸਨ। ਉਸ ਕੇਸ ਵਿਚ ਵਿਕਰਮ ਦਾ ਜੀਜਾ ਰਜਨੀਸ਼ ਕੁਮਾਰ ਵਾਸੀ ਗੁਰਦਾਸਪੁਰ ਵੀ ਦੋਸ਼ੀ ਬਣਾਇਆ ਸੀ। ਰਜਨੀਸ਼ ਕੁਮਾਰ ਜਦ ਜਾਂਚ ਲਈ ਸਲਵਿੰਦਰ ਸਿੰਘ ਦੇ ਕੋਲ ਪੇਸ਼ ਹੋਇਆ ਤਾਂ ਸਲਵਿੰਦਰ ਸਿੰਘ ਨੇ ਉਸ ਦੀ ਮਦਦ ਕਰਨ ਦੇ ਬਦਲੇ ਪਹਿਲਾਂ 50 ਹਜ਼ਾਰ ਰੁਪਏ ਰਿਸ਼ਵਤ ਲਈ ਅਤੇ ਫਿਰ ਰਜਨੀਸ਼ ਕੁਮਾਰ ਦੀ ਪਤਨੀ ਨੂੰ ਆਪਣੇ ਪਤੀ ਨੂੰ ਬਚਾਉਣ ਲਈ ਕਈ ਤਰ੍ਹਾਂ ਦੇ ਲਾਲਚ ਦੇ ਕੇ ਉਸ ਨਾਲ ਬਲਾਤਕਾਰ ਕੀਤਾ। ਰਜਨੀਸ਼ ਕੁਮਾਰ ਨੇ ਇਸ ਬਾਰੇ ਚੁੱਪ ਰਹਿਣ ਦੀ ਥਾਂ ਸਲਵਿੰਦਰ ਸਿੰਘ ਦੀ ਸਿ਼ਕਾਇਤ ਕਰ ਦਿੱਤੀ, ਜਿਸ ਦੀ ਜਾਂਚ ਆਈ ਪੀ ਐੱਸ ਅਧਿਕਾਰੀ ਗੁਲਨੀਨ ਸਿੰਘ ਨੇ ਕੀਤੀ ਤੇ ਉਸ ਜਾਂਚ ਰਿਪੋਰਟ ਦੇ ਆਧਾਰ ਉੱਤੇ ਸਲਵਿੰਦਰ ਸਿੰਘ ਦੇ ਵਿਰੁੱਧ ਥਾਣਾ ਸਿਟੀ ਗੁਰਦਾਸਪੁਰ ਵਿੱਚ ਵੱਖ-ਵੱਖ ਧਾਰਾਵਾਂ ਹੇਠ 3 ਅਗਸਤ 2016 ਨੂੰ ਕੇਸ ਦਰਜ ਹੋ ਗਿਆ।
ਇਸ ਦੌਰਾਨ ਪਠਾਨਕੋਟ ਏਅਰਬੇਸ ਉੱਤੇ ਹਮਲਾ ਹੋਣ ਨਾਲ ਉਸ ਵਿਚ ਸਲਵਿੰਦਰ ਸਿੰਘ ਦੀ ਭੂਮਿਕਾ ਸ਼ੱਕੀ ਹੋਣ ਕਾਰਨ ਉਹ ਚਰਚਾ ਵਿੱਚ ਆ ਗਿਆ ਅਤੇ ਕੁਝ ਮਹਿਲਾ (16) ਪੁਲਸ ਮੁਲਾਜ਼ਮਾਂ ਨੇ ਸਲਵਿੰਦਰ ਸਿੰਘ ਉੱਤੇ ਅਹੁਦੇ ਦੀ ਦੁਰਵਰਤੋਂ ਕਰ ਕੇ ਉਨ੍ਹਾਂ ਨੂੰ ਪ੍ਰੇਸ਼ਾਨ ਕਰਨ ਤੇ ਅਸ਼ਲੀਲ ਹਰਕਤਾਂ ਕਰਨ ਦੀ ਸ਼ਿਕਾਇਤ ਕੀਤੀ ਤਾਂ ਨੌਕਰੀ ਤੋਂ ਕੱਢ ਦਿੱਤਾ ਗਿਆ ਸੀ, ਜਿਸ ਦੇ ਕਾਫੀ ਸਮਾਂ ਪਿੱਛੋਂ ਉਸ ਨੇ ਅਦਾਲਤ ਨੂੰ ਆਤਮ ਸਮਰਪਣ ਕੀਤਾ ਸੀ। ਫਿਰ ਉਸ ਨੂੰ ਜ਼ਮਾਨਤ ਉੱਤੇ ਛੱਡ ਦਿੱਤਾ ਗਿਆ ਸੀ। ਸਲਵਿੰਦਰ ਸਿੰਘ ਨੂੰ ਸਰਕਾਰ ਨੇ ਨੌਕਰੀ ਤੋਂ ਡਿਸਮਿਸ ਕਰ ਰੱਖਿਆ ਹੈ।
ਐਡੀਸ਼ਨਲ ਜ਼ਿਲਾ ਤੇ ਸੈਸ਼ਨ ਜੱਜ ਪ੍ਰੇਮ ਕੁਮਾਰ ਦੀ ਅਦਾਲਤ ਵਿੱਚ ਚੱਲ ਰਹੇ ਕੇਸ ਦੇ ਸ਼ਿਕਾਇਤ ਕਰਤਾ ਰਜਨੀਸ਼ ਕੁਮਾਰ ਵੱਲੋਂ ਉਨ੍ਹਾਂ ਦੇ ਵਕੀਲ ਭੁਪਿੰਦਰ ਸਿੰਘ ਧਕਾਲਾ ਨੇ 13 ਗਵਾਹ ਅਦਾਲਤ ਵਿਚ ਪੇਸ਼ ਕੀਤੇ, ਜਦ ਕਿ ਸਲਵਿੰਦਰ ਸਿੰਘ ਵੱਲੋਂ 7 ਗਵਾਹ ਪੇਸ਼ ਹੋਏ। ਅੱਜ ਅਦਾਲਤ ਨੇ ਸਲਵਿੰਦਰ ਸਿੰਘ ਨੂੰ ਦੋਸ਼ੀ ਮੰਨ ਕੇ ਜੇਲ ਭੇਜ ਦਿੱਤਾ। ਅਗਲੀ ਪੇਸ਼ੀ 21 ਫਰਵਰੀ ਨੂੰ ਉਸ ਨੂੰ ਸਜ਼ਾ ਸੁਣਾਈ ਜਾਵੇਗੀ।