ਨਵੀਂ ਦਿੱਲੀ, 15 ਫਰਵਰੀ, (ਪੋਸਟ ਬਿਊਰੋ)- ਬੀਕਾਨੇਰ ਜ਼ਮੀਨ ਘੁਟਾਲੇ ਵਿਚ ਕਾਂਗਰਸ ਪ੍ਰਧਾਨ ਰਾਹੁਲ ਗਾਂਧੀ ਦੇ ਜੀਜਾ ਰਾਬਰਟ ਵਾਡਰਾ ਦੇ ਖ਼ਿਲਾਫ਼ ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ ਡੀ) ਨੇ ਕਾਰਵਾਈ ਦੌਰਾਨ ਉਸ ਦੀ ਸਕਾਈਲਾਈਟ ਹਾਸਪੀਟਲਟੀ ਕੰਪਨੀ ਦੀ 4.43 ਕਰੋੜ ਰੁਪਏ ਦੀ ਜਾਇਦਾਦ ਜ਼ਬਤ ਕੀਤੀ ਹੈ। ਈ ਡੀ ਨੇ ਰਾਬਰਟ ਵਾਡਰਾ ਦੀ ਕੰਪਨੀ ਸਕਾਈਲਾਈਟ ਹਾਸਪੂਟਲਟੀ ਦੀਆਂ ਦਿੱਲੀ ਵਿੱਚ ਜਾਇਦਾਦਾਂ ਨੂੰ ਵੀ ਅਟੈਚ ਕੀਤਾ ਹੈ।
ਕੇਂਦਰੀ ਜਾਂਚ ਏਜੰਸੀ ਈ ਡੀ ਦੇ ਇਕ ਅਧਿਕਾਰੀ ਨੇ ਅੱਜ ਦੱਸਿਆ ਕਿ ਰਾਬਰਟ ਵਾਡਰਾ ਦੀ ਕੰਪਨੀ ਐੱਮ ਐੱਸ ਸਕਾਈਲਾਈਟ ਹਾਸਪੀਟਲਟੀ (ਪ੍ਰਾ.) ਲਿਮਟਿਡ ਦਾ ਨਾਂ ਇਸ ਵੇਲੇ ਐੱਲ ਐੱਲ ਪੀ ਹੈ ਅਤੇ ਦਿੱਲੀ ਵਿਚ 268, ਸੁਖਦੇਵ ਵਿਹਾਰ ਵਿਚ ਇਹ ਅਚੱਲ ਜਾਇਦਾਦ ਰਾਬਰਟ ਵਾਡਰਾ ਦੀ ਇਸੇ ਕੰਪਨੀ ਦੇ ਨਾਂ ਹੈ। ਇਸ ਦੀ ਕੀਮਤ 4 ਕਰੋੜ 43 ਲੱਖ 36,550 ਰੁਪਏ ਹੈ। ਈ ਡੀ ਨੇ ਇਸ ਦੇ ਨਾਲ 18 ਲੱਖ 59,500 ਰੁਪਏ ਦੀਆਂ ਚੱਲ ਜਾਇਦਾਦਾਂ ਵੀ ਅਟੈਚ ਕੀਤੀਆਂ ਹਨ। ਪਾਕਿਸਤਾਨ ਨਾਲ ਲੱਗਦੀ ਸਰਹੱਦ ਉੱਤੇ ਹੋਏ ਬੀਕਾਨੇਰ ਜ਼ਮੀਨ ਘੁਟਾਲੇ ਤੋਂ ਵਾਡਰਾ ਦੀ ਕੰਪਨੀ ਨੂੰ ਕਰੋੜਾਂ ਰੁਪਏ ਦਾ ਲਾਭ ਹੋਇਆ ਸੀ। ਇਸ ਕਮਾਈ ਨੂੰ ਈ ਡੀ ਨੇ ਮਨੀ ਲਾਂਡਰਿੰਗ ਰੋਕੂ ਕਾਨੂੰਨ ਹੇਠ ਜ਼ਬਤ ਕੀਤਾ ਹੈ।
ਪਤਾ ਲੱਗਾ ਹੈ ਕਿ ਬੀਕਾਨੇਰ ਵਿਚ ਮਹਾਜਨ ਫਾਇਰਿੰਗ ਰੇਂਜ ਬਣਾਉਣ ਵੇਲੇ ਉਥੋਂ ਉਜੜੇ ਕਈ ਲੋਕਾਂ ਲਈ ਰੱਖੀ ਗਈ ਜ਼ਮੀਨ ਨੂੰ ਵਿਚੋਲਿਆਂ ਨੇ ਫਰਜ਼ੀ ਨਾਵਾਂ ਉੱਤੇ ਲੈ ਲਿਆ ਅਤੇ ਫਰਜ਼ੀ ਨਾਵਾਂ ਵਾਲੀ 1,375 ਵਿਘੇ ਜ਼ਮੀਨ ਨੂੰ ਬਾਅਦ ਵਿਚ ਵੱਖ-ਵੱਖ ਕੰਪਨੀਆਂ ਨੂੰ ਵੇਚ ਦਿੱਤਾ ਸੀ, ਜਿਨ੍ਹਾਂ ਵਿਚੋਂ ਰਾਬਰਟ ਵਾਡਰਾ ਦੀ ਸਕਾਈਲਾਈਟ ਹਾਸਪੀਟਲਟੀ ਨੇ 275 ਵਿਘੇ ਜ਼ਮੀਨ ਸਿਰਫ਼ 72 ਲੱਖ ਰੁਪਏ ਦੀ ਖ਼ਰੀਦੀ ਸੀ। ਜਾਂਚ ਵਿਚ ਪਤਾ ਲੱਗਾ ਕਿ ਉਥੋਂ ਕੱਢੇ ਗਏ ਲੋਕਾਂ ਦੀ ਜ਼ਮੀਨ ਨੂੰ ਫਰਜ਼ੀ ਨਾਵਾਂ ਉੱਤੇ ਅਲਾਟ ਕਰਾਉਣ ਵਿਚ ਵਾਡਰਾ ਦੀ ਕੰਪਨੀ ਦੇ ਅਧਿਕਾਰਤ ਪ੍ਰਤੀਨਿਧ ਮਹੇਸ਼ ਨਾਗਰ ਦੀ ਭੂਮਿਕਾ ਸੀ। ਬਾਅਦ ਵਿਚ ਇਸ ਜ਼ਮੀਨ ਨੂੰ 5.15 ਕਰੋੜ ਰੁਪਏ ਵਿਚ ਸਕਾਈਲਾਈਟ ਹਾਸਪੀਟਲਟੀ ਨੇ ਐਲੀਜਨੀ ਫਿਨਲੀਜ਼ ਨਾਂ ਦੀ ਕੰਪਨੀ ਨੂੰ ਵੇਚ ਦਿੱਤਾ ਅਤੇ ਸਕਾਈਲਾਈਟ ਨੂੰ 4.43 ਕਰੋੜ ਰੁਪਏ ਦਾ ਲਾਭ ਹੋ ਗਿਆ।
ਇਸ ਦੇ ਨਾਲ ਹੀ ਵਾਡਰਾ ਨਾਲ ਜੁੜੇ ਚਾਰ ਲੋਕਾਂ ਨੂੰ 18.59 ਕਰੋੜ ਰੁਪਏ ਦੀ ਆਮਦਨੀ ਹੋਈ ਸੀ। ਈ ਡੀ ਨੇ ਇਸ ਦੇ ਨਾਲ ਇਨ੍ਹਾਂ ਚਾਰਾਂ ਦੀ 18.59 ਕਰੋੜ ਰੁਪਏ ਦੀ ਚੱਲ ਜਾਇਦਾਦ ਨੂੰ ਵੀ ਜ਼ਬਤ ਕੀਤਾ ਹੈ, ਪਰ ਈ ਡੀ ਨੇ ਇਹ ਨਹੀਂ ਦੱਸਿਆ ਕਿ ਕਿਨ੍ਹਾਂ ਚਾਰ ਲੋਕਾਂ ਦੀ ਜਾਇਦਾਦ ਜ਼ਬਤ ਕੀਤੀ ਹੈ।