ਨਵੀਂ ਦਿੱਲੀ, 15 ਫਰਵਰੀ (ਪੋਸਟ ਬਿਊਰੋ)- ਭਾਰਤ ਦੇ ਲੋਕਾਂ ਨੂੰ ਦੇਸ਼ ਵਿੱਚ ਵਿਕਸਿਤ ਪਹਿਲੀ ਸੈਮੀ ਹਾਈ ਸਪੀਡ ਟ੍ਰੇਨ ‘ਵੰਦੇ ਭਾਰਤ ਐਕਸਪ੍ਰੈਸ` ਦਾ ਤੋਹਫ਼ਾ ਮਿਲ ਗਿਆ ਹੈ। ਅੱਜ ਸ਼ੁੱਕਰਵਾਰ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਦਿੱਲੀ ਰੇਲਵੇ ਸਟੇਸ਼ਨ ਤੋਂ ਹਰੀ ਝੰਡੀ ਵਿਖਾ ਕੇ ਇਸ ਟ੍ਰੇਨ ਨੂੰ ਰਵਾਨਾ ਕੀਤਾ। ਇਸ ਮੌਕੇ ਰੇਲ ਮੰਤਰੀ ਪਿਊੂਸ਼ ਗੋਇਲ ਤੋਂ ਬਿਨਾ ਰੇਲਵੇ ਬੋਰਡ ਦੇ ਮੈਂਬਰ ਤੇ ਅਧਿਕਾਰੀ ਵੀ ਮੌਜੂਦ ਸਨ।
ਅੱਜ ਇਸ ਗੱਡੀ ਨੂੰ ਝੰਡੀ ਵਿਖਾਏ ਜਾਣ ਤੋਂ ਪਹਿਲਾਂ ਪ੍ਰਧਾਨ ਮੰਤਰੀ ਨੇ ਇੱਥੇ ਦੋ ਮਿੰਟ ਮੌਨ ਰੱਖਦੇ ਹੋਏ ਪੁਲਵਾਮਾ ਹਮਲੇ ਵਿੱਚ ਮਾਰੇ ਗਏ ਜਵਾਨਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ। ਇਸ ਮੌਕੇ ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ ਕਿ ਅੱਤਵਾਦੀਆਂ ਨੇ ਇਹ ਹਮਲਾ ਕਰਕੇ ਬਹੁਤ ਵੱਡੀ ਗਲਤੀ ਕਰ ਲਈ ਹੈ। ਇਸ ਤੋਂ ਬਾਅਦ ਪ੍ਰਧਾਨ ਮੰਤਰੀ ਨੇ ਟ੍ਰੇਨ ਵਿੱਚ ਜਾ ਕੇ ਇਸ ਦਾ ਮੁਆਇਨਾ ਕੀਤਾ। ਅੱਜ ਦੀ ਇਸ ਗੱਡੀ ਵਿੱਚ ਵਾਰਾਣਸੀ ਤਕ ਦੀ ਉਦਘਾਟਨ ਯਾਤਰਾ ਵਿੱਚ ਆਮ ਯਾਤਰੀ ਸ਼ਾਮਲ ਨਹੀਂ ਹੋਏ। ਆਮ ਲੋਕਾਂ ਲਈ ‘ਵੰਦੇ ਭਾਰਤ ਐਕਸਪ੍ਰੈਸ’ (ਸ਼ੁਰੂ ਦਾ ਨਾਂ ‘ਟ੍ਰੇਨ-18’) ਵਾਲੀ ਬਾਕਾਇਦਾ ਆਵਾਜਾਈ 17 ਫਰਵਰੀ ਨੂੰ ਸ਼ੁਰੂ ਹੋਵੇਗੀ। ਇਸ ਗੱਡੀ ਲਈ ਨਵੀਂ ਦਿੱਲੀ-ਵਾਰਾਣਸੀ ਟਰੈਕ ਦੀ ਸਥਿਤੀ ਵੇਖ ਕੇ ਬਾਕਾਇਦਾ ਆਵਾਜਾਈ ਵਿੱਚ ਇਸ ਨੂੰ ਵੱਧ ਤੋਂ ਵੱਧ 160 ਕਿਲੋਮੀਟਰ ਉਤੇ ਚਲਾਇਆ ਜਾਵੇਗਾ। ਕਾਨਪੁਰ ਤੇ ਇਲਾਹਾਬਾਦ ਵਿੱਚ ਦੋ-ਦੋ ਮਿੰਟ ਦੇ ਠਹਿਰਾਅ ਨੂੰ ਸ਼ਾਮਲ ਕਰਨ ਉੱਤੇ ਇਸ ਦੀ ਔਸਤ ਰਫ਼ਤਾਰ 100 ਕਿਲੋਮੀਟਰ ਫੀ ਘੰਟਾ ਦੇ ਕਰੀਬ ਹੋਵੇਗੀ।
ਇਸ ਸਮੇਂ ਭਾਰਤ ਵਿੱਚ ਸਭ ਤੋਂ ਤੇਜ਼ ਚੱਲਣ ਵਾਲੀ ਟ੍ਰੇਨ ਗਤੀਮਾਨ ਐਕਸਪ੍ਰੈਸ ਵੱਧ ਤੋਂ ਵੱਧ 150 ਕਿਲੋਮੀਟਰ ਫ਼ੀ ਘੰਟਾ ਦੀ ਰਫ਼ਤਾਰ ਨਾਲ ਚੱਲਦੀ ਹੈ। ਰਾਜਧਾਨੀ ਅਤੇ ਸ਼ਤਾਬਦੀ ਟ੍ਰੇਨਾਂ ਨੂੰ 130 ਕਿਲੋਮੀਟਰ ਸਪੀਡ `ਤੇ ਚਲਾਇਆ ਜਾਂਦਾ ਹੈ। ਵੰਦੇ ਭਾਰਤ ਐਕਸਪ੍ਰੈਸ ਵਿੱਚ ਕੁੱਲ 1128 ਯਾਤਰੀ ਸਫ਼ਰ ਕਰ ਸਕਣਗੇ। ਸਾਰੀ ਆਟੋਮੈਟਿਕ ਹੋਣ ਕਾਰਨ ਇਹ ਮੈਟਰੋ ਵਰਗੀ ਦਿਸਦੀ ਹੈ ਤੇ ਇਸ ਦੇ ਦਰਵਾਜ਼ੇ ਮੈਟਰੋ ਵਾਂਗ ਆਟੋਮੈਟਿਕ ਹਨ। ਟ੍ਰੇਨ ਦੀਆਂ ਸਹੂਲਤਾਂ ਵਿੱਚ ਜੀ ਪੀ ਐੱਸ ਵਾਲਾ ਆਡੀਓ ਵਿਜ਼ੂਅਲ ਪੈਸੈਂਜਰ ਇਨਫਾਰਮੇਸ਼ਨ ਸਿਸਟਮ, ਆਨਬੋਰਡ ਹੌਟਸਪੋਟ ਵਾਈ-ਫਾਈ, ਬਾਇਓ ਵੈਕਿਊਮ ਟਾਇਲਟ, ਡਿਊਲ ਮੋਡ ਲਾਈਟਿੰਗ ਅਤੇ ਸਭ ਸੀਟਾਂ `ਚ ਮੋਬਾਈਲ ਚਾਰਜਿੰਗ ਸਾਕੇਟ ਵੀ ਹਨ।