ਚੰਡੀਗੜ੍ਹ, 15 ਫਰਵਰੀ (ਪੋਸਟ ਬਿਊਰੋ)- ਨਵਾਂ ਸ਼ਹਿਰ ਕੋਰਟ ਵੱਲੋਂ ਬੱਬਰ ਖਾਲਸਾ ਦੇ ਸਮਰਥਕਾਂ ਨੂੰ ਸੁਣਾਈ ਉਮਰ ਕੈਦ ਦੀ ਸਜ਼ਾ ਦੇ ਖਿਲਾਫ ਉਨ੍ਹਾਂ ਨੇ ਹਾਈ ਕੋਰਟ ਵਿੱਚ ਅਪੀਲ ਦਾਇਰ ਕਰਕੇ ਕਿਹਾ ਹੈ ਕਿ ਉਨ੍ਹਾਂ ਤੋਂ ਕੁਝ ਇਹੋ ਜਿਹੀ ਸਮੱਗਰੀ ਨਹੀਂ ਮਿਲੀ ਜਿਸ ਨਾਲ ਦੇਸ਼ ਨੂੰ ਕਿਸੇ ਪ੍ਰਕਾਰ ਦਾ ਖਤਰਾ ਹੁੰਦਾ ਹੋਵੇ।
ਪਤਾ ਲੱਗਾ ਹੈ ਕਿ ਇਸ ਅਪੀਲ ਵਿੱਚ ਕਿਹਾ ਗਿਆ ਹੈ ਕਿ ਸ਼ਾਂਤਮਈ ਤਰੀਕੇ ਨਾਲ ਵੱਖਰੇ ਦੇਸ਼ ਦੀ ਮੰਗ ਕਰਨਾ ਗੈਰ ਕਾਨੂੰਨੀ ਨਹੀਂ ਹੈ। ਅਪੀਲ ਕਰਤਾ ਦੇ ਵਕੀਲ ਆਰ ਐਸ ਬੈਂਸ ਨੇ ਦੱਸਿਆ ਕਿ ਜਦ ਜਾਂਚ ਸ਼ੁਰੂ ਹੋਈ ਸੀ, ਤਦ ਇਨ੍ਹਾਂ 'ਚੋਂ ਕੁਝ ਪੋਸਟਰ ਵੀ ਮਿਲੇ, ਜਿਸ ਵਿੱਚ ਖਾਲਿਸਤਾਨ ਨਾਲ ਸੰਬੰਧਤ ਕੁਝ ਨਹੀਂ ਲਿਖਿਆ ਸੀ। ਸਿਰਫ ਇਕ ਜਗ੍ਹਾ ਸ਼ਬਦ ਸੀ ਖਾਲਿਸਤਾਨ ਅਤੇ ਦੱਸਿਆ ਗਿਆ ਕਿ ਸਿੱਖ ਧਰਮ ਦੀ ਪ੍ਰਚਾਰ ਸਮੱਗਰੀ ਮਿਲੀ, ਜੋ ਹਰ ਇਕ ਸਿੱਖ ਦੇ ਕੋਲ ਹੁੰਦੀ ਹੈ। ਵਰਨਣ ਯੋਗ ਕਿ ਇਸ ਕੇਸ ਵਿੱਚ ਦੋਵਾਂ ਪੱਖਾਂ ਦੀਆਂ ਦਲੀਲਾਂ ਸੁਣਨ ਪਿੱਛੋਂ ਨਵਾਂ ਸ਼ਹਿਰ ਸੈਸ਼ਨ ਕੋਰਟ ਵਿੱਚ ਅਰਵਿੰਦਰ, ਸੁਰਜੀਤ ਅਤੇ ਰਣਜੀਤ ਨੂੰ ਦੋਸ਼ੀ ਮੰਨਦੇ ਹੋਏ ਆਈ ਪੀ ਸੀ ਦੀ ਧਾਰਾ 121 ਹੇਠ ਉਮਰ ਕੈਦ ਅਤੇ ਇਕ ਲੱਖ ਰੁਪਿਆ ਜੁਰਮਾਨਾ ਅਤੇ ਆਈ ਪੀ ਸੀ ਦੀ ਧਾਰਾ 121 ਏ ਅਧੀਨ 10 ਸਾਲ ਕੈਦ ਤੇ 25 ਹਜ਼ਾਰ ਰੁਪਏ ਜੁਰਮਾਨੇ ਦੀ ਸਜ਼ਾ ਹੋਈ ਸੀ। ਉਨ੍ਹਾਂ ਕੋਲੋਂ ਮਿਲਿਆ ਖਾਲਿਸਤਾਨ ਸਮਰਥਕ ਲਿਟ੍ਰੇਚਰ, ਕਿਤਾਬਾਂ ਤੇ ਸੋਸ਼ਲ ਮੀਡੀਆ 'ਤੇ ਕੀਤੀਆਂ ਗੱਲਾਂ ਪੁਲਸ ਲਈ ਕੇਸ ਮਜ਼ਬੂਤ ਕਰਨ ਦਾ ਆਧਾਰ ਬਣੀਆਂ। ਕੋਰਟ ਨੇ 64 ਪੇਜਾਂ ਦੇ ਫੈਸਲੇ ਵਿੱਚ ਸਾਰੀਆਂ ਗੱਲਾਂ 'ਤੇ ਵਿਸਥਾਰ ਨਾਲ ਚਰਚਾ ਕੀਤੀ ਹੈ। ਇਸ ਕੇਸ ਵਿੱਚ ਸਰਕਾਰੀ ਪੱਖ ਨੇ ਪੁਲਸ ਦੇ ਕਈ ਅਫਸਰਾਂ ਸਣੇ ਕਰੀਬ 20 ਲੋਕਾਂ ਦੀਆਂ ਗਵਾਹੀਆਂ ਕਰਵਾਈਆਂ। ਪੁਲਸ ਵੱਲੋਂ ਲਾਈਆਂ ਅਨ ਲਾੱਅ ਫੁਲ ਐਕਟੀਵਿਟੀ ਦੀਆਂ ਧਾਰਾਵਾਂ ਹੇਠ ਉਨ੍ਹਾਂ ਦੋਸ਼ੀ ਨਹੀਂ ਸੀ ਮੰਨਿਆ ਗਿਆ, ਪਰ ਦੋਸ਼ੀਆਂ ਤੋਂ ਮਿਲੇ ਲਿਟ੍ਰੇਚਰ 'ਤੇ ਭਾਰਤ ਸਰਕਾਰ ਦੇ ਖਿਲਾਫ ਯੁੱਧ ਦੀ ਸਾਜ਼ਿਸ਼ ਕਰਨ ਦਾ ਦੋਸ਼ੀ ਮੰਨਿਆ ਗਿਆ ਸੀ। ਅਰਵਿੰਦਰ 'ਤੇ ਦੋਸ਼ ਸੀ ਕਿ ਉਹ ਵਿਦੇਸ਼ਾਂ ਵਿੱਚ ਬੈਠੇ ਖਾੜਕੂਆਂ ਦੇ ਇਸ਼ਾਰੇ 'ਤੇ ਬੱਬਰ ਖਾਲਸਾ ਲਈ ਸੋਸ਼ਲ ਮੀਡੀਆ 'ਤੇ ਨੌਜਵਾਨਾਂ ਨੂੰ ਸਰਕਾਰ ਦੇ ਖਿਲਾਫ ਉਕਸਾ ਰਿਹਾ ਸੀ। ਇਸ ਦੇ ਬਾਅਦ ਉਹ ਉਨ੍ਹਾਂ ਨੂੰ ਸੰਗਠਨ ਵਿੱਚ ਭਰਤੀ ਕਰਨ ਦਾ ਕੰਮ ਕਰ ਰਿਹਾ ਸੀ। ਅਰਵਿੰਦਰ ਜਦ ਦੋਹਾ-ਕਤਰ ਵਿੱਚ ਸੀ, ਤਦ ਉਹ ਉਥੇ ਬੱਬਰ ਖਾਲਸਾ ਦੇ ਸੰਪਰਕ ਵਿੱਚ ਆ ਗਿਆ ਸੀ। ਇਸ ਦੇ ਬਾਅਦ ਪੁਲਸ ਨੇ ਮਾਮਲੇ ਵਿੱਚ ਪੁੱਛਗਿੱਛ ਸ਼ੁਰੂ ਕੀਤੀ ਤਾਂ ਪਤਾ ਲੱਗਾ ਕਿ ਗੁਰਦਾਸਪੁਰ ਦੇ ਪਿੰਡ ਬਹਾਦਰ ਸਿੰਘ ਦਾ ਸੁਰਜੀਤ ਸਿੰਘ ਅਤੇ ਕੈਥਲ (ਹਰਿਆਣਾ) ਦੇ ਪਿੰਡ ਨੋਚ ਦਾ ਰਣਜੀਤ ਸਿੰਘ ਅਰਵਿੰਦਰ ਦੇ ਸੰਪਰਕ ਵਿੱਚ ਸਨ। ਇਹ ਤਿੰਨਾਂ ਨਾਲ ਮਿਲ ਕੇ ਕੰਮ ਕਰਦੇ ਸਨ।