ਅਨੁਰਾਗ ਬਸੁ ਦੀ ਅਗਲੀ ਫਿਲਮ ਵਿੱਚ ਫਾਤਿਮਾ ਸਨਾ ਸ਼ੇਖ ਮੰਝੇ ਹੋਏ ਅਭਿਨੇਤਾ ਰਾਜ ਕੁਮਾਰ ਰਾਓ ਨਾਲ ਨਜ਼ਰ ਆਏਗੀ। ਦੋਵੇਂ ਇਸ ਦੀ ਭੋਪਾਲ ਵਿੱਚ ਸ਼ੂਟਿੰਗ ਕਰ ਰਹੇ ਹਨ। ਪਿੱਛੇ ਜਿਹੇ ਟਵਿੱਟਰ 'ਤੇ ਇਸ ਦੀ ਫਸਟ ਲੁਕ ਵੀ ਸ਼ੇਅਰ ਕੀਤੀ ਗਈ ਸੀ। ਭਾਵੇਂ ਇਸ ਫਿਲਮ ਦੇ ਟਾਈਟਲ ਦਾ ਅਜੇ ਐਲਾਨ ਨਹੀਂ ਹੋਇਆ, ਪਰ ਮੰਨਿਆ ਜਾ ਰਿਹਾ ਹੈ ਕਿ ਇਹ ਫਿਲਮ ‘ਲਾਈਫ ਇਨ ਏ ਮੈਟਰੋ’ ਦਾ ਸੀਕਵਲ ਹੈ। ਫਿਲਮ ਦੀ ਸ਼ੂਟਿੰਗ ਸ਼ੁਰੂ ਹੋ ਚੁੱਕੀ ਹੈ। ਇਸ ਦੀ ਫਸਟ ਲੁਕ ਫੋਟੋ 'ਚ ਮਿਥੁਨ ਚੱਕਰਵਰਤੀ ਦੇ ਆਈਕਾਨਿਕ ਡਾਂਸ ਸਟੈਂਪ ਨੂੰ ਰੀ-ਕ੍ਰਿਏਟ ਕਰਦਾ ਹੋਇਆ ਰਾਜ ਕੁਮਾਰ ਦਿਸ ਰਿਹਾ ਹੈ, ਜਿਸ ਨਾਲ ਫਾਤਿਮਾ ਖੜ੍ਹੀ ਹੈ। ਦੋਵੇਂ 1980-90 ਦੀਆਂ ਫਿਲਮਾਂ ਦੀ ਲੁਕ 'ਚ ਨਜ਼ਰ ਆਉਣਗੇ। ਉਨ੍ਹਾਂ ਦੀ ਬੈਕ ਲੁਕ ਦਿੱਸਦੀ ਹੈ। ਫਾਤਿਮਾ ਮੈਰੂਨ ਕਲਰ ਦੀ ਸਾੜ੍ਹੀ 'ਚ ਤੇ ਰਾਜ ਕੁਮਾਰ ਹਰੇ ਰੰਗ ਦੀ ਕਮੀਜ਼ ਤੇ ਨੀਲੀ ਪੈਂਟ 'ਚ।
ਫਾਤਿਮਾ ਦੇ ਇੱਕ ਨੇੜਲੇ ਸੂਤਰ ਅਨੁਸਾਰ ਉਹ ਇਸ ਫਿਲਮ ਬਾਰੇ ਬਹੁਤ ਉਤਸ਼ਾਹਤ ਹੈ ਅਤੇ ਸ਼ੂਟਿੰਗ ਦਾ ਪੂਰਾ ਆਨੰਦ ਲੈ ਰਹੀ ਹੈ। ਭੋਪਾਲ ਵਿੱਚ ਫਿਲਮ ਦੇ ਆਪਣੇ ਸ਼ੁਰੂਆਤੀ ਸੀਨਜ਼ ਦੀ ਉਸ ਨੇ ਸ਼ੂਟਿੰਗ ਕਰਨੀ ਹੈ। ਇਸ ਤੋਂ ਬਾਅਦ ਅਗਲੇ ਸ਼ਡਿਊਲ 'ਚ ਉਹ ਫਿਲਮ ਲਈ ਬਾਕੀ ਸ਼ੂਟਿੰਗ ਕਰੇਗੀ। ਫਿਲਮ 'ਚ ਅਭਿਸ਼ੇਕ ਬੱਚਨ, ਆਦਿੱਤਯ ਰਾਏ ਕਪੂਰ ਤੇ ਪੰਕਜ ਤਿ੍ਰਪਾਠੀ ਵੀ ਅਹਿਮ ਰੋਲਜ਼ ਵਿੱਚ ਦਿਸਣਗੇ। ਪਿਛਲੇ ਸਾਲ ਨਵੰਬਰ ਵਿੱਚ ਅਨੁਰਾਗ ਬਸੁ ਤੇ ਅਭਿਸ਼ੇਕ ਬੱਚਨ ਨੇ ਕੋਲਕਾਤਾ 'ਚ ਇਸ ਫਿਲਮ ਦੇ ਕਈ ਸੀਨਜ਼ ਦੀ ਸ਼ੂਟਿੰਗ ਕੀਤੀ ਸੀ।