ਭਾਰਤ 'ਚ ਦੁਨੀਆ ਦੀਆਂ ਸਭ ਤੋਂ ਵੱਧ ਫਿਲਮਾਂ ਬਣਦੀਆਂ ਹਨ। ਇਸ ਹਾਲਤ ਵਿੱਚ ਬਾਕਸ ਆਫਿਸ 'ਤੇ ਫਿਲਮਾਂ ਦੀ ਟੱਕਰ ਹੋਣਾ ਇੱਕ ਆਮ ਗੱਲ ਹੈ, ਪਰ ਖਬਰ ਉਦੋਂ ਬਣਦੀ ਹੈ, ਜਦੋਂ ਦੋ ਵੱਡੇ ਸਿਤਾਰਿਆਂ ਦੀਆਂ ਫਿਲਮਾਂ ਆਹਮੋ-ਸਾਹਮਣੇ ਹੋ ਜਾਂਦੀਆਂ ਹਨ। ਇਸ ਸਾਲ ਵੀ ਵੱਡੀ ਟੱਕਰ ਹੋਣ ਜਾ ਰਹੀ ਹੈ, ਜਿਸ ਵਿੱਚ ਸਭ ਤੋਂ ਵੱਧ ਚਰਚਾ ਹੈ ਰਣਬੀਰ ਕਪੂਰ ਤੇ ਸਲਮਾਨ ਖਾਨ ਦੀ। ਰਣਬੀਰ ਕਪੂਰ ਇਸ ਸਮੇਂ ਫਿਲਮ ‘ਬ੍ਰਹਮਾਸਤਰ' ਦੀ ਸ਼ੂਟਿੰਗ ਕਰ ਰਿਹਾ ਹੈ, ਜਿਸ ਵਿੱਚ ਆਲੀਆ ਭੱਟ, ਅਮਿਤਾਭ ਬੱਚਨ ਤੇ ਮੋਨੀ ਰਾਏ ਵਰਗੇ ਸਿਤਾਰੇ ਹਨ ਤਾਂ ਸਲਮਾਨ ਦੀ ਫਿਲਮ ‘ਭਾਰਤ’ ਤੇ ‘ਦਬੰਗ 3’ ਵਿੱਚੋਂ ਕਿਸੇ ਨਾਲ ਇਨ੍ਹਾਂ ਦੇ ਟਕਰਾਉਣ ਦੀਆਂ ਅਟਕਲਾਂ ਲੱਗਦੀਆਂ ਰਹਿੰਦੀਆਂ ਹਨ।
ਉਂਝ ਰਣਬੀਰ ਨੂੰ ਆਪਣੀ ਫਿਲਮ ‘ਬ੍ਰਹਮਾਸਤਰ’ ਉੱਤੇ ਭਰੋਸਾ ਹੈ। ਫਿਲਮ ‘ਵੇਕਅਪ ਸਿਡ’ ਨਾਲ ਰਣਬੀਰ ਨੇ ਸਾਬਿਤ ਕੀਤਾ ਕਿ ਉਹ ਕਿੰਨਾ ਚੰਗਾ ਐਕਟਰ ਹੈ। ਉਥੇ ਉਸ ਦੀ ‘ਯੇ ਜਵਾਨੀ ਹੈ ਦੀਵਾਨੀ’ ਨੇ ਬਾਕਸ ਆਫਿਸ 'ਤੇ ਧਮਾਲ ਮਚਾਇਆ ਸੀ। ‘ਬ੍ਰਹਮਾਸਤਰ’ ਲਈ ਆਯਾਨ ਨੇ ਖਾਸ ਸਮਾਂ ਲਿਆ ਹੈ। ਪਿਛਲੇ ਛੇ ਸਾਲਾਂ ਤੋਂ ਉਸ ਦੀ ਕੋਈ ਫਿਲਮ ਪ੍ਰਦਰਸ਼ਿਤ ਨਹੀਂ ਹੋਈ। ਇਹ ਇੱਕ ਸੁਪਰਹੀਰੋ ਫਿਲਮ ਹੈ, ਜਿਸ ਦਾ ਬਜਟ 259 ਕਰੋੜ ਰੁਪਏ ਤੋਂ ਉਪਰ ਹੈ। ਇਸ ਨੂੰ ਸੰਭਾਵਿਤ ਦੋ ਹਿੱਸਿਆਂ ਵਿੱਚ ਬਣਾਇਆ ਜਾਏਗਾ। ਰਣਬੀਰ ਤੇ ਆਯਾਨ ਦੇ ਕਰੀਅਰ ਦੀ ਇਹ ਸਭ ਤੋਂ ਮਹਿੰਗੀ ਫਿਲਮ ਹੈ। ਫਿਲਮ ਨਿਰਮਾਤਾ ਕਰਣ ਜੌਹਰ ਨੇ ਇਸ ਤੋਂ ਮਹਿੰਗੀ ਫਿਲਮ ਪਹਿਲਾਂ ਕਦੇ ਨਹੀਂ ਬਣਾਈ। ਇਸ ਫਿਲਮ ਦਾ ਪੋਸਟ ਪ੍ਰੋਡਕਸ਼ਨ ਦਾ ਕੰਮ ਲੰਬਾ ਚੱਲੇਗਾ ਅਤੇ ਇਸ ਲਈ ਇਸ ਨੂੰ ਜਲਦੀ ਰਿਲੀਜ਼ ਕਰਨ ਦਾ ਪਲਾਨ ਬਣਾਇਆ ਗਿਆ ਹੈ।