ਦੇਹਰਾਦੂਨ, 14 ਫਰਵਰੀ (ਪੋਸਟ ਬਿਊਰੋ)- ਉੱਤਰਾ ਖੰਡ ਦੀ ਰਾਜਧਾਨੀ ਦੇਹਰਾਦੂਨ ਦਾ ਪ੍ਰੇਮ ਨਗਰ ਥਾਣਾ ਦੇਖਣ ਨੂੰ ਤਾਂ ਬਾਕੀ ਥਾਣਿਆਂ ਵਾਂਗ ਲਗਦਾ ਹੈ, ਪਰ ਫਿਰ ਵੀ ਇਹ ਸਭ ਤੋਂ ਖ਼ਾਸ ਹੈ। ਇਸ ਦੀ ਖ਼ਾਸ ਗੱਲ ਇਹ ਹੈ ਕਿ ਸਵੇਰੇ 9.30 ਵਜੇ ਤੋਂ 3.30 ਵਜੇ ਤੱਕ ਇਹ ਥਾਣਾ ਸਕੂਲ ਵਿਚ ਬਦਲ ਜਾਂਦਾ ਹੈ।
ਅਸਲ ਵਿੱਚ ਪ੍ਰੇਮ ਨਗਰ ਦੇ ਕੋਲ ਨੰਦਾ ਚੌਂਕ ਝੌਪੜਪੱਟੀ ਦੇ ਬਹੁਤ ਸਾਰੇ ਗਰੀਬ ਬੱਚੇ ਇਥੇ ਪੜ੍ਹਨ ਆਉਂਦੇ ਹਨ। ਇਹ ਸਾਰੇ ਬੱਚੇ 4 ਤੋਂ 12 ਸਾਲ ਦੀ ਉਮਰ ਦੇ ਹਨ। ਇਹਨਾਂ ਦੀ ਪ੍ਰਾਇਮਰੀ ਜਾਂ ਰਸਮੀ ਸਿੱਖਿਆ ਦਾ ਕੋਈ ਪ੍ਰਬੰਧ ਨਹੀਂ ਸੀ। ਦੇਹਰਾਦੂਨ ਦੀ ਇਕ ਸਮਾਜ-ਸੇਵੀ ਸੰਸਥਾ ‘ਆਸਰਾ ਟਰੱਸਟ’ ਵੱਲੋਂ ਇਨ੍ਹਾਂ ਬੱਚਿਆਂ ਨੂੰ ਥਾਣੇ ਦੇ ਸਾਹਮਣੇ ਫੁੱਟਪਾਥ ਉੱਤੇ ਪੜ੍ਹਾਇਆ ਜਾਂਦਾ ਸੀ। ਇਸ ਬਾਰੇ ਥਾਣਾ ਮੁਖੀ ਮੁਕੇਸ਼ ਤਿਆਗੀ ਨੂੰ ਚਿੰਤਾ ਸੀ, ਕਿਉਕਿ ਬੱਚੇ ਟ੍ਰੈਫਿਕ ਦੇ ਬੜਾ ਨੇੜੇ ਬੈਠਦੇ ਸਨ। ਇਸ ਤੋਂ ਬਾਅਦ ਇਹਨਾਂ ਬੱਚਿਆਂ ਨੂੰ ਤਿਆਗੀ ਦੀ ਨਿਗਰਾਨੀ ਵਿਚ ਥਾਣੇ ਵਿਚ ਪੜ੍ਹਾਇਆ ਜਾਣ ਲੱਗਾ ਹੈ। ਇਹਨਾਂ ਬੱਚਿਆਂ ਨੂੰ ਹਿੰਦੀ, ਅੰਗਰੇਜੀ, ਮੈਥ ਦੇ ਨਾਲ ਇਤਿਹਾਸ ਤੇ ਸਾਇੰਸ ਦੇ ਵਿਸ਼ੇ ਵੀ ਪੜ੍ਹਾਏ ਜਾਂਦੇ ਹਨ। ਪੁਲਿਸ ਦਾ ਸਮਰਥਨ ਤੇ ਸੁਰੱਖਿਆ ਹੋਣ ਕਾਰਨ ਬਹੁਤ ਸਾਰੇ ਮਾਂ-ਬਾਪ ਅਪਣੇ ਬੱਚੇ ਇਥੇ ਭੇਜਣ ਲੱਗੇ ਹਨ। ਲਗਭਗ 51 ਬੱਚੇ ਇਥੇ ਆਉਂਦੇ ਹਨ, ਜਿਨ੍ਹਾਂ ਲਈ ਸਿਰਫ ਇਹ ਥਾਣਾ ਹੀ ਨਹੀਂ, ਬਹੁਤ ਸਾਰੇ ਹੋਰ ਲੋਕ ਵੀ ਮਦਦਗਾਰ ਸਾਬਤ ਹੋਣ ਲੱਗੇ ਹਨ। ਕਿਸੇ ਨੇ ਬੱਚਿਆਂ ਨੂੰ ਲਿਜਾਣ ਲਈ 5000 ਰੁਪਏ ਦੇ ਕਿਰਾਏ ਉੱਤੇ ਵੈਨ ਲਵਾਈ ਹੈ ਅਤੇ ਕਿਸੇ ਨੇ ਬੱਚਿਆਂ ਨੂੰ ਸਕੂਲ ਬੈਗ ਦਿਤੇ ਹਨ। ਇਕ ਵਿਅਕਤੀ ਦੀ ਮਦਦ ਨਾਲ ਰੋਜ ਬੱਚਿਆਂ ਨੂੰ ਕੁਝ ਨਾ ਕੁਝ ਖਾਣ ਲਈ ਦਿਤਾ ਜਾਂਦਾ ਹੈ। ਇਹੀ ਨਹੀਂ, ਥਾਣੇ ਦਾ ਸਟਾਫ ਖ਼ਾਸਕਰ ਮਹਿਲਾ ਪੁਲਿਸ ਮੁਲਾਜ਼ਮ ਖਾਲੀ ਸਮੇਂ ਵਿਚ ਬੱਚਿਆਂ ਨੂੰ ਪੜ੍ਹਾ ਦੇਂਦੀਆਂ ਹਨ। ਬੱਚਿਆਂ ਨੂੰ ਤਿੰਨ ਸੈਸ਼ਨ ਵਿਚ ਪੜ੍ਹਾਇਆ ਜਾਂਦਾ ਹੈ। ਹਰ ਸੈਸ਼ਨ ਦੋ ਘੰਟੇ ਦਾ ਹੁੰਦਾ ਹੈ।