ਕਪੂਰਥਲਾ, 14 ਫਰਵਰੀ (ਪੋਸਟ ਬਿਊਰੋ)- ਇਸ ਸ਼ਹਿਰ ਦੇ ਚੌਲ ਵਪਾਰੀ ਤੋਂ 2.26 ਕਰੋੜ ਦੇ ਚੌਲ ਹੜੱਪਣ ਦੇ ਮਾਮਲੇ ਵਿੱਚ ਥਾਣਾ ਸਿਟੀ ਪੁਲਸ ਨੇ ਨਵੀਂ ਦਿੱਲੀ ਵਾਸੀ ਔਰਤ ਸਮੇਤ ਅੱਠ ਮੁਲਜ਼ਮਾਂ ਖਿਲਾਫ ਕੇਸ ਦਰਜ ਕਰ ਲਿਆ ਹੈ, ਪਰ ਅਜੇ ਕਿਸੇ ਵੀ ਮੁਲਜ਼ਮ ਦੀ ਗ੍ਰਿਫਤਾਰੀ ਨਹੀਂ ਹੋ ਸਕੀ।
ਮਿਲੀ ਜਾਣਕਾਰੀ ਅਨੁਸਾਰ ਰਮਨ ਵਧਵਾ ਪ੍ਰੋਪਾਈਟਰ ਬਾਲਾਜੀ ਐਂਡ ਕੰਪਨੀ ਨਵੀਂ ਸਬਜ਼ੀ ਮੰਡੀ ਕਪੂਰਥਲਾ ਨੇ ਐਸ ਐਸ ਪੀ ਸਤਿੰਦਰ ਸਿੰਘ ਨੂੰ ਸ਼ਿਕਾਇਤ ਕੀਤੀ ਸੀ ਕਿ ਉਨ੍ਹਾਂ ਨੇ ਰਕੇਸ਼ ਸਿੰਘ ਵਾਸੀ ਜੀ ਐਗਰੋ ਪ੍ਰਾਈਵੇਟ ਲਿਮਟਿਡ ਕੰਪਨੀ, ਜਯੋਤੀ ਵਾਸੀ ਜੀ ਐਗਰੋ, ਹਰਬਿੰਦਰ ਸਿੰਘ ਡਾਇਰੈਕਟਰ ਜੀ ਐਗਰੋ, ਬ੍ਰੋਕਰ ਰਾਜੂ ਜੈਨ ਵਾਸੀ ਨਵਾਂ ਬਾਜ਼ਾਰ ਦਿੱਲੀ, ਬ੍ਰੋਕਰ ਕ੍ਰਿਸ਼ਨ ਲਾਲ ਜੈਨ ਵਾਸੀ ਨਵਾਂ ਬਾਜ਼ਾਰ ਦਿੱਲੀ, ਬਿਸ਼ਨ ਕੁਆਲਟੀ ਮੈਨੇਜਰ ਜੀ ਐਗਰੋ, ਉਤਮ ਕੁਆਲਿਟੀ ਮੈਨੇਜਰ ਜੀ ਐਗਰੋ ਅਤੇ ਲਾਲ ਚੰਦ ਕੁਆਲਟੀ ਮੈਨੇਜਰ ਜੀ ਐਗਰੋ ਨਾਲ ਉਸ ਦੀ ਕੰਪਨੀ ਦਾ ਬਾਸਮਤੀ ਚੌਲ ਪ੍ਰੋਕਨ ਨੱਕ, ਚੱਕੀ ਦਾ ਵਪਾਰ ਸੀ। ਬ੍ਰੋਕਰ ਰਾਜੀਵ ਜੈਨ, ਬ੍ਰੋਕਰ ਕ੍ਰਿਸ਼ਨ ਲਾਲ ਜੈਨ ਅਤੇ ਬਿਸ਼ਨ ਉਸ ਦੀ ਨਵੀਂ ਸਬਜ਼ੀ ਮੰਡੀ ਦੁਕਾਨ 'ਤੇ ਆਏ ਅਤੇ ਬਾਸਮਤੀ ਚੌਲ ਅਤੇ ਬ੍ਰੋਕਰ ਚੌਲ ਦੇ ਸੈਂਪਲ ਲੈ ਗਏ। ਇਸ ਦੌਰਾਨ ਤਿੰਨਾਂ ਨੇ ਉਸ ਨੂੰ ਕਿਹਾ ਕਿ ਉਹ ਇਹ ਸੈਂਪਲ ਰਾਕੇਸ਼ ਸਿੰਘ, ਜਯੋਤੀ ਅਤੇ ਹਰਬਿੰਦਰ ਸਿੰਘ ਜੀ ਐਗਰੋ ਪ੍ਰਾਈਵੇਟ ਲਿਮਟਿਡ ਨਵੀਂ ਦਿੱਲੀ ਨੂੰ ਦੇਣਗੇ। ਬਾਅਦ ਵਿੱਚ ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਨੇ ਸੈਂਪਲ ਦੇਖ ਲਏ ਹਨ ਅਤੇ ਰਾਕੇਸ਼ ਸਿੰਘ, ਜਯੋਤੀ, ਰਾਜੀਵ ਜੈਨ, ਕ੍ਰਿਸ਼ਨ ਲਾਲ ਜੈਨ ਅਤੇ ਬਿਸ਼ਨ ਉਸ ਦੀ ਕਪੂਰਥਲਾ ਦੁਕਾਨ ਵਿੱਚ 15 ਜੂਨ 2018 ਨੂੰ ਆਏ। ਉਨ੍ਹਾਂ ਉਸ ਦੇ ਦਫਤਰ ਬੈਠ ਕੇ 1600 ਟਨ ਬ੍ਰੋਕਨ ਚੌਲ ਨੂੰ 1890 ਰੁਪਏ ਪ੍ਰਤੀ ਕੁਇੰਟਲ ਦੇ ਹਿਸਾਬ ਨਾਲ ਮੁਦਰਾ ਪੋਰਟ ਗੁਜਰਾਤ ਅਤੇ 125 ਐਮ ਟੀ 1121 ਬਾਸਮਤੀ ਰਾਈਸ ਚੌਲ 1750 ਰੁਪਏ ਟਰੱਕ ਲੋਡ ਦੇ ਹਿਸਾਬ ਨਾਲ ਰਮਨ ਸਿੰਘ ਬਖੀਲੀ, ਦਿੱਲੀ ਵਿਖੇ ਪੁਚਾਉਣ ਲਈ ਸੌਦਾ ਕੀਤਾ। ਇਸ ਮੌਕੇ ਤੈਅ ਹੋਇਆ ਕਿ ਮਾਲ ਦਿੱਲੀ ਪਹੁੰਚ ਜਾਵੇਗਾ ਤਾਂ ਰਕਮ 15 ਦਿਨਾਂ ਵਿੱਚ ਭੇਜ ਦਿੱਤੀ ਜਾਵੇਗੀ। ਇਸ ਦੇ ਆਧਾਰ ਉੱਤੇ ਦੋਸ਼ੀਆਂ ਨੇ ਸ਼ਿਕਾਇਤ ਕਰਤਾ ਕੰਪਨੀ ਤੋਂ 735 ਟਨ ਬ੍ਰੋਕਨ ਚੌਲ, ਜਿਸ ਦੀ ਕੀਮਤ ਇਕ ਕਰੋੜ 38 ਲੱਖ ਤੋਂ ਵੱਧ ਸੀ, ਅਤੇ 124 ਟਨ ਚੌਲ, ਜਿਸ ਦੀ ਕੀਮਤ 88 ਲੱਖ ਦੇ ਨੇੜੇ ਬਣੀ ਸੀ, ਖਰੀਦ ਕੀਤੇ। ਫਿਰ ਉਨ੍ਹਾਂ ਨੇ ਮਾਲ ਪਹੁੰਚਣ ਤੋਂ ਬਾਅਦ ਜਦੋਂ ਜੀ ਐਗਰੋ ਪ੍ਰਾਈਵੇਟ ਲਿਮਟਿਡ ਤੋਂ ਰਕਮ ਦੀ ਮੰਗੀ ਤਾਂ ਮੁਲਜ਼ਮਾਂ ਨੇ 2.26 ਕਰੋੜ ਦੀ ਰਕਮ ਦੇਣ ਵਿੱਚ ਆਨਾ ਕਾਨੀ ਸ਼ੁਰੂ ਕਰ ਦਿੱਤੀ। ਸ਼ਿਕਾਇਤ ਕਰਤਾ ਨੇ ਉਨ੍ਹਾਂ ਕੋਲ ਦਿੱਲੀ ਤੱਕ ਚੱਕਰ ਲਾਏ ਤਾਂ ਮੁਲਜ਼ਮਾਂ ਨੇ 24 ਜੁਲਾਈ 2018 ਨੂੰ 80 ਲੱਖ ਰੁਪਏ ਦਾ ਚੈਕ ਐਕਸਿਸ ਬੈਂਕ, 50 ਲੱਖ ਰੁਪਏ ਚੈਕ ਬੈਂਕ ਆਫ ਬੜੌਦਾ ਅਤੇ 50 ਲੱਖ ਰੁਪਏ ਦਾ ਚੈਕ ਬੈਂਕ ਆਫ ਬੜੌਦਾ ਕਾਲਕਾ ਦੇ ਨਾਮ ਦੇ ਦਿੱਤੇ, ਪਰ ਉਨ੍ਹਾਂ ਦੇ ਸਾਰੇ ਚੈਕ ਬੈਂਕਾਂ 'ਚ ਬਾਊਂਸ ਹੋ ਗਏ।
ਐਸ ਐਸ ਪੀ ਨੇ ਕੇਸ ਦੀ ਜਾਂਚ ਡੀ ਐਸ ਪੀ (ਡੀ) ਨੂੰ ਸੌਂਪੀ। ਜਾਂਚ ਦੌਰਾਨ ਮੁਲਜ਼ਮਾਂ ਕੋਲੋਂ ਪੈਸੇ ਹੜੱਪਣ ਦੇ ਦੋਸ਼ ਸਹੀ ਨਿਕਲੇ ਤਾਂ ਪੁਲਸ ਨੇ ਅੱਠ ਜਣਿਆਂ ਰਾਕੇਸ਼ ਸਿੰਘ, ਜਯੋਤੀ, ਹਰਬਿੰਦਰ ਸਿੰਘ, ਬ੍ਰੋਕਰ ਰਾਜੂ ਜੈਨ, ਬ੍ਰੋਕਰ ਕ੍ਰਿਸ਼ਨ ਲਾਲ ਜੈਨ, ਬਿਸ਼ਨ, ਉਤਮ ਅਤੇ ਲਾਲ ਚੰਦ ਖਿਲਾਫ ਕੇਸ ਦਰਜ ਕਰ ਲਿਆ ਹੈ।