ਚੰਡੀਗੜ੍ਹ, 14 ਫਰਵਰੀ (ਪੋਸਟ ਬਿਊਰੋ)- ਸਿਰਫ ਇੱਕ ਅੱਖਰ ਨੂੰ ਸਮਝਣ ਦੀ ਗਲਤੀ ਨਾਲ ਪੰਜਾਬ ਦੇ ਇੱਕ ਨੂੰ ਜਾਣ ਵਾਲਾ ਪਾਰਸਲ ਚੀਨ ਪਹੁੰਚ ਗਿਆ। ਇਹ ਡਾਕ ਮਹਿਕਮੇ ਦਾ ਕਮਾਲ ਹੀ ਤਾਂ ਹੈ।
ਚੰਡੀਗੜ੍ਹ ਦੀ ਇੱਕ ਮਹਿਲਾ ਨੇ ਫਰੀਦਕੋਟ ਵਿੱਚ ਆਪਣੀ ਮਾਂ ਲਈ ਬਲੱਡ ਪ੍ਰੈਸ਼ਰ ਦੀ ਦਵਾਈ ਪਾਰਸਲ ਦੇ ਰਾਹੀਂ ਭੇਜੀ ਸੀ, ਪਰ ਪਿੰਡ ਦਾ ਨਾਮ ਸਮਝਣ ਵਿੱਚ ਗਲਤੀ ਨਾਲ ਪਾਰਸਲ ਚੀਨ ਦੀ ਰਾਜਧਾਨੀ ਪੇਈਚਿੰਗ ਵਿੱਚ ਪਹੁੰਚ ਗਿਆ। ਮਨੀਮਾਜਰਾ ਦੀ ਵਾਸੀ ਬਲਵਿੰਦਰ ਕੌਰ ਦੀ ਸ਼ਿਕਾਇਤ ਉੱਤੇ ਜ਼ਿਲ੍ਹਾ ਖਪਤਕਾਰ ਫੋਰਮ ਨੇ ਸੈਕਟਰ 17 ਦੇ ਡਾਕਘਰ ਤੋਂ ਜਵਾਬ ਮੰਗਿਆ ਤਾਂ ਡਾਕਘਰ ਨੇ ਦੱਸਿਆ ਕਿ ਪਤੇ ਵਿੱਚ ਫਰੀਦਕੋਟ ਜ਼ਿਲ੍ਹੇ ਦੀ ਜੈਤੋ ਤਹਿਸੀਲ ਦਾ ਚੈਨਾ ਪਿੰਡ ਦਾ ਨਾਮ ਦਰਜ ਸੀ, ਜਿਸ ਨੂੰ ਗਲਤੀ ਨਾਲ ਚੀਨ ਸਮਝ ਲਿਆ ਗਿਆ ਸੀ। ਬਲਵਿੰਦਰ ਕੌਰ ਨੇ ਦੱਸਿਆ ਕਿ ਉਨ੍ਹਾਂ ਨੇ ਡਾਕਘਰ ਦੀ ਰਾਜ-ਮਹਿਲ ਬ੍ਰਾਂਚ ਤੋਂ ਪਾਰਸਲ 18 ਜਨਵਰੀ ਨੂੰ ਰਜਿਸਟਰਡ ਪੋਸਟ ਨਾਲ ਭੇਜਿਆ। ਇਹ ਚੰਡੀਗੜ੍ਹ ਤੋਂ ਦਿੱਲੀ ਗਿਆ ਅਤੇ ਉਥੋਂ ਚੀਨ ਚਲਾ ਗਿਆ। 19 ਤੋਂ 27 ਜਨਵਰੀ ਤੱਕ ਪੇਈਚਿੰਗ ਵਿੱਚ ਰਹਿਣ ਪਿੱਛੋਂ 31 ਜਨਵਰੀ ਨੂੰ ਫਿਰ ਪਾਰਸਲ ਮੇਰੇ ਘਰ ਪਹੁੰਚ ਗਿਆ, ਜਿਸ ਦੇ ਲਈ ਡਾਕਘਰ ਦੇ ਅਧਿਕਾਰੀ ਜ਼ਿੰਮੇਵਾਰ ਹਨ।
ਡਾਕਘਰ ਦੇ ਅਧਿਕਾਰੀਆਂ ਨੇ ਆਪਣੀ ਕਿਸੇ ਤਰ੍ਹਾਂ ਦੀ ਗਲਤੀ ਮੰਨਣ ਤੋਂ ਇਨਕਾਰ ਕਰ ਦਿੱਤਾ। ਉਨ੍ਹਾਂ ਨੇ ਆਪਣੇ ਬਚਾਅ ਵਿੱਚ ਕਿਹਾ ਕਿ ਡਾਕਘਰ ਐਕਟ ਹੇਠ ਕੇਂਦਰ ਸਰਕਾਰ ਜਾਂ ਇਸ ਦਾ ਕੋਈ ਪੋਸਟਲ ਅਧਿਕਾਰੀ ਪੋਸਟ ਦੇ ਜ਼ਰੀਏ ਹੋਣ ਵਾਲੀ ਡਲਿਵਰੀ ਦੀ ਦੇਰੀ, ਗੁਆਚ ਜਾਣ ਲਈ ਜ਼ਿੰਮੇਵਾਰ ਨਹੀਂ ਹੁੰਦਾ।