ਨਿਊਯਾਰਕ, 14 ਫਰਵਰੀ (ਪੋਸਟ ਬਿਊਰੋ)- ਅਮਰੀਕਾ 'ਚ ਇਕ ਅਦਾਲਤ ਨੇ ਦੋ ਸਾਲਾਂ ਤੱਕ ਚੱਲਣ ਵਾਲੇ ਕਈ ਕਰੋੜ ਦੇ ਹਵਾਲਾ ਰਾਸ਼ੀ ਯੋਜਨਾ ਮਾਮਲੇ 'ਚ ਭੂਮਿਕਾ ਹੋਣ ਲਈ ਭਾਰਤੀ ਮੂਲ ਦੇ ਤਿੰਨ ਅਮਰੀਕੀਆਂ ਸਣੇ ਛੇ ਲੋਕਾਂ ਨੂੰ ਦੋਸ਼ੀ ਕਰਾਰ ਦਿੱਤਾ ਹੈ। ਅਮਰੀਕੀ ਨਿਆਂ ਵਿਭਾਗ ਨੇ ਦੱਸਿਆ ਕਿ ਰਵਿੰਦਰ ਰੇਡੀ ਗੁਡੀਪਤੀ (61), ਹਰਸ਼ ਜੱਗੀ (54) ਅਤੇ ਨੀਰੂ ਜੱਗੀ ਨੂੰ ਪੰਜ ਹਫਤੇ ਦੇ ਜਿਊਰੀ ਟਰੈਲ ਤੋਂ ਬਾਅਦ ਹਵਾਲਾ ਰਾਸ਼ੀ ਸਾਜ਼ਿਸ਼ ਦਾ ਦੋਸ਼ੀ ਮੰਨਿਆ ਗਿਆ ਹੈ। ਉਕਤ ਤਿੰਨ ਵਿਅਕਤੀ ਲਾਰੇਦੋ ਅਤੇ ਟੈਕਸਾਸ ਨਾਲ ਸਬੰਧਤ ਹਨ।
ਨਿਆਂ ਵਿਭਾਗ ਦੀ ਕਰਾਈਮ ਡਵੀਜ਼ਨ ਦੇ ਸਹਾਇਕ ਅਟਾਰਨੀ ਜਨਰਲ ਨੇ ਕਿਹਾ ਕਿ ਇਨ੍ਹਾਂ ਭਾਰਤੀ-ਅਮਰੀਕੀ ਲੋਕਾਂ ਤੋਂ ਇਲਾਵਾ ਤਿੰਨ ਹੋਰਨਾਂ ਨੂੰ ਵੀ ਇਸ ਮਾਮਲੇ 'ਚ ਦੋਸ਼ੀ ਠਹਿਰਾਇਆ ਗਿਆ ਹੈ, ਜੋ ਮੈਕਸੀਕੋ ਅਤੇ ਟੈਕਸਾਸ ਨਾਲ ਸਬੰਧਤ ਹਨ। ਹਰਸ਼ ਅਤੇ ਅਡਰੀਆ ਨੂੰ ਹਵਾਲਾ ਰਾਸ਼ੀ ਦੇ ਦੋ ਕੇਸਾਂ 'ਚ ਦੋਸ਼ੀ ਠਹਿਰਾਇਆ ਗਿਆ ਹੈ ਅਤੇ ਨੀਰੂ ਜੱਗੀ ਹਵਾਲਾ ਰਾਸ਼ੀ ਦੇ ਇਕ ਹੋਰ ਮਾਮਲੇ 'ਚ ਦੋਸ਼ੀ ਸਿੱਧ ਹੋਇਆ ਹੈ। ਉਕਤ ਛੇ ਵਿਅਕਤੀ ਇਕ ਹਵਾਲਾ ਰਾਸ਼ੀ ਯੋਜਨਾ ਦਾ ਹਿੱਸਾ ਸਨ, ਜਿਸ 'ਚ ਧਨ ਦੀ ਵਰਤੋਂ ਨਸ਼ਾ ਵਿਕਰੀ ਆਦਿ ਕੰਮਾਂ ਲਈ ਹੁੰਦੀ ਸੀ। ਅਦਾਲਤ 'ਚ ਪੇਸ਼ ਸਬੂਤਾਂ ਅਨੁਸਾਰ ਸਾਲ 2011 ਤੋਂ 2013 ਤੱਕ ਇਹ ਕੰਮ ਚੱਲਦਾ ਰਿਹਾ। ਇਸ ਕੰਮ ਦੌਰਾਨ ਅਮਰੀਕੀ ਕਰੰਸੀ ਕਾਰਾਂ, ਕਮਰਸ਼ੀਅਲ ਬੱਸਾਂ, ਕਮਰਸ਼ੀਅਲ ਅਤੇ ਨਿੱਜੀ ਜਹਾਜ਼ਾਂ ਰਾਹੀਂ ਵੀ ਇਕ ਥਾਂ ਤੋਂ ਦੂਜੇ ਥਾਂ ਪਹੁੰਚਾਈ ਜਾਂਦੀ ਰਹੀ ਹੈ।