ਲੰਡਨ, 14 ਫਰਵਰੀ (ਪੋਸਟ ਬਿਊਰੋ)- ਲੋਕਾਂ ਦੇ ਡਾਟਾ ਵਿਚ ਹੈਕਰਜ਼ ਵੱਲੋਂ ਵੱਡੀ ਸੰਨ੍ਹ ਲਾਏ ਜਾਣ ਦੀ ਖਬਰ ਆਈ ਹੈ। ਇਕ ਰਿਪੋਰਟ ਮੁਤਾਬਕ ਇਕ ਹੈਕਰ ਨੇ 16 ਵੈੱਬਸਾਈਟਸ ਤੋਂ 61.7 ਕਰੋੜ ਲੋਕਾਂ ਦੀਆਂ ਸੂਚਨਾਵਾਂ ਚੋਰੀ ਕਰ ਕੇ ਇਨ੍ਹਾਂ ਨੂੰ ਡਾਰਕ ਵੈੱਬ ਉੱਤੇ ਵਿਕਰੀ ਲਈ ਰੱਖਿਆ ਹੈ। ਇਨ੍ਹਾਂ ਲਈ ਕ੍ਰਿਪਟੋਕਰੰਸੀ ਬਿਟਕਾਈਨ ਦਾ ਭੁਗਤਾਨ ਮੰਗਿਆ ਗਿਆ ਤੇ ਕੀਮਤ 20,000 ਡਾਲਰ ਰੱਖੀ ਗਈ ਹੈ। ਰਿਪੋਰਟ ਮੁਤਾਬਕ ਚੋਰੀ ਕੀਤੀਆਂ ਸੂਚਨਾਵਾਂ ਵਿਚ ਇਨ੍ਹਾਂ ਵੈੱਬਸਾਈਟਸ ਦੇ ਅਕਾਊੱਟ ਹੋਲਡਰ ਦਾ ਨਾਂ, ਈਮੇਲ ਐਡਰੈੱਸ ਅਤੇ ਪਾਸਵਰਡ ਸ਼ਾਮਲ ਹਨ।
ਸਪੈਮ ਭੇਜਣ ਵਾਲਿਆਂ ਅਤੇ ਹੋਰ ਹੈਕਰਾਂ ਲਈ ਇਹ ਡਾਟਾ ਬਹੁਤ ਅਹਿਮ ਹੋ ਸਕਦਾ ਹੈ। ਇਸ ਦੀ ਮਦਦ ਨਾਲ ਕਿਸੇ ਯੂਜ਼ਰ ਦੇ ਹਰ ਉਸ ਅਕਾਊਂਟ ਵਿਚ ਸੰਨ੍ਹ ਲਾਉਣਾ ਸੰਭਵ ਹੋ ਸਕਦਾ ਹੈ ਜਿੱਥੇ ਉਸ ਦਾ ਯੂਜ਼ਰਨੇਮ ਅਤੇ ਪਾਸਵਰਡ ਇੱਕੋ ਜਿਹਾ ਹੋਵੇ। ਸਮਝਿਆ ਜਾਂਦਾ ਹੈ ਕਿ ਡਾਟਾ ਨੂੰ ਵਿਕਰੀ ਲਈ ਪੇਸ਼ ਕਰਨ ਵਾਲਾ ਹੈਕਰ ਅਮਰੀਕਾ ਦੇ ਬਾਹਰ ਦਾ ਹੈ। ਹੈਕਰ ਨੇ ਸਮਾਚਾਰ ਵੈੱਬਸਾਈਟ ਦੇ ਰਜਿਸਟਰਾਰ ਨੂੰ ਦੱਸਿਆ ਹੈ ਕਿ ਹਾਲੇ ਤਕ ਡਬਸਮੈਸ਼ ਵੈੱਬਸਾਈਟ ਤੋਂ ਚੋਰੀ ਕੀਤਾ ਡਾਟਾ ਇਕ ਵਿਅਕਤੀ ਨੇ ਖ਼ਰੀਦਿਆ ਹੈ। ਇਸ ਦੌਰਾਨ ਹੈਕਿੰਗ ਦਾ ਸ਼ਿਕਾਰ ਹੋਈਆਂ ਵੈੱਬਸਾਈਟਾਂ ਨੇ ਆਪਣੇ ਯੂਜ਼ਰਸ ਨੂੰ ਚਿਤਾਵਨੀ ਦਿੱਤੀ ਅਤੇ ਪਾਸਵਰਡ ਬਦਲਣ ਲਈ ਕਿਹਾ ਹੈ। ਜਿਹੜੀਆਂ ਵੈੱਬਸਾਈਟਸ ਨੂੰ ਸੰਨ੍ਹ ਲੱਗੀ ਮੰਨੀ ਜਾਂਦੀ ਹੈ, ਉਨ੍ਹਾਂ ਵਿੱ ਕਈ ਵੱਡੇ ਅਦਾਰੇ ਸ਼ਾਮਲ ਹਨ।