ਵਾਸ਼ਿੰਗਟਨ, 14 ਫਰਵਰੀ (ਪੋਸਟ ਬਿਊਰੋ)- ਅਮਰੀਕਾ ਨੇ ਆਪਣੀ ਹਵਾਈ ਫ਼ੌਜ ਦੀ ਇੱਕ ਸਾਬਕਾ ਖ਼ੁਫ਼ੀਆ ਅਧਿਕਾਰੀ ਮੋਨਿਕਾ ਉੱਤੇ ਸਾਈਬਰ ਜਾਸੂਸੀ ਮੁਹਿੰਮ ਵਿਚ ਈਰਾਨ ਦੀ ਮਦਦ ਕਰਨ ਦਾ ਦੋਸ਼ ਲਾਇਆ ਹੈ। ਅਪਣੀ ਕਾਰਵਾਈ ਹੇਠ ਅਮਰੀਕਾ ਨੇ ਚਾਰ ਈਰਾਨੀ ਨਾਗਰਿਕਾਂ ਉੱਤੇ ਵੀ ਇਹੋ ਦੋਸ਼ ਲਾਇਆ ਹੈ।
ਇਸ ਬਾਰੇ ਅਮਰੀਕਾ ਦਾ ਕਹਿਣਾ ਹੈ ਕਿ ਇਹ ਚਾਰੇ ਜਣੇ ਸਾਈਬਰ ਹਮਲੇ ਵਿਚ ਸ਼ਾਮਲ ਸਾਬਤ ਹੋਏ ਸਨ। ਇਸ ਤੋਂ ਇਲਾਵਾ ਈਰਾਨ ਵਿਚਲੇ ਦੋ ਅਦਾਰਿਆਂ ਨਿਊ ਹੋਰਾਈਜਨ ਆਰਗੇਨਾਈਜੇਸ਼ਨ ਅਤੇ ਪੇਗਾਰਡ ਸਾਮਾਵਟ ਕੰਪਨੀ ਅਤੇ ਦੋਵੇਂ ਗਰੁੱਪਾਂ ਨਾਲ ਜੁੜੇ ਕਈ ਲੋਕਾਂ ਨੂੰ ਬੈਨ ਵੀ ਕੀਤਾ ਗਿਆ ਹੈ। ਅਮਰੀਕੀ ਅਧਿਕਾਰੀਆਂ ਨੇ ਕਿਹਾ ਕਿ ਸਾਬਕਾ ਖ਼ੁਫ਼ੀਆ ਅਧਿਕਾਰੀ ਮੋਨਿਕਾ ਨੇ ਸਾਲ 2013 ਵਿਚ ਅਮਰੀਕੀ ਖ਼ੁਫ਼ੀਆ ਅਧਿਕਾਰੀਆਂ ਬਾਰੇ ਕਲਾਸੀਫ਼ਾਈਡ ਸੂਚਨਾਵਾਂ ਈਰਾਨ ਨੂੰ ਪੁਚਾਈਆਂ ਸਨ। ਨਿਊ ਹੋਰਾਈਜਨ ਵੱਲੋਂ ਕਰਵਾਈਆਂ ਦੋ ਕੌਮਾਂਤਰੀ ਕਾਂਨਫਰੰਸਾਂ ਵਿਚ ਹਿੱਸਾ ਲੈਣ ਪਿੱਛੋਂ ਸਾਬਕਾ ਹਵਾਈ ਫ਼ੌਜ ਅਧਿਕਾਰੀ ਨੂੰ ਨਿਯੁਕਤ ਕੀਤਾ ਗਿਆ ਸੀ। ਨਿਊ ਹੋਰਾਈਜਨ ਨੇ ਈਰਾਨ ਦੇ ਰਿਵੋਲਿਊਸ਼ਨਰੀ ਗਾਰਡ ਕੁਦਸ ਫੋਰਸ ਦੇ ਮਾਈਗਰੇਸ਼ਨ ਦੇ ਸਮਰਥਨ ਕੀਤਾ ਸੀ। ਰਿਵੋਲਿਊਸ਼ਨਰੀ ਗਾਰਡ ਵਿਦੇਸ਼ੀ ਲੋਕਾਂ ਨੂੰ ਭਰਤੀ ਕਰਨ ਤੇ ਖੁਫ਼ੀਆ ਸੂਚਨਾ ਇਕੱਠੀ ਕਰਨ ਦੀ ਕੋਸ਼ਿਸ਼ ਵਿਚ ਲੱਗਿਆ ਹੋਇਆ ਸੀ।