* ਯੂਰਪੀ ਯੂਨੀਅਨ ਨੇ ਸਾਊਦੀ ਅਰਬ ਕਾਲੀ ਸੂਚੀ ਵਿੱਚ ਪਾਇਆ
ਸਟਰਾਸਬਰਗ, 14 ਫਰਵਰੀ (ਪੋਸਟ ਬਿਊਰੋ)- ਯੂਰਪੀ ਯੂਨੀਅਨ (ਈ ਯੂ) ਨੇ ਅੱਤਵਾਦੀ ਫੰਡਿੰਗ ਅਤੇ ਮਨੀ ਲਾਂਡਰਿੰਗ ਨਾਲ ਜੁੜੀ ਕਾਲੀ ਸੂਚੀ ਵਿਚ ਪਾਕਿਸਤਾਨ ਦੇ ਬਾਅਦ ਸਾਊਦੀ ਅਰਬ ਨੂੰ ਵੀ ਪਾ ਦਿੱਤਾ ਹੈ। ਇਸ ਸੂਚੀ ਵਿਚ ਅਮਰੀਕਾ ਦੇ ਚਾਰ ਖੇਤਰ ਵੀ ਸ਼ਾਮਲ ਕੀਤੇ ਗਏ ਹਨ। ਇਸ ਸੂਚੀ ਵਿਚ ਪਾਏ ਗਏ ਦੇਸ਼ਾਂ ਨੂੰ ਯੂਰਪੀ ਯੂਨੀਅਨ ਖਤਰਾ ਮੰਨਦਾ ਹੈ ਅਤੇ ਇਸ ਸੂਚੀ ਵਿਚ ਸ਼ਾਮਲ ਕੀਤੇ ਗਏ ਦੇਸ਼ਾਂ ਦੀ ਗਿਣਤੀ 23 ਹੋ ਗਈ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਯੂਰਪੀ ਯੂਨੀਅਨ ਨੇ ਏਡਾ ਕਦਮ ਆਪਣੇ ਬੈਂਕਾਂ ਵਿਚ ਹੋਏ ਘਪਲੇ ਦੇ ਬਾਅਦ ਮਨੀ ਲਾਂਡਰਿੰਗ ਉੱਤੇ ਕੀਤੀ ਕਾਰਵਾਈ ਵਜੋਂ ਚੁੱਕਿਆ ਹੈ। ਸੂਚੀ ਵਿਚ ਸਾਮਲ ਕੀਤੇ ਦੇਸ਼ਾਂ ਵਿਚ ਅੱਤਵਾਦੀ ਫੰਡਿੰਗ ਅਤੇ ਮਨੀ ਲਾਂਡਰਿੰਗ ਰੋਕਣ ਦੇ ਉਪਾਵਾਂ ਵਿਚ ਰਣਨੀਤਕ ਘਾਟਾਂ ਨਿਕਲੀਆਂ ਹਨ। ਯੂਰਪੀ ਯੂਨੀਅਨ ਦੀ ਜਸਟਿਸ ਕਮਿਸ਼ਨਰ ਵੇਰਾ ਜੋਰੋਵਾ ਨੇ ਅੱਜ ਕਿਹਾ, ‘ਸੂਚੀ ਉੱਤੇ ਮੋਹਰ ਲਾਉਣ ਲਈ ਯੂਰਪੀ ਯੂਨੀਅਨ ਦੇ 28 ਦੇਸ਼ਾਂ ਕੋਲ ਇਕ ਮਹੀਨੇ ਦਾ ਸਮਾਂ ਹੈ। ਇਸ ਮਿਆਦ ਨੂੰ ਵਧਾ ਕੇ 2 ਮਹੀਨੇ ਕੀਤਾ ਜਾ ਸਕਦਾ ਹੈ।’ ਵੇਰਾ ਜੋਰੋਵਾ ਨੇ ਕਿਹਾ ਕਿ ਉਹ ਇਸ ਸੂਚੀ ਨੂੰ ਉਹ ਬਹੁਮਤ ਨਾਲ ਰੱਦ ਕਰ ਸਕਦੇ ਹਨ, ਪਰ ਏਦਾਂ ਨਹੀਂ ਕਰਨਗੇ। ਇਸ ਨਵੀਂ ਸੂਚੀ ਵਿਚ ਪਨਾਮਾ, ਲੀਬੀਆ, ਬੋਤਸਵਾਨਾ, ਘਾਨਾ, ਸਮੋਆ ਤੇ ਬਹਾਮਾਸ ਨਾਲ ਅਮਰੀਕਾ ਦੇ ਚਾਰ ਖੇਤਰ ਅਮੈਰੀਕਨ ਸਮੋਆ, ਵਰਜ਼ਿਨ ਟਾਪੂ, ਪਿਊਰਟੋ ਰੀਕੇ ਅਤੇ ਗੁਆਨਾ ਸ਼ਾਮਲ ਕੀਤੇ ਗਏ ਹਨ। ਇਸ ਸੂਚੀ ਵਿਚ ਪਹਿਲਾਂ ਤੋਂ ਪਾਕਿਸਤਾਨ, ਅਫਗਾਨਿਸਤਾਨ, ਉੱਤਰੀ ਕੋਰੀਆ, ਇਥੋਪੀਆ, ਈਰਾਨ, ਇਰਾਕ, ਸ਼੍ਰੀਲੰਕਾ, ਸੀਰੀਆ, ਤ੍ਰਿਨਿਨਾਦ ਅਤੇ ਟੋਬੈਗੋ, ਟਿਊਨੀਸ਼ੀਆ ਤੇ ਯਮਨ ਸ਼ਾਮਲ ਹਨ।