ਸ੍ਰੀਨਗਰ, 14 ਫਰਵਰੀ, (ਪੋਸਟ ਬਿਊਰੋ)- ਜੰਮੂ ਕਸ਼ਮੀਰ ਦੇ ਪੁਲਵਾਮਾ ਵਿੱਚ ਅੱਜ ਸੀ ਆਰ ਪੀ ਐੱਫ ਦੇ ਕਾਫਲੇ ਉੱਤੇ ਹੋਏ ਇੱਕ ਅੱਤਵਾਦੀ ਹਮਲੇ ਵਿੱਚ 44 ਜਵਾਨ ਮਾਰੇ ਗਏ ਅਤੇ 44 ਹੋਰ ਜ਼ਖਮੀ ਹੋਣ ਦੀ ਖਬਰ ਹੈ। ਇਸ ਵੱਡੇ ਹਮਲੇ ਦੀ ਜਿ਼ਮੇਵਾਰੀ ਪਾਕਿਸਤਾਨ ਵਿੱਚੋਂ ਚੱਲਦੇ ਅੱਤਵਾਦੀ ਸੰਗਠਨ ਜੈਸ਼-ਏ-ਮੁਹੰਮਦ ਨੇ ਲਈ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਇਸ ਹਮਲੇ ਦੇ ਸ਼ੁਰੂ ਵਿੱਚ ਆਈ ਈ ਡੀ ਧਮਾਕਾ ਕੀਤਾ ਗਿਆ ਅਤੇ ਫਿਰ ਗੋਲੀਬਾਰੀ ਕੀਤੀ ਗਈ। ਸੀ ਆਰ ਪੀ ਐੱਫ ਦੇ ਜਿਸ ਕਾਫਿਲੇ ਉੱਤੇ ਹਮਲਾ ਹੋਇਆ, ਉਸ ਵਿੱਚ ਕਰੀਬ 2500 ਜਵਾਨ ਦੱਸੇ ਗਏ ਹਨ। ਖਬਰਾਂ ਹਨ ਕਿ ਕਾਰ ਵਿੱਚ ਆਈ ਈ ਡੀ ਫਿੱਟ ਕੀਤਾ ਪਿਆ ਸੀ। ਇਸ ਕਾਰ ਬੰਬ ਧਮਾਕੇ ਵਿੱਚ ਸੀ ਆਰ ਪੀ ਐੱਫ ਦੇ 44 ਜਵਾਨ ਮਾਰੇ ਗਏ। ਜ਼ਖਮੀਆਂ ਨੂੰ ਨੇੜਲੇ ਹਸਪਤਾਲ ਵਿੱਚ ਦਾਖਲ ਕਰਾਇਆ ਹੈ, ਪਰ ਕੁਝ ਜਵਾਨਾਂ ਦੀ ਹਾਲਤ ਗੰਭੀਰ ਬਣੀ ਹੋਈ ਹੈ। ਇਹ ਕਾਰ ਬੰਬ ਰੱਖ ਕੇ ਵਾਰਦਾਤ ਕਰਨ ਵਾਲੇ ਜੈਸ਼ ਦੇ ਆਤਮਘਾਤੀ ਅੱਤਵਾਦੀ ਦਾ ਨਾਂ ਆਦਿਲ ਅਹਿਮਦ ਵੱਕਾਸ ਉਰਫ ਕਮਾਂਡੋ ਵਾਸੀ ਗੁੰਡੀਬਾਗ, ਪੁਲਵਾਮਾ ਦੱਸਿਆ ਜਾ ਰਿਹਾ ਹੈ।
ਪੁਲਿਸ ਅਧਿਕਾਰੀਆਂ ਦੇ ਦੱਸਣ ਮੁਤਾਬਕ ਖ਼ਰਾਬ ਮੌਸਮ ਕਾਰਨ ਦੋ ਦਿਨਾਂ ਤੋਂ ਜੰਮੂ-ਕਸ਼ਮੀਰ ਹਾਈਵੇਅ ਬੰਦ ਸੀ, ਇਸ ਲਈ ਵੀਰਵਾਰ ਇਸ ਕਾਫਲੇ ਵਿੱਚ ਇਕੱਠੇ ਇੰਨੀ ਵੱਡੀ ਗਿਣਤੀ ਵਿਚ ਫੋਰਸ ਨੂੰ ਸ੍ਰੀਨਗਰ ਭੇਜਿਆ ਸੀ। ਧਮਾਕੇ ਦੀ ਆਵਾਜ਼ ਕਈ ਮੀਲ ਦੂਰ ਤਕ ਸੁਣੀ ਗਈ ਅਤੇ ਕੁਝ ਪਲਾਂ ਬਾਅਦ ਹਾਈਵੇ ਉੱਤੇ ਕਰੀਬ 100 ਮੀਟਰ ਦੇ ਘੇਰੇ ਵਿਚ ਲਾਸ਼ਾਂ ਤੇ ਸਰੀਰਕ ਅੰਗਾਂ ਦੇ ਟੁੱਕੜੇ ਖਿੱਲਰੇ ਪਏ ਹੋਏ ਸਨ। 18 ਸਤੰਬਰ 2016 ਨੂੰ ਉੜੀ ਹਮਲੇ ਮਗਰੋਂ ਇਹ ਅੱਜ ਤੱਕ ਦਾ ਸਭ ਤੋਂ ਵੱਡਾ ਹਮਲਾ ਕਿਹਾ ਗਿਆ ਹੈ। ਉੜੀ ਹਮਲੇ ਵਿੱਚ 18 ਜਵਾਨ ਮਾਰੇ ਗਏ ਸਨ। ਇਸ ਪਿੱਛੋਂ ਭਾਰਤੀ ਫ਼ੌਜ ਨੇ ਪਾਕਿਸਤਾਨੀ ਕਬਜ਼ੇ ਵਾਲੇ ਕਸ਼ਮੀਰ ਵਿੱਚ ਦਾਖਲ ਹੋ ਕੇ ਸਰਜੀਕਲ ਸਟ੍ਰਾਈਕ ਕੀਤੀ ਸੀ।
ਮੁੱਢਲੀਆਂ ਰਿਪੋਰਟਾਂ ਮੁਤਾਬਕ ਅੱਜ ਵਾਲੀ ਵਾਰਦਾਤ ਦਾ ਦੋਸ਼ੀ ਆਤਮਘਾਤੀ ਅੱਤਵਾਦੀ ਆਦਿਲ ਅਹਿਮਦ ਉਰਫ਼ ਵੱਕਾਸ ਦੱਖਣੀ ਕਸ਼ਮੀਰ ਦੇ ਗੁੰਡੀਬਾਗ, ਕਾਕਪੋਰਾ, ਪੁਲਵਾਮਾ ਦਾ ਵਾਸੀ ਸੀ, ਜਿਹੜਾ ਅਪ੍ਰੈਲ 2018 ਵਿੱਚ ਅੱਤਵਾਦੀ ਬਣਿਆ ਸੀ। ਦੱਸਿਆ ਜਾਂਦਾ ਹੈ ਕਿ ਉਹ ਜੈਸ਼ ਜਥੇਬੰਦੀ ਦੇ ‘ਅਫਜ਼ਲ ਗੁਰੂ ਸਕਵਾਡ’ ਵਿੱਚ ਸੀ। 21 ਸਾਲਾ ਆਦਿਲ ਨੂੰ ਸੀ-ਕੈਟੇਗਰੀ ਦੇ ਅੱਤਵਾਦੀਆਂ ਵਿੱਚ ਰੱਖ ਕੇ ਉਸ ਦੇ ਸਿਰ ਦਾ ਤਿੰਨ ਲੱਖ ਰੁਪਏ ਇਨਾਮ ਰੱਖਿਆ ਹੋਇਆ ਸੀ।
ਭਾਰਤ ਸਰਕਾਰ ਨੇ ਜੰਮੂ ਕਸ਼ਮੀਰ ਵਿੱਚ ਸੁਰੱਖਿਆ ਬਲਾਂ ਉੱਤੇ ਅੱਤਵਾਦੀ ਹਮਲੇ ਕਾਰਨ ਸਖਤ ਰੁਖ ਧਾਰਨ ਕਰ ਕੇ ਪਾਕਿਸਤਾਨ ਵਿਚਲੇ ਸਰਗਰਮ ਅੱਤਵਾਦੀ ਗਰੁੱਪ ਜੈਸ਼-ਏ-ਮੁਹੰਮਦ ਦੋਸ਼ੀ ਕਰਾਰ ਦਿੱਤਾ ਅਤੇ ਯੂ ਐੱਨ ਓ ਅਤੇ ਹੋਰ ਦੇਸ਼ਾਂ ਤੋਂ ਪਾਕਿਸਤਾਨ ਸਮਰਥਿਤ ਅੱਤਵਾਦੀ ਗਰੁੱਪਾਂ ਨੂੰ ਪਾਬੰਦੀ ਸ਼ੂਦਾ ਕਰਨ ਦਾ ਸੱਦਾ ਦਿੱਤਾ ਹੈ। ਵਿਦੇਸ਼ ਮੰਤਰਾਲਾ ਵੱਲੋਂ ਜਾਰੀ ਕੀਤੇ ਬਿਆਨ ਵਿੱਚ ਭਾਰਤ ਨੇ ਕਿਹਾ ਹੈ ਕਿ ਅੰਤਰਰਾਸ਼ਟਰੀ ਅੱਤਵਾਦੀ ਅਜ਼ਹਰ ਦੀ ਅਗਵਾਈ ਵਾਲੇ ਅੱਤਵਾਦੀ ਗਰੁੱਪ ਨੂੰ ਚਲਾਉਣ ਤੇ ਉਸ ਦੇ ਢਾਂਚੇ ਨੂੰ ਮਜ਼ਬੂਤ ਕਰਨ ਲਈ ਪਾਕਿਸਤਾਨ ਸਰਕਾਰ ਨੇ ਪੂਰੀ ਆਜ਼ਾਦੀ ਦਿੱਤੀ ਹੈ।