ਫਰੈਡਰਿਕਟਨ, 12 ਫਰਵਰੀ (ਪੋਸਟ ਬਿਊਰੋ) : ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਵੱਲੋਂ ਨਿਊ ਬਰੰਜ਼ਵਿੱਕ ਵਿੱਚਪੂਰਾ ਕੈਂਪੇਨ ਸਟਾਈਲ ਮੁਜ਼ਾਹਰਾ ਕੀਤਾ ਗਿਆ। ਪਾਰਟੀ ਹੁਣ ਪ੍ਰੋਵਿੰਸ ਤੇ ਖਿੱਤੇ ਵਿੱਚ ਮੁੜ ਤੋਂ ਆਪਣੇ ਪੈਰ ਜਮਾਉਣ ਦੀ ਕੋਸਿ਼ਸ਼ ਕਰ ਰਹੀ ਹੈ ਕਿਉਂਕਿ ਪਿਛਲੀ ਵਾਰੀ ਇੱਥੇ ਪਾਰਟੀ ਨੂੰ ਸਖਤ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।
2015 ਦੀਆਂ ਚੋਣਾਂ ਵਿੱਚ ਲਿਬਰਲਾਂ ਨੇ ਐਟਲਾਂਟਿਕ ਕੈਨੇਡਾ ਵਿੱਚ ਹਾਊਸ ਆਫ ਕਾਮਨਜ ਦੀਆਂ 32 ਸੀਟਾਂ ਉੱਤੇ ਜਿੱਤ ਹਾਸਲ ਕੀਤੀ ਸੀ, ਇਨ੍ਹਾਂ ਵਿੱਚ 10 ਨਿਊ ਬਰੰਜਵਿੱਕ ਦੀਆਂ ਸੀਟਾਂ ਵੀ ਸਾਮਲ ਸਨ। ਸੀਅਰ ਨੇ ਸੋਮਵਾਰ ਨੂੰ ਫਰੈਡਰਿਕਟਨ ਵਿੱਚ ਆਖਿਆ ਕਿ ਇਹ ਗੱਲ ਸੱਚ ਹੈ ਕਿ ਭਾਵੇਂ ਪਿਛਲੀ ਵਾਰੀ ਚੋਣਾਂ ਵਿੱਚ 32 ਦੀਆਂ 32 ਸੀਟਾਂ ਲਿਬਰਲਾਂ ਨੂੰ ਮਿਲੀਆਂ ਸਨ ਪਰ ਉਦੋਂ ਤੋਂ ਲੈ ਕੇ ਹੁਣ ਤੱਕ ਐਟਲਾਂਟਿਕ ਕੈਨੇਡਾ ਨੂੰ ਕੁੱਝ ਵੀ ਹਾਸਲ ਨਹੀਂ ਹੋਇਆ।
ਸੋਮਵਾਰ ਸਾਮ ਨੂੰ ਸੀਅਰ ਨੇ ਇੱਥੇ ਟਾਊਨ ਹਾਲ ਮੀਟਿੰਗ ਵੀ ਕੀਤੀ। ਉਨ੍ਹਾਂ ਆਖਿਆ ਕਿ ਅਕਤੂਬਰ ਵਿੱਚ ਫੈਡਰਲ ਸਰਕਾਰ ਬਣਾਉਣ ਵਿੱਚ ਹੁਣ ਸੱਤ ਮਹੀਨੇ ਦਾ ਸਮਾਂ ਹੀ ਰਹਿ ਗਿਆ ਹੈ। ਉਨ੍ਹਾਂ ਆਖਿਆ ਕਿ ਕਈ ਲੋਕਾਂ ਨੇ ਉਨ੍ਹਾਂ ਨਾਲ ਮੁਲਾਕਾਤ ਕਰਕੇ ਉਨ੍ਹਾਂ ਨੂੰ ਦੱਸਿਆ ਹੈ ਕਿ ਉਹ ਟਰੂਡੋ ਦੀਆਂ ਗਲਤੀਆਂ ਦਾ ਖਮਿਆਜਾ ਭੁਗਤਦੇ ਭੁਗਤਦੇ ਤੰਗ ਆ ਗਏ ਹਨ। ਉਨ੍ਹਾਂ ਨੂੰ ਵੱਡੇ ਘਾਟੇ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਤੇ ਉਹ ਜਾਣਦੇ ਹਨ ਕਿ ਇਸ ਦਾ ਖਮਿਆਜਾ ਉਨ੍ਹਾਂ ਨੂੰ ਟੈਕਸਾਂ ਦੇ ਰੂਪ ਵਿੱਚ ਚੁਕਾਉਣਾ ਹੋਵੇਗਾ। ਸੀਅਰ ਨੇ ਫੈਡਰਲ ਕਾਰਬਨ ਟੈਕਸ ਵਿੱਚ ਕਟੌਤੀ ਕਰਨ ਦਾ ਤਹੱਈਆ ਵੀ ਪ੍ਰਗਟਾਇਆ।