ਹਾਲਟਨ, 11 ਫਰਵਰੀ (ਪੋਸਟ ਬਿਊਰੋ) : ਹਾਲਟਨ ਪੁਲਿਸ ਤੇ ਟਾਈਗਰ ਜੀਤ ਸਿੰਘ ਫਾਊਂਡੇਸ਼ਨ ਵੱਲੋਂ ਛੁੱਟੀਆਂ ਦੇ ਸੀਜ਼ਨ ਦੌਰਾਨ 700,000 ਡਾਲਰ ਦੇ ਨੇੜੇ ਤੇੜੇ ਇੱਕਠੇ ਕੀਤੇ ਗਏ ਹਨ।
2018 ਵਿੱਚ ਹਾਲਟਨ ਪੁਲਿਸ ਦੀ ਟੌਇਜ਼ ਫੌਰ ਟੌਟਸ ਕੈਂਪੇਨ ਤੇ ਟਾਈਗਰ ਜੀਤ ਸਿੰਘ ਫਾਊਂਡੇਸ਼ਨ ਮਿਰੈਕਲ ਵੱਲੋਂ ਛੁੱਟੀਆਂ ਦੇ ਸੀਜ਼ਨ ਵਿੱਚ ਵਧੇਰੇ ਪਰਿਵਾਰਾਂ ਤੇ ਬੱਚਿਆਂ ਦੀ ਮਦਦ ਦਾ ਟੀਚਾ ਮਿਥਿਆ ਗਿਆ ਸੀ। ਇਸ ਦੌਰਾਨ ਸਾਂਝੇ ਉੱਦਮਾਂ ਸਦਕਾ 700,000 ਡਾਲਰ ਦੇ ਖਿਡੌਣੇ, ਨਕਦੀ ਤੇ ਗਿਫਟ ਕਾਰਡ ਆਦਿ ਇੱਕਠੇ ਹੋਏ ਤੇ ਫਿਰ ਇਨ੍ਹਾਂ ਨੂੰ ਵਾਪਿਸ ਕਮਿਊਨਿਟੀ ਵਿੱਚ ਡੋਨੇਟ ਕਰ ਦਿੱਤਾ ਗਿਆ।
ਇਸ ਦੇ ਨਾਲ ਹੀ ਮੈਂਟਲ ਹੈਲਥ, ਸਾਖਰਤਾ, ਕਲਾਸਰੂਮਜ਼ ਦੀ ਵਜਾ ਸੁਧਾਰਨ, ਕੋਡਿੰਗ, ਆਰਟ ਵਰਕਸ਼ਾਪਜ਼, ਕਲਾਸਰੂਮ ਤਕਨਾਲੋਜੀ ਤੇ ਬ੍ਰੇਕਫਾਸਟ ਪ੍ਰੋਗਰਾਮਜ਼ ਨਾਲ ਜੁੜੀਆਂ ਪਹਿਲਕਦਮੀਆਂ ਦਾ ਸਮਰਥਨ ਕਰਨ ਲਈ 30,000 ਡਾਲਰ ਵੱਖ ਵੱਖ ਐਲੀਮੈਂਟਰੀ ਸਕੂਲਾਂ ਨੂੰ ਡੋਨੇਟ ਕੀਤੇ ਗਏ। ਇਸ ਕੈਂਪੇਨ ਦੌਰਾਨ ਇੱਕਠੇ ਹੋਏ ਖਿਡੌਣੇ ਹਾਲਟਨ ਰੀਜਨ ਦੇ ਵੱਖ ਵੱਖ ਲੋੜਵੰਦ ਪਰਿਵਾਰਾਂ ਨੂੰ ਡੋਨੇਟ ਕੀਤੇ ਗਏ ਤੇ ਨਾਲ ਹੀ ਕਈ ਕਮਿਊਨਿਟੀ ਆਰਗੇਨਾਈਜ਼ੇਸ਼ਨਜ਼ ਜਿਨ੍ਹਾਂ ਵਿੱਚ ਲੋਕਲ ਸਾਲਵੇਸ਼ਨ ਆਰਮੀ ਚੈਪਟਰਜ਼, ਹਾਲਟਨ ਵੁਮਨਜ਼ ਪਲੇਸ, ਸਿੱਕਕਿੱਡਜ਼ ਤੇ ਮੈਕਮਾਸਟਰ ਚਿਲਡਰਨਜ਼ ਹਾਸਪਿਟਲ ਨੂੰ ਡੋਨੇਟ ਕੀਤੇ ਗਏ।
ਹਾਲਟਨ ਦੇ ਪੁਲਿਸ ਚੀਫ ਸਟੀਫਨ ਟੈਨਰ ਨੇ ਆਖਿਆ ਕਿ ਹਾਲਟਨ ਵਾਸੀਆਂ, ਕਾਰੋਬਾਰੀ ਭਾਈਵਾਲਾਂ ਤੇ ਕਮਿਊਨਿਟੀ ਆਰਗੇਨਾਈਜ਼ੇਸ਼ਨ ਨੇ ਇੱਕ ਵਾਰੀ ਫਿਰ ਆਪਣੀ ਫਰਾਖਦਿਲੀ ਦਾ ਸਬੂਤ ਦਿੱਤਾ ਹੈ ਤੇ ਇਸ ਕੈਂਪੇਨ ਵਿੱਚ ਵੱਧ ਚੜ੍ਹ ਕੇ ਹਿੱਸਾ ਲਿਆ। ਟਾਈਗਰ ਜੀਤ ਸਿੰਘ ਫਾਊਂਡੇਸ਼ਨ ਦੇ ਪ੍ਰੈਜ਼ੀਡੈਂਟ ਟਾਈਗਰ ਜੀਤ ਸਿੰਘ ਜੂਨੀਅਰ ਨੇ ਆਖਿਆ ਕਿ ਬਿਮਾਰੀ ਤੇ ਗਰੀਬੀ ਜਦੋਂ ਕੋਈ ਪੱਖਪਾਤ ਨਹੀਂ ਕਰਦੀ ਉਸੇ ਤਰ੍ਹਾਂ ਹੀ ਸਾਡੀ ਦਾਨ ਕਰਨ ਦੀ ਇੱਛਾ ਵੀ ਨਹੀਂ ਮਰਨੀ ਚਾਹੀਦੀ। ਉਨ੍ਹਾਂ ਆਖਿਆ ਕਿ ਆਉਣ ਵਾਲੇ ਸਾਲਾਂ ਵਿੱਚ ਵੀ ਇਸ ਭਾਈਵਾਲੀ ਨੂੰ ਬਰਕਰਾਰ ਰੱਖਿਆ ਜਾਵੇਗਾ ਤੇ ਕਮਿਊਨਿਟੀ ਲਈ ਵੱਧ ਤੋਂ ਵੱਧ ਕੰਮ ਕੀਤਾ ਜਾਵੇਗਾ।