ਐਨਡੀਪੀ ਆਗੂ ਜਗਮੀਤ ਸਿੰਘ ਵੀ ਇਸੇ ਸੀਟ ਤੋਂ ਹਨ ਦਾਅਵੇਦਾਰ
ਬਰਨਾਬੀ, 11 ਫਰਵਰੀ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦਾ ਕਹਿਣਾ ਹੈ ਕਿ ਬਰਨਾਬੀ ਸਾਊਥ ਵਿੱਚ ਲਿਬਰਲ ਉਮੀਦਵਾਰ ਦੀ ਕਮਿਊਨਿਟੀ ਵਿੱਚ ਕਾਫੀ ਪੈਠ ਹੈ। ਟਰੂਡੋ ਨੇ ਐਤਵਾਰ ਨੂੰ ਇਸ ਹਲਕੇ ਵਿੱਚ ਕੈਂਪੇਨ ਕੀਤੀ ਜਿੱਥੋਂ ਐਨਡੀਪੀ ਆਗੂ ਜਗਮੀਤ ਸਿੰਘ ਵੀ ਸੀਟ ਦੀ ਭਾਲ ਵਿੱਚ ਹਨ।
ਸਮਰਥਕਾਂ ਦੀ ਭੀੜ ਨੂੰ ਸੰਬੋਧਨ ਕਰਦਿਆਂ ਪ੍ਰਧਾਨ ਮੰਤਰੀ ਨੇ ਆਖਿਆ ਕਿ ਰਿਚਰਡ ਟੀ.ਲੀ ਨੇ ਪ੍ਰੋਵਿੰਸ਼ੀਅਲ ਵਿਧਾਇਕ ਵਜੋਂ ਬਰਨਾਬੀ, ਬੀਸੀ ਦੇ ਲੋਕਾਂ ਦੀ ਪਿਛਲੇ 16 ਸਾਲਾਂ ਤੋਂ ਸੇਵਾ ਕੀਤੀ ਹੈ। ਇੱਥੇ ਹੀ ਬੱਸ ਨਹੀਂ ਉਹ ਸ਼ਹਿਰ ਦੀ ਨੁਹਾਰ ਬਦਲਣ ਲਈ ਸਖ਼ਤ ਮਿਹਨਤ ਕਰ ਰਹੇ ਹਨ। ਟਰੂਡੋ ਨੇ ਆਖਿਆ ਕਿ ਅਸੀਂ ਚਾਹੁੰਦੇ ਹਾਂ ਕਿ ਸਥਾਨਕ ਲੋਕਾਂ ਦੀ ਆਵਾਜ਼ ਨੂੰ ਓਟਵਾ ਤੱਕ ਪਹੁੰਚਾਉਣ ਲਈ ਤੇ ਉਨ੍ਹਾਂ ਵਾਸਤੇ ਖੜ੍ਹੇ ਹੋਣ ਲਈ ਸਾਨੂੰ ਦਮਦਾਰ ਸ਼ਖਸੀਅਤ ਦੀ ਲੋੜ ਹੈ ਤੇ ਰਿਚਰਡ ਉਹੀ ਕੁੱਝ ਕਰ ਰਹੇ ਹਨ।
ਉਨ੍ਹਾਂ ਆਖਿਆ ਕਿ ਕਿਸੇ ਵੱਲੋਂ ਵੀ ਕੋਈ ਗਲਤੀ ਨਹੀਂ ਕੀਤੀ ਗਈ। ਲਿਬਰਲ ਪਾਰਟੀ ਬਰਨਾਬੀ ਸਾਊਥ ਹਲਕੇ ਤੋਂ ਯਕੀਨਨ ਜਿੱਤੇਗੀ। ਲੀ ਸਾਬਕਾ ਪ੍ਰੋਵਿੰਸ਼ੀਅਲ ਵਿਧਾਇਕ ਹਨ ਜਿਨ੍ਹਾਂ ਨੇ ਲਿਬਰਲਾਂ ਦੀ ਪਹਿਲੀ ਉਮੀਦਵਾਰ ਕੈਰਨ ਵੈਂਗ ਦੀ ਥਾਂ ਲਈ ਹੈ। ਵੈਂਗ ਨੇ ਆਨਲਾਈਨ ਪੋਸਟ ਵਿੱਚ ਖੁਦ ਨੂੰ ਇੱਕਮਾਤਰ ਚੀਨੀ ਉਮੀਦਵਾਰ ਦੱਸਿਆ ਸੀ ਤੇ ਜਗਮੀਤ ਸਿੰਘ ਨੂੰ ਭਾਰਤੀ ਮੂਲ ਦਾ ਦੱਸ ਕੇ ਲੋਕਾਂ ਨੂੰ ਖੁਦ ਨੂੰ ਵੋਟ ਪਾਉਣ ਲਈ ਅਪੀਲ ਕੀਤੀ ਸੀ।
ਇੱਥੇ ਇਹ ਵੀ ਦੱਸਣਾ ਬਣਦਾ ਹੈ ਕਿ 25 ਫਰਵਰੀ ਨੂੰ ਹੋਣ ਵਾਲੀਆਂ ਜਿ਼ਮਨੀ ਚੋਣਾਂ ਐਨਡੀਪੀ ਉਮੀਦਵਾਰ ਜਗਮੀਤ ਸਿੰਘ ਲਈ ਵੀ ਵੱਕਾਰ ਦਾ ਸਵਾਲ ਬਣੀਆਂ ਹੋਈਆਂ ਹਨ। ਐਤਵਾਰ ਸਵੇਰੇ ਉਨ੍ਹਾਂ ਵੈਨਕੂਵਰ ਵਿੱਚ ਸਾਲਾਨਾਂ ਚੀਨੀ ਨਵੇਂ ਸਾਲ ਮੌਕੇ ਹੋਈ ਪਰੇਡ ਵਿੱਚ ਵੀ ਸਿ਼ਰਕਤ ਕੀਤੀ। ਪਰੇਡ ਤੋਂ ਬਾਅਦ ਜਗਮੀਤ ਸਿੰਘ ਨੇ ਟਰੂਡੋ ਤੋਂ ਮੰਗ ਕੀਤੀ ਕਿ ਉਹ ਸਾਬਕਾ ਅਟਾਰਨੀ ਜਨਰਲ ਜੋਡੀ ਵਿਲਸਨ ਰੇਅਬੋਲਡ ਨੂੰ ਐਸਐਨਸੀ-ਲਾਵਾਲਿਨ ਮਾਮਲੇ ਵਿੱਚ ਬੋਲਣ ਦਾ ਮੌਕਾ ਦੇਣ।
ਹਾਲਾਂਕਿ ਗ੍ਰੀਨ ਪਾਰਟੀ ਨੇ ਜਗਮੀਤ ਸਿੰਘ ਖਿਲਾਫ ਕੋਈ ਉਮੀਦਵਾਰ ਖੜ੍ਹਾ ਨਾ ਕਰਨ ਦਾ ਫੈਸਲਾ ਕੀਤਾ ਹੈ ਪਰ ਹੋਰਨਾਂ ਪਾਰਟੀਆਂ ਦਾ ਅਜਿਹਾ ਕੋਈ ਇਰਾਦਾ ਨਹੀਂ ਹੈ। ਕੰਜ਼ਰਵੇਟਿਵ ਜੇਅ ਸਿ਼ਨ ਤੇ ਪੀਪਲਜ਼ ਪਾਰਟੀ ਆਫ ਕੈਨੇਡਾ ਦੀ ਲਾਰਾ ਲਿਨ ਟਾਈਲਰ ਥਾਂਪਸਨ ਵੀ ਸੀਟ ਲਈ ਦਾਅਵੇਦਾਰ ਹਨ।