ਸੰਗਰੂਰ, 8 ਫਰਵਰੀ (ਪੋਸਟ ਬਿਊਰੋ)- ਜ਼ਿਲਾ ਸੰਗਰੂਰ 'ਚ ਚਰਚਾ ਦਾ ਵਿਸ਼ਾ ਬਣੀ ਸ਼ਾਦੀ ਦੇ 67 ਸਾਲਾ ਲਾੜੇ ਅਤੇ 23 ਸਾਲਾ ਲਾੜੀ ਵੱਲੋਂ ਵਿਆਹ ਤੋਂ ਬਾਅਦ ਆਪਣੀ ਸੁਰੱਖਿਆ ਬਾਰੇ ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਵਿੱਚ ਅਰਜ਼ੀ ਪਿੱਛੋਂ ਅਦਾਲਤ ਨੇ ਜ਼ਿਲਾ ਸੰਗਰੂਰ ਅਤੇ ਬਰਨਾਲਾ ਦੇ ਜ਼ਿਲਾ ਪੁਲਸ ਮੁਖੀਆਂ ਨੂੰ ਆਦੇਸ਼ ਦਿੱਤੇ ਹਨ ਕਿ ਨਵ-ਵਿਆਹੇ ਇਸ ਜੋੜੇ ਨੂੰ ਜ਼ਰੂਰਤ ਮੁਤਾਬਕ ਸੁਰੱਖਿਆ ਹਾਸਲ ਕਰਵਾਈ ਜਾਵੇ।
ਮੁੱਦਈ ਧਿਰ ਦੇ ਵਕੀਲ ਮੋਹਿਤ ਸਿਡਾਨਾ ਨੇ ਦੱਸਿਆ ਕਿ ਤਿੰਨ ਕੁ ਹਫਤੇ ਪਹਿਲਾਂ ਸਮਸ਼ੇਰ ਸਿੰਘ (67) ਪਿੰਡ ਬਾਲੀਆਂ (ਧੂਰੀ) ਤੇ ਨਵਪ੍ਰੀਤ ਕੌਰ (23) ਪਿੰਡ ਲੌਂਗੋਵਾਲ ਨੇ ਸ਼ਾਦੀ ਕਰਵਾਈ ਸੀ, ਪਰ ਵਿਆਹ ਤੋਂ ਬਾਅਦ ਇਸ ਨਵ-ਵਿਆਹੀ ਜੋੜੀ ਨੇ ਆਪਣੇ ਕੁਝ ਪਰਵਾਰਕ ਮੈਂਬਰਾਂ ਤੇ ਸਮਾਜ ਦੇ ਲੋਕਾਂ ਤੋਂ ਜਾਨ ਨੂੰ ਖਤਰੇ ਦੇ ਚੱਲਦਿਆਂ ਸੁਰੱਖਿਆ ਲਈ ਅਦਾਲਤ 'ਚ ਫਰਿਆਦ ਕੀਤੀ ਸੀ। ਇਸ ਨੂੰ ਪ੍ਰਵਾਨ ਕਰਦਿਆਂ ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਨੇ ਦੋਵਾਂ ਜ਼ਿਲਾ ਪੁਲਸ ਮੁਖੀਆਂ ਨੂੰ ਆਦੇਸ਼ ਦਿੱਤੇ ਹਨ ਕਿ ਇਨ੍ਹਾਂ ਦੀ ਜਾਨ ਮਾਲ ਦੀ ਸੁਰੱਖਿਆ ਦੇ ਨਾਲ ਇਨ੍ਹਾਂ ਨੂੰ ਕੋਈ ਪ੍ਰੇਸ਼ਾਨ ਨਾ ਕਰ ਸਕੇ, ਇਸ ਲਈ ਦੋਵਾਂ ਨੂੰ ਮੁਨਾਸਿਬ ਸੁਰੱਖਿਆ ਦਿੱਤੀ ਜਾਵੇ।