ਜਲੰਧਰ, 7 ਫਰਵਰੀ (ਪੋਸਟ ਬਿਊਰੋ)- ਪਠਾਨਕੋਟ ਚੌਕ ਨੇੜੇ ਸੰਸਕ੍ਰਿਤੀ ਕੇ ਐੱਮ ਵੀ ਸਕੂਲ ਦੀ ਵਿਦਿਆਰਥਣ ਤਨਵੀ ਮਹਿਤਾ (15) ਨੇ ਮੈਥ ਟੀਚਰ ਵੱਲੋਂ ਤੰਗ ਕਰਨ ਤੋਂ ਦੁਖੀ ਹੋ ਕੇ ਫਾਹਾ ਲੈ ਕੇ ਖੁਦਕੁਸ਼ੀ ਕਰ ਲਈ।
ਕਪੂਰ ਕਲੋਨੀ (ਅਜੀਤ ਨਗਰ) ਦੀ ਰਹਿਣ ਵਾਲੀ ਤਨਵੀ ਦੀ ਖੁਦਕੁਸ਼ੀ ਦਾ ਕੱਲ੍ਹ ਸਵੇਰੇ ਪਤਾ ਲੱਗਾ। ਕਰੀਬ ਸਾਢੇ ਸੱਤ ਵਜੇ ਜਦ ਘਰ ਦੇ ਉਸ ਨੂੰ ਸਕੂਲ ਜਾਣ ਲਈ ਉਠਾਉਣ ਲਈ ਕਮਰੇ ਵਿੱਚ ਗਏ ਤਾਂ ਉਸ ਦੀ ਲਾਸ਼ ਪੱਖੇ ਨਾਲ ਝੂਲ ਰਹੀ ਸੀ। ਖੁਦਕੁਸ਼ੀ ਤੋਂ ਪਹਿਲਾਂ ਉਸ ਨੇ ਤਿੰਨ ਸਫੇ ਦਾ ਸੁਸਾਈਡ ਨੋਟ ਲਿਖਿਆ ਸੀ, ਜਿਸ ਵਿੱਚ ਆਪਣੀ ਮੌਤ ਦੇ ਲਈ ਸਕੂਲ ਦੇ ਮੈਥ ਟੀਚਰ ਨਰੇਸ਼ ਕਪੂਰ ਨੂੰ ਜ਼ਿੰਮੇਵਾਰ ਕਿਹਾ ਹੈ। ਸੂਚਨਾ ਮਿਲਣ ਤੋਂ ਆਈ ਰਾਮਾ ਮੰਡੀ ਪੁਲਸ ਨੇ ਸੁਸਾਈਡ ਨੋਟ ਕਬਜ਼ੇ ਵਿੱਚ ਲੈ ਲਿਆ ਅਤੇ ਇਸ ਦੇ ਬਾਅਦ ਉਨ੍ਹਾਂ ਨੇ ਸਕੂਲ ਦੀ ਮੈਥ ਲੈਬ ਤੋਂ ਟੀਚਰ ਨਰੇਸ਼ ਕਪੂਰ ਨੂੰ ਗ੍ਰਿਫਤਾਰ ਕਰ ਕੇ ਖੁਦਕੁਸ਼ੀ ਲਈ ਮਜਬੂਰ ਕਰਨ ਦਾ ਕੇਸ ਦਰਜ ਕਰ ਲਿਆ। ਸਕੂਲ ਮੈਨੇਜਮੈਂਟ ਨੇ ਮੈਥ ਟੀਚਰ ਨਰੇਸ਼ ਕਪੂਰ ਨੂੰ ਸਸਪੈਂਡ ਕਰ ਦਿੱਤਾ ਹੈ। ਐੱਸ ਐੱਚ ਓ ਜੀਵਨ ਸਿੰਘ ਨੇ ਕਿਹਾ ਕਿ ਸੁਸਾਈਡ ਨੋਟ ਵਿਦਿਆਰਥਣ ਦਾ ਹੀ ਲਿਖਿਆ ਹੈ, ਇਸ ਦੀ ਪੁਸ਼ਟੀ ਲਈ ਇਹ ਨੋਟ ਹੈਂਡਰਾਈਟਿੰਗ ਐਕਸਪਰਟ ਦੇ ਕੋਲ ਫੋਰੈਂਸਿਕ ਲੈਬ ਭੇਜ ਦਿੱਤਾ ਗਿਆ ਹੈ।
ਮੈਥ ਟੀਚਰ 'ਤੇ ਤਨਵੀ ਦੀਆਂ ਸਹੇਲੀਆਂ ਨੇ ਦੋਸ਼ ਲਾਇਆ ਹੈ ਕਿ ਉਹ ਟਿਊਸ਼ਨ ਲਈ ਮਜਬੂਰ ਕਰਦਾ ਸੀ, ਪਰ ਟੀਚਰ ਨੇ ਕਿਹਾ ਕਿ ਤਨਵੀ ਪੜ੍ਹਾਈ ਵਿੱਚ ਕਮਜ਼ੋਰ ਸੀ, ਜਦ ਕਿ ਮਾਤਾ ਪਿਤਾ ਦੇ ਮੁਤਾਬਕ ਉਹ ਪੜ੍ਹਨ ਵਿੱਚ ਚੰਗੀ ਸੀ।