ਬਰੈਂਪਟਨ, 7 ਫਰਵਰੀ (ਪੋਸਟ ਬਿਊਰੋ) : ਬਰੈਂਪਟਨ ਵਿੱਚ ਇੱਕ ਇਮਾਰਤ ਦੀ 11ਵੀਂ ਮੰਜਿ਼ਲ ਉੱਤੇ ਅੱਗ ਲੱਗਣ ਤੋਂ ਬਾਅਦ ਅੱਧੀ ਇਮਾਰਤ ਨੂੰ ਖਾਲੀ ਕਰਵਾ ਲਿਆ ਗਿਆ।
ਕੈਨੇਡੀ ਰੋਡ ਸਾਊਥ ਤੇ ਗਲਿਡਨ ਰੋਡ ਇਲਾਕੇ ਵਿੱਚ ਇੱਕ ਇਮਾਰਤ ਦੀ 11ਵੀਂ ਮੰਜਿ਼ਲ ਉੱਤੇ ਇਹ ਅੱਗ ਲੱਗੀ। ਬਰੈਂਪਟਨ ਪਲਾਟੂਨ ਚੀਫ ਗੌਰਡਨ ਫਾਊਲਰ ਨੇ ਦੱਸਿਆ ਕਿ ਇਮਾਰਤ ਵਿੱਚ ਜਦੋਂ ਅਮਲਾ ਪਹੁੰਚਿਆ ਤਾਂ ਇਮਾਰਤ ਵਿੱਚੋਂ ਕਾਫੀ ਧੂੰਆਂ ਨਿਕਲ ਰਿਹਾ ਸੀ ਤੇ ਇਹ ਪਤਾ ਲੱਗਿਆ ਕਿ ਅੱਗ ਕਿਸੇ ਇਲੈਕਟ੍ਰਿਕ ਪੈਨਲ ਨੂੰ ਲੱਗੀ ਸੀ ਤੇ ਫਿਰ ਵੱਧ ਗਈ।
ਫਾਊਲਰ ਨੇ ਆਖਿਆ ਕਿ ਸ਼ਾਮ ਵੇਲੇ ਪਾਣੀ ਲੀਕ ਹੋਣ ਦੀ ਘਟਨਾ ਵੀ ਵਾਪਰੀ ਸੀ ਤੇ ਹਿਹ ਦੋਵੇਂ ਘਟਨਾਵਾਂ ਇੱਕ ਦੂਜੇ ਨਾਲ ਜੁੜੀਆਂ ਹੋਈਆਂ ਹਨ ਜਾਂ ਨਹੀਂ ਇਸ ਬਾਰੇ ਕੋਈ ਸਪਸ਼ਟ ਜਾਣਕਾਰੀ ਨਹੀਂ ਮਿਲ ਸਕੀ ਹੈ। ਉਨ੍ਹਾਂ ਆਖਿਆ ਕਿ ਅਸੀਂ ਧੂੰਆਂ ਹਟਾਉਣ ਤੋਂ ਬਾਅਦ ਕਿਰਾਏਦਾਰਾਂ ਦੀ ਜਾਂਚ ਕਰ ਰਹੇ ਹਾਂ। 11ਵੀਂ ਮੰਜਿ਼ਲ ਉੱਤੇ ਅੱਗ ਲੱਗਣ ਤੋਂ ਪਹਿਲਾਂ ਲੀਕੇਜ ਇਮਾਰਤ ਦੀ 12ਵੀਂ ਮੰਜਿ਼ਲ ਉੱਤੇ ਸ਼ੁਰੂ ਹੋਈ।
ਅੱਗ ਉੱਤੇ ਕਾਬੂ ਪਾ ਲਿਆ ਗਿਆ ਤੇ ਫਾਇਰਫਾਈਟਰਜ਼ ਇਸ ਸਮੇਂ ਇਮਾਰਤ ਦੀ ਦੂਜੀ ਜਾਂਚ ਕਰ ਰਹੇ ਹਨ। ਇਸ ਤੋਂ ਇਲਾਵਾ ਏਅਰ ਕੁਆਲਿਟੀ ਟੈਸਟ ਵੀ ਕੀਤੇ ਜਾ ਰਹੇ ਹਨ।