ਬੀਜਿੰਗ, 6 ਫਰਵਰੀ (ਪੋਸਟ ਬਿਊਰੋ)- ਚੀਨ ਵਿੱਚ ਮਹਿੰਗੇ ਹੁੰਦੇ ਵਿਆਹ ਲੋਕਾਂ ਦੇ ਨਾਲ ਪ੍ਰਸ਼ਾਸਨ ਲਈ ਵੀ ਸਿਰਦਰਦੀ ਬਣ ਗਏ ਹਨ। ਇਸ ਨਾਲ ਨਿਪਟਣ ਲਈ ਮੱਧ ਹੇਨਾਨ ਸੂਬੇ ਦੇ ਪਿਊਆਂਗ ਪ੍ਰਸ਼ਾਸਨ ਨੇ ਗਾਈਡਲਾਈਨ ਜਾਰੀ ਕੀਤੀ ਹੈ। ਇਸ ਦੇ ਤਹਿਤ ਵਿਆਹ ਦੇ ਤੋਹਫੇ, ਮਹਿਮਾਨਾਂ ਦੀ ਗਿਣਤੀ ਅਤੇ ਰਿਸੈਪਸ਼ਨ 'ਤੇ ਹੁੰਦਾ ਖਰਚ ਤੈਅ ਕਰ ਦਿੱਤਾ ਹੈ। ਇਹ ਵੀ ਕਿਹਾ ਹੈ ਕਿ ਇਸ ਤੋਂ ਵੱਧ ਖਰਚ ਕਰਨ 'ਤੇ ਕਾਨੂੰਨੀ ਕਾਰਵਾਈ ਕੀਤੀ ਜਾਏਗੀ।
ਲੜਕੀਆਂ ਦੀ ਗਿਣਤੀ ਘੱਟ ਹੋਣਾ ਮਹਿੰਗੇ ਵਿਆਹਾਂ ਦਾ ਸਭ ਤੋਂ ਵੱਡਾ ਕਾਰਨ ਹੈ। ਚੀਨ ਵਿੱਚ 100 ਔਰਤਾਂ 'ਤੇ 115 ਮਰਦ ਹਨ। ਇਸ ਕਾਰਨ ਲੜਕਿਆਂ ਨੂੰ ਜੀਵਨ ਸਾਥੀ ਮਿਲਣਾ ਮੁਸ਼ਕਲ ਹੁੰਦਾ ਹੈ। ਵਿਆਹ ਹੋਣ 'ਤੇ ਉਨ੍ਹਾਂ ਨੂੰ ਲਾੜੀ ਦੇ ਲਈ ਮਹਿੰਗੇ ਤੋਹਫੇ ਖਰੀਦਣੇ ਪੈਂਦੇ ਹਨ ਅਤੇ ਕਾਫੀ ਪੈਸਾ ਖਰਚ ਕਰਨਾ ਪੈਂਦਾ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਸ ਫੈਸਲੇ ਦਾ ਮਕਸਦ ਦਾਜ 'ਤੇ ਰੋਕ ਲਾਉਣਾ ਹੈ। ਵਿਆਹ ਵਿੱਚ ਦਿੱਤੇ ਜਾ ਰਹੇ ਤੋਹਫਿਆਂ ਦੀ ਰਕਮ ਤੈਅ ਕਰ ਦਿੱਤੀ ਗਈ ਹੈ। ਦਿਹਾਤੀ ਇਲਾਕਿਆਂ ਵਿੱਚ 3.20 ਲੱਖ ਅਤੇ ਸ਼ਹਿਰੀ ਸਰਕਾਰੀ ਮੁਲਾਜ਼ਮਾਂ ਲਈ ਸਵਾ ਦੋ ਲੱਖ ਰੁਪਏ ਦੀ ਰਾਸ਼ੀ ਤੈਅ ਹੋ ਗਈ ਹੈ। ਪਰਵਾਰਾਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਉਹ ਵਿਆਹਾਂ ਦੇ ਰਿਸੈਪਸ਼ਨ ਵਿੱਚ ਵੱਧ ਤੋਂ ਵੱਧ 15 ਟੇਬਲ ਰੱਖਣ। ਖਾਣੇ ਦੀ ਲਾਗਤ ਪ੍ਰਤੀ ਟੇਬਲ ਤਿੰਨ ਹਜ਼ਾਰ ਰੁਪਏ ਤੋਂ ਵੱਧ ਨਹੀਂ ਹੋਣੀ ਚਾਹੀਦੀ।