ਚੰਡੀਗੜ੍ਹ, 5 ਫਰਵਰੀ (ਪੋਸਟ ਬਿਊਰੋ)- ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਤੇ ਗੁਰਦਾਸਪੁਰ ਤੋਂ ਪਾਰਲੀਮੈਂਟ ਮੈਂਬਰ ਸੁਨੀਲ ਜਾਖੜ ਨੂੰ ਘੇਰਨ ਲਈ ਭਾਰਤੀ ਜਨਤਾ ਪਾਰਟੀ ਕਿਸੇ ਵੱਡੇ ਉਮੀਦਵਾਰ ਦੀ ਭਾਲ ਕਰ ਰਹੀ ਹੈ। ਇਸ ਸੀਟ ਤੋਂ ਚਾਰ ਵਾਰ ਪਾਰਲੀਮੈਂਟ ਮੈਂਬਰ ਰਹੇ ਫਿਲਮੀ ਅਦਾਕਾਰ ਵਿਨੋਦ ਖੰਨਾ ਦੇ ਦੇਹਾਂਤ ਪਿੱਛੋਂ ਹੋਈ ਉਪ ਚੋਣ 'ਚ ਭਾਜਪਾ ਨੇ ਏਥੋਂ ਸਵਰਨ ਸਲਾਰੀਆ ਨੂੰ ਟਿਕਟ ਦਿੱਤੀ ਸੀ, ਪਰ ਬੁਰੀ ਤਰ੍ਹਾਂ ਹਾਰ ਗਏ ਸਨ। ਭਾਜਪਾ ਇਹ ਗਲਤੀ ਦੁਹਰਾਉਣਾ ਨਹੀਂ ਚਾਹੁੰਦੀ। ਚਰਚਾ ਹੈ ਕਿ ਇਥੋਂ ਭਾਜਪਾ ਵਿਨੋਦ ਖੰਨਾ ਦੇ ਪੁੱਤਰ ਅਕਸ਼ੈ ਖੰਨਾ ਨੂੰ ਮੈਦਾਨ ਵਿੱਚ ਉਤਾਰ ਸਕਦੀ ਹੈ।
ਵਿਨੋਦ ਖੰਨਾ ਦੀ ਪਹਿਲੀ ਪਤਨੀ ਗੀਤਾਂਜਲੀ ਦੇ ਦੋ ਪੁੱਤਰ ਅਕਸ਼ੈ ਤੇ ਰਾਹੁਲ ਖੰਨਾ ਹਨ। ਭਾਜਪਾ ਮੰਨ ਰਹੀ ਹੈ ਕਿ ਸੁਨੀਲ ਜਾਖੜ ਵੱਡੇ ਆਗੂ ਹਨ। ਇਸ ਲਈ ਉਨ੍ਹਾਂ ਨੂੰ ਹਰਾਉਣ ਲਈ ਖਾਸ ਚਿਹਰਾ ਚਾਹੀਦਾ ਹੈ। ਮਰਹੂਮ ਵਿਨੋਦ ਖੰਨਾ ਦੀ ਪਤਨੀ ਕਵਿਤਾ ਖੰਨਾ ਇਸ ਸੀਟ ਤੋਂ ਟਿਕਟ ਦੀ ਸਭ ਤੋਂ ਵੱਡੀ ਦਾਅਵੇਦਾਰ ਹੈ ਅਤੇ ਤਿੰਨ ਜਨਵਰੀ ਨੂੰ ਕਰਤਾਰਪੁਰ ਕਾਰੀਡੋਰ ਬਾਰੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਗੁਰਦਾਸਪੁਰ ਵਿੱਚ ਹੋਈ ਧੰਨਵਾਦ ਰੈਲੀ ਵੇਲੇ ਵੀ ਉਹ ਪ੍ਰਭਾਵੀ ਨਜ਼ਰ ਆਈ ਸੀ। ਪ੍ਰਧਾਨ ਮੰਤਰੀ ਮੋਦੀ ਨੇ ਵੀ ਉਨ੍ਹਾਂ ਨੂੰ ਕਾਫੀ ਤਵੱਜੋ ਦਿੱਤੀ, ਪਰ ਭਾਜਪਾ ਦੀ ਚਿੰਤਾ ਇਹ ਹੈ ਕਿ ਕਵਿਤਾ ਖੰਨਾ ਬਾਰੇ ਗੁਰਦਾਸਪੁਰ 'ਚ ਖਿੱਚੋਤਾਣ ਦਾ ਅਸਰ ਲੋਕ ਸਭਾ ਚੋਣਾਂ ਉੱਤੇ ਪੈ ਸਕਦਾ ਹੈ। ਇਸੇ ਲਈ ਅਕਸ਼ੈ ਖੰਨਾ ਨੂੰ ਮੈਦਾਨ 'ਚ ਉਤਾਰਿਆ ਜਾ ਸਕਦਾ ਹੈ। ਵਿਨੋਦ ਖੰਨਾ ਦਾ ਪੁੱਤਰ ਹੋਣ ਕਾਰਨ ਉਨ੍ਹਾਂ ਨੂੰ ਹਮਦਰਦੀ ਦਾ ਲਾਭ ਮਿਲ ਸਕਦਾ ਹੈ। ਪਿਤਾ ਦੀ ਵਿਰਾਸਤ ਤਾਂ ਉਹ ਸੰਭਾਲਣਗੇ ਹੀ, ਉਨ੍ਹਾਂ ਦੇ ਕਾਰਨ ਪਾਰਟੀ ਨੂੰ ਧੜੇਬਾਜ਼ੀ ਦੀ ਸਮੱਸਿਆ ਤੋਂ ਵੀ ਨਿਜਾਤ ਮਿਲੇਗੀ।
ਭਾਜਪਾ ਦੇ ਸੀਨੀਅਰ ਆਗੂ ਮੰਨਦੇ ਹਨ ਕਿ ਜੇ ਅਕਸ਼ੈ ਖੰਨਾ ਚੋਣ ਮੈਦਾਨ 'ਚ ਆਏ ਤਾਂ ਸੁਨੀਲ ਜਾਖੜ ਨੂੰ ਇਸ ਸੀਟ 'ਤੇ ਘੇਰਿਆ ਜਾ ਸਕਦਾ ਹੈ। ਜਾਖੜ ਕਾਂਗਰਸ ਦੇ ਸੂਬਾ ਪ੍ਰਧਾਨ ਵੀ ਹਨ ਤੇ ਸਾਹਮਣੇ ਇਕ ਮਜ਼ਬੂਤ ਚਿਹਰਾ ਆਉਣ 'ਤੇ ਕਾਂਗਰਸ ਦਾ ਫੋਕਸ ਗੁਰਦਾਸਪੁਰ ਹੋ ਜਾਵੇਗਾ। ਇਸ ਦਾ ਸੂਬੇ ਦੀਆਂ ਬਾਕੀ ਸੀਟਾਂ 'ਤੇ ਵੀ ਅਸਰ ਹੋਵੇਗਾ, ਕਿਉਂਕਿ ਕਾਂਗਰਸ ਗੁਰਦਾਸਪੁਰ 'ਚ ਉਲਝ ਜਾਵੇਗੀ।