ਓਟਵਾ, 5 ਫਰਵਰੀ (ਪੋਸਟ ਬਿਊਰੋ) : ਫੈਡਰਲ ਸਰਕਾਰ ਮੂਲਵਾਸੀ ਕੈਨੇਡੀਅਨਾਂ ਨਾਲ ਸੁਲ੍ਹਾ ਉੱਤੇ ਧਿਆਨ ਕੇਂਦਰਿਤ ਕਰਕੇ 30 ਸਤੰਬਰ ਨੂੰ ਨਵੀਂ ਵੈਧਾਨਿਕ ਛੁੱਟੀ ਐਲਾਨਣਾ ਚਾਹੁੰਦੀ ਹੈ।
30 ਸਤੰਬਰ ਨੂੰ ਆਰੇਂਜ ਸ਼ਰਟ ਡੇਅ ਵਜੋਂ ਜਾਣਿਆ ਜਾਂਦਾ ਹੈ। ਇਹ ਦਿਨ ਰੈਜ਼ੀਡੈਂਸ਼ੀਅਲ ਸਕੂਲਾਂ ਵਿੱਚ ਵਿਦਿਆਰਥੀਆਂ ਦੇ ਤਜਰਬੇ ਕਾਰਨ ਖਾਸ ਮੰਨਿਆ ਜਾਂਦਾ ਹੈ। ਇਸ ਦਿਨ ਦਾ ਨਾਂ ਇਸ ਲਈ ਆਰੇਂਜ ਸ਼ਰਟ ਡੇਅ ਪਿਆ ਕਿਉਂਕਿ ਫਿਲੀਜ਼ ਵੈਬਸਟੈਡ ਨਾਂ ਦੀ ਇੱਕ ਸਾਬਕਾ ਵਿਦਿਆਰਥਣ ਨੂੰ ਉਸ ਦੀ ਦਾਦੀ ਵੱਲੋਂ ਦਿੱਤੀ ਗਈ ਚਮਕਦਾਰ ਆਰੇਂਜ ਸ਼ਰਟ ਰੈਜ਼ੀਡੈਂਸ਼ੀਅਲ ਸਕੂਲ ਵਿੱਚ ਉਸ ਦੇ ਪਹਿਲੇ ਦਿਨ ਹੀ ਉਸ ਤੋਂ ਲੈ ਲਈ ਗਈ ਸੀ।
ਜੇ ਇਹ ਪ੍ਰਸਤਾਵ ਪਾਰਲੀਆਮੈਂਟ ਵਿੱਚ ਪਾਸ ਹੋ ਜਾਂਦਾ ਹੈ ਤਾਂ 30 ਸਤੰਬਰ ਨੂੰ ਸੱਚ ਤੇ ਸੁਲ੍ਹਾ ਲਈ ਕੌਮੀ ਦਿਵਸ ਵਜੋਂ ਮਨਾਇਆ ਜਾਵੇਗਾ। ਲਿਬਰਲ ਐਮਪੀ ਰੈਂਡੀ ਬੌਇਸਨੌਲਟ ਨੇ ਦੱਸਿਆ ਕਿ ਸਰਕਾਰ ਸਰਵਾਈਵਰਜ਼, ਪਰਿਵਾਰਾਂ ਤੇ ਮੂਲਵਾਸੀ ਕਮਿਊਨਿਟੀਜ਼ ਦੇ ਸਨਮਾਨ ਵਿੱਚ ਇਸ ਦਿਨ ਨੂੰ ਫੈਡਰਲ ਛੁੱਟੀ ਵਜੋਂ ਮਨਾਉਣਾ ਚਾਹੁੰਦੀ ਹੈ।