ਟੋਰਾਂਟੋ, 5 ਫਰਵਰੀ (ਪੋਸਟ ਬਿਊਰੋ) : ਓਨਟਾਰੀਓ ਦੀ ਨਵੀਂ ਸੁਪਰ ਹੈਲਥ ਏਜੰਸੀ ਲਈ ਯੋਜਨਾਵਾਂ ਚੱਲ ਰਹੀਆਂ ਹਨ।
17 ਜਨਵਰੀ ਨੂੰ ਸਿਹਤ ਮੰਤਰੀ ਕ੍ਰਿਸਟੀਨ ਐਲੀਅਟ ਵੱਲੋਂ ਦਸਤਖ਼ਤ ਕੀਤੇ ਗਏ ਹੁਕਮਾਂ ਅਨੁਸਾਰ ਪ੍ਰੋਵਿੰਸ ਵੱਲੋਂ ਕ੍ਰਾਊਨ ਕਾਰਪੋਰੇਸ਼ਨ ਕਾਇਮ ਕੀਤੀ ਜਾ ਰਹੀ ਹੈ ਜਿਸ ਨੂੰ ਹੈਲਥ ਪ੍ਰੋਗਰਾਮ ਇਨੀਸਿ਼ਏਟਿਵ ਆਖਿਆ ਜਾਵੇਗਾ। ਇਹ ਕਾਰਪੋਰੇਸ਼ਨ ਫੋਰਡ ਸਰਕਾਰ ਦੇ ਹੈਲਥਕੇਅਰ ਸੁਧਾਰਾਂ ਉੱਤੇ ਨਜ਼ਰ ਰੱਖੇਗੀ। ਇਸ ਸਬੰਧੀ ਸਰਕਾਰ ਦਾ ਅਹਿਮ ਪਲੈਨਿੰਗ ਦਸਤਾਵੇਜ਼ ਪਹਿਲਾਂ ਐਨਡੀਪੀ ਕੋਲ ਵੀ ਲੀਕ ਹੋ ਚੁੱਕਿਆ ਹੈ।
ਇਹ ਕ੍ਰਾਊਨ ਕਾਰਪੋਰੇਸ਼ਨ ਕਈ ਹੋਰਨਾਂ ਏਜੰਸੀਆਂ ਜਿਵੇਂ ਕਿ ਕੈਂਸਰ ਕੇਅਰ ਓਨਟਾਰੀਓ, ਈ-ਹੈਲਥ ਤੇ 14 ਲੋਕਲ ਹੈਲਥ ਇੰਟੀਗ੍ਰੇਸ਼ਨ ਨੈੱਟਵਰਕਸ ਦੇ ਅਵਸੇ਼ਸ਼ਾਂ ਨੂੰ ਮਿਲਾ ਕੇ ਕਾਇਮ ਕੀਤੀ ਗਈ ਹੈ। ਇਹ ਸੁਪਰ ਏਜੰਸੀ ਹੈਲਥ ਕੇਅਰ ਪਲੈਨਿੰਗ ਤੇ ਲੇਬਰ ਸਬੰਧਾਂ ਦੀ ਡਲਿਵਰੀ, ਵਸੂਲੀ ਤੇ ਵਿੱਤੀ ਮੈਨੇਜਮੈਂਟ ਤੱਕ ਸੱਭ ਕਾਸੇ ਲਈ ਜਿ਼ੰਮੇਵਾਰ ਰਹੇਗੀ।
ਮੰਤਰੀ ਮੰਡਲ ਦੇ ਹੁਕਮਾਂ ਅਨੁਸਾਰ ਤਿੰਨ ਉੱਚ ਪੱਧਰੀ ਸਿਵਲ ਸਰਵੈਂਟਸ ਨੂੰ ਇਸ ਨਵੀਂ ਸਿਰਜੀ ਏਜੰਸੀ ਵਿੱਚ ਨਿਯੁਕਤ ਕੀਤਾ ਗਿਆ ਪਰ ਸੀਨੀਅਰ ਸਰਕਾਰੀ ਸੂਤਰਾਂ ਅਨੁਸਾਰ ਇਨ੍ਹਾਂ ਦਾ ਕਾਰਜਕਾਲ ਸਥਾਈ ਨਹੀਂ ਹੋਵੇਗਾ। ਪ੍ਰੀਮੀਅਰ ਦੇ ਆਫਿਸ ਵੱਲੋਂ ਇਸ ਯੋਜਨਾ ਦੀ ਨਾ ਤਾਂ ਪੁਸਟੀ ਕੀਤੀ ਗਈ ਤੇ ਨਾ ਹੀ ਇਸ ਤੋਂ ਇਨਕਾਰ ਕੀਤਾ ਗਿਆ।