* ਸੁਰੱਖਿਆ ਕਾਰਨਾਂ ਹੇਠ ਲੱਗੀ ਰੋਕ ਤੋਂ ਭਾਰਤੀ ਲੋਕ ਪ੍ਰਭਾਵਤ
ਲੰਡਨ, 4 ਫਰਵਰੀ, (ਪੋਸਟ ਬਿਊਰੋ)- ਸਕਿਓਰਟੀ ਦੇ ਕਾਰਨ ਹੇਠ ਤੁਰਕਮੇਨਿਸਤਾਨ ਏਅਰਲਾਈਨਜ਼ ਦੀਆਂ ਉਡਾਣਾਂ ਨੂੰ ਬ੍ਰਿਟੇਨ ਨੇ ਸਸਪੈਂਡ ਕਰਨ ਦਾ ਐਲਾਨ ਕੀਤਾ ਅਤੇ ਕਿਹਾ ਹੈ ਕਿ ਇਹ ਫ਼ੈਸਲਾ 28 ਦੇਸ਼ਾਂ ਦੇ ਸੰਗਠਨ ਯੂਰਪੀ ਯੂਨੀਅਨ (ਈ ਯੂ) ਨੇ ਕੀਤਾ ਹੈ। ਯੂਰਪੀ ਯੂਨੀਅਨ ਦੇ ਇਸ ਅਚਾਨਕ ਹੋਏ ਫ਼ੈਸਲੇ ਦਾ ਅਸਰ ਭਾਰਤ ਤੋਂ ਸ਼ੁਰੂ ਹੋਣ ਵਾਲੀਆਂ ਕੁਝ ਨਵੀਂਆਂ ਅਤੇ ਸਸਤੀਆਂ ਹਵਾਈ ਸੇਵਾ ਦੀਆਂ ਉਡਾਣਾਂ `ਤੇ ਵੀ ਪਵੇਗਾ।
ਬ੍ਰਿਟੇਨ ਦੇ ਵਿਦੇਸ਼ ਅਤੇ ਕਾਮਨਵੈੱਲਥ ਬਾਰੇ ਦਫ਼ਤਰ ਨੇ ਕਿਹਾ ਹੈ ਕਿ ਯੂਰਪੀਅਨ ਏਵੀਏਸ਼ਨ ਸੇਫਟੀ ਏਜੰਸੀ ਨੇ ਤੁਰਕਮੇਨਿਸਤਾਨ ਏਅਰਲਾਈਨਜ਼ ਦੀਆਂ ਉਡਾਣਾਂ ਨੂੰ ਸਸਪੈਂਡ ਕਰਨ ਨੂੰ ਕਿਹਾ ਹੈ। ਇਸ ਫੈਸਲੇ ਦੇ ਨਾਲ ਅੰਮ੍ਰਿਤਸਰ ਤੋਂ ਬਰਮਿੰਘਮ ਅਤੇ ਲੰਡਨ ਦੇ ਹੀਥਰੋ ਏਅਰਪੋਰਟ ਲਈ ਇਸ ਏਅਰਲਾਈਨ ਦੀ ਉਡਾਣ ਵੀ ਸਸਪੈਂਡ ਹੋ ਜਾਵੇਗੀ ਤੇ ਨਵੀਂ ਦਿੱਲੀ ਤੋਂ ਹੀਥਰੋ ਏਅਰਪੋਰਟ ਤੱਕ ਇਸ ਦੀ ਉਡਾਣ ਵੀ ਰੁਕ ਜਾਵੇਗੀ। ਇਹ ਉਡਾਣ ਤੁਰਕਮੇਨਿਸਤਾਨ ਦੀ ਰਾਜਧਾਨੀ ਅਸ਼ਗਾਬਾਦ ਹੁੰਦੇ ਹੋਏ ਪਹੁੰਚਦੀ ਸੀ। ਪੰਜਾਬ ਦੇ ਮੁਸਾਫਰਾਂ ਨੂੰ ਬ੍ਰਿਟੇਨ ਦੀ ਯਾਤਰਾ ਲਈ ਇਹ ਹਵਾਈ ਸੇਵਾ ਸਭ ਤੋਂ ਵੱਧ ਸਸਤੀ ਪੈਂਦੀ ਸੀ। ਯੂਰਪੀ ਯੂਨੀਅਨ ਦੀ ਏਜੰਸੀ ਨੇ ਇਹ ਕਾਰਵਾਈ ਹਵਾਈ ਯਾਤਰਾ ਲਈ ਜ਼ਰੂਰੀ ਕੌਮਾਂਤਰੀ ਸੁਰੱਖਿਆ ਸਟੈਂਡਰਜ਼ ਪੂਰੇ ਨਾ ਹੋਣ ਦੇ ਬਾਅਦ ਕੀਤੀ ਦੱਸੀ ਹੈ।
ਕਿਸੇ ਸਮੇਂ ਸੋਵੀਅਤ ਯੂਨੀਅਨ ਦਾ ਹਿੱਸਾ ਰਹੇ ਤੁਰਕਮੇਨਿਸਤਾਨ ਨੇ ਵੱਖਰੇ ਹੋਣ ਮਗਰੋਂ ਸਾਲ 1992 ਵਿੱਚ ਇਹ ਏਅਰਲਾਈਨ ਕੰਪਨੀ ਸ਼ੁਰੂ ਕੀਤੀ ਸੀ। ਯੂਰਪੀਨ ਏਜੰਸੀ ਦੇ ਫ਼ੈਸਲੇ ਨਾਲ ਇਸ ਏਅਰਲਾਈਨ ਦੀਆਂ ਬ੍ਰਿਟੇਨ, ਫਰਾਂਸ ਤੇ ਜਰਮਨੀ ਦੀਆਂ ਉਡਾਣਾਂ ਪ੍ਰਭਾਵਤ ਹੋਣਗੀਆਂ ਹਨ। ਬ੍ਰੈਗਜ਼ਿਟ ਦੇ ਆਪਣੇ ਪੱਕੇ ਫੈਸਲੇ ਪਿੱਛੋਂ ਵੀ 29 ਮਾਰਚ ਤਕ ਬ੍ਰਿਟੇਨ ਹਾਲੇ ਤੱਕ ਯੂਰਪੀ ਯੂਨੀਅਨ ਦਾ ਮੈਂਬਰ ਹੈ। ਇਸੇ ਲਈ ਯੂਰਪੀ ਯੂਨੀਅਨ ਦੇ ਫ਼ੈਸਲੇ ਉਸ ਉੱਤੇ ਲਾਗੂ ਹੁੰਦੇ ਹਨ।