ਟੋਕੀਓ, 3 ਫਰਵਰੀ (ਪੋਸਟ ਬਿਊਰੋ)- ਜਾਪਾਨ 'ਚ ਇੱਕ ਦੁਰਲੱਭ ਮੱਛੀ ਓਰਫਿਸ਼ ਵਿਖਾਈ ਦੇਣ ਦੇ ਨਾਲ ਹੀ ਲੋਕਾਂ 'ਚ ਤਬਾਹ ਕਰਨ ਵਾਲੇ ਭੂਚਾਲ ਅਤੇ ਸੁਨਾਮੀ ਬਾਰੇ ਡਰ ਦਾ ਮਾਹੌਲ ਬਣ ਗਿਆ ਹੈ। ਲੋਕਾਂ ਦਾ ਮੰਨਣਾ ਹੈ ਕਿ ਗਹਿਰੇ ਸਮੁੰਦਰ ਵਿੱਚ ਮਿਲਣ ਵਾਲੀਆਂ ਇਨ੍ਹਾਂ ਮੱਛੀਆਂ ਦਾ ਬਾਹਰ ਆਉਣਾ ਭੂਚਾਲ ਤੇ ਸੁਨਾਮੀ ਦੀਆਂ ਸੂਚਕ ਹੈ।
ਖਬਰ ਏਜੰਸੀ ਸੀ ਐੱਨ ਐੱਨ ਦੇ ਮੁਤਾਬਕ ਟੋਯਾਮਾ ਸੂਬੇ ਦੇ ਤੱਟੀ ਇਲਾਕੇ ਵਿੱਚ ਬੀਤੇ ਸ਼ੁੱਕਰਵਾਰ ਜਾਲ ਵਿੱਚ ਦੋ ਓਰਫਿਸ਼ ਮੱਛੀਆਂ ਫਸ ਗਈਆਂ। ਇਸ ਸੀਜ਼ਨ 'ਚ ਹਾਲੇ ਤੱਕ ਕੁੱਲ ਸੱਤ ਓਰਫਿਸ਼ ਮਿਲ ਚੁੱਕੀਆਂ ਹਨ। ਇਸ ਹਫਤੇ ਦੇ ਸ਼ੁਰੂ ਵਿੱਚ 3.2 ਮੀਟਰ ਲੰਬੀ ਇੱਕ ਓਰਫਿਸ਼ ਰੁੜ੍ਹ ਕੇ ਟੋਯਾਮਾ ਬੇ ਤਟ ਉਤੇ ਪਹੁੰਚੀ ਸੀ ਅਤੇ ਚਾਰ ਮੀਟਰ ਲੰਬੀ ਇੱਕ ਹੋਰ ਓਰਫਿਸ਼ ਇਮਿਜੂ ਇਲਾਕੇ ਵਿੱਚ ਜਾਲ 'ਚ ਫਸੀ ਸੀ। ਓਰਫਿਸ਼ ਮੱਛੀਆਂ ਸਮੰੁਦਰ 'ਚ 200 ਮੀਟਰ ਤੋਂ ਲੈ ਕੇ ਇੱਕ ਹਜ਼ਾਰ ਮੀਟਰ ਦੀ ਡੂੰਘਾਈ 'ਚ ਰਹਿੰਦੀਆਂ ਹਨ। ਇਨ੍ਹਾਂ ਦੀ ਚਮੜੀ ਚਾਂਦੀ ਵਾਂਗ ਚਮਕੀਲੀ ਹੁੰਦੀ ਹੈ।
ਉਜੂ ਅਕੁਏਰੀਅਮ ਦੇ ਮੁਖੀ ਕਾਜੂਸਾ ਸੈਬਾ ਨੇ ਕਿਹਾ, ਇਸ ਅਨੁਮਾਨ ਦਾ ਕੋਈ ਵਿਗਿਆਨਕ ਸਬੂਤ ਨਹੀਂ ਹੈ ਕਿ ਓਰਫਿਸ਼ ਦਾ ਨਜ਼ਰ ਆਉਣਾ ਕਿਸੇ ਵੱਡੇ ਭੂਚਾਲ ਦਾ ਸੰਕੇਤ ਹੈ, ਪਰ ਅਸੀਂ ਇਸ ਨੂੰ ਪੂਰੀ ਤਰ੍ਹਾਂ ਰੱਦ ਨਹੀਂ ਕਰ ਸਕਦੇ। ਇਨ੍ਹਾਂ ਦੇ ਦਿਸਣ ਦੀ ਇੱਕ ਵਜ੍ਹਾ ਗਲੋਬਲ ਵਾਰਮਿੰਗ ਵੀ ਹੋ ਸਕਦੀ ਹੈ। ਕਿਓਦੋ ਨਿਊਜ਼ ਮੁਤਾਬਕ 2011 ਵਿੱਚ ਆਏ ਫੁਕੂਸ਼ੀਮਾ ਭੂਚਾਲ ਤੋਂ ਕੁਝ ਸਮਾਂ ਪਹਿਲਾਂ ਇੱਕ ਦਰਜਨ ਓਰਫਿਸ਼ ਰੁੜ੍ਹ ਕੇ ਜਾਪਾਨ ਦੇ ਤਟ 'ਤੇ ਪਹੁੰਚੀਆਂ ਸਨ। ਇਸ ਭੂਚਾਲ ਕਾਰਨ ਸੁਨਾਮੀ ਆਈ ਸੀ ਜਿਸ 'ਚ ਕਰੀਬ 20 ਹਜ਼ਾਰ ਲੋਕਾਂ ਦੀ ਮੌਤ ਹੋਈ ਸੀ।