ਨਵੀਂ ਪੀੜ੍ਹੀ ਦੀਆਂ ਬਾਲੀਵੁੱਡ ਅਭਿਨੇਤਰੀਆਂ 'ਚੋਂ ਆਲੀਆ ਭੱਟ ਨੂੰ ਸਭ ਤੋਂ ਵਰਸਟਾਈਲ (ਮਲਟੀ ਟੈਲੇਂਟਿਡ) ਅਭਿਨੇਤਰੀ ਮੰਨਿਆ ਜਾਂਦਾ ਹੈ ਤਾਂ ਇਸ ਪਿੱਛੇ ਹਰ ਭੂਮਿਕਾ ਵਿੱਚ ਉਸ ਦੀ ਡੂੰਘਾਈ ਤੱਕ ਸਮਾ ਜਾਣ ਦੀ ਅਦਭੁੱਤ ਤਾਕਤ ਹੈ। ਆਪਣੀਆਂ ਫਿਲਮਾਂ ਵਿੱਚ ਨਵੇਂ ਅੰਦਾਜ਼ ਲਈ ਜਾਣੀ ਜਾਂਦੀ ਆਲੀਆ ਉਨ੍ਹਾਂ ਅਭਿਨੇਤਰੀਆਂ ਤੋਂ ਇਕਦਮ ਵੱਖਰੀ ਹੈ, ਜੋ ਸਿਰਫ ਆਪਣੀ ਗਲੈਮਰਸ ਲੁਕ 'ਚ ਹੀ ਆਨਸਕਰੀਨ ਤੇ ਆਫ ਸਕਰੀਨ ਨਜ਼ਰ ਆਉਂਦੀਆਂ ਹਨ। ਆਲੀਆ ਇਸ ਤੋਂ ਬਹੁਤ ਵੱਖਰੀ ਹੈ ਤੇ ਅਜਿਹੀਆਂ ਹੀ ਖੂਬੀਆਂ ਦੀ ਬਦੌਲਤ ਅੱਜ ਹਰ ਨਿਰਮਾਤਾ-ਨਿਰਦੇਸ਼ਕ ਕਿਸੇ ਵੀ ਤਰ੍ਹਾਂ ਦੇ ਰੋਲ ਲਈ ਉਸ 'ਤੇ ਪੂਰਾ ਭਰੋਸਾ ਕਰਦਾ ਹੈ।
ਇਹੀ ਵਜ੍ਹਾ ਹੈ ਕਿ ਉਸ ਨੂੰ ਇੰਡਸਟਰੀ ਦੀ ਨੰਬਰ ਵਨ ਹੀਰੋਇਨ ਵੀ ਕਿਹਾ ਜਾਣ ਲੱਗਾ ਹੈ। ਹਾਲਾਂਕਿ ਉਹ ਖੁਦ ਅਜਿਹੀਆਂ ਗੱਲਾਂ ਅਤੇ ਕਿਸੇ ਵੀ ਹੋਰ ਹੀਰੋਇਨ ਨਾਲ ਆਪਣੀ ਤੁਲਨਾ ਨਾਲ ਬਿਲਕੁਲ ਵੀ ਸਹਿਮਤ ਨਹੀਂ ਅਤੇ ਖੁਦ ਨੂੰ ਨੰਬਰ ਗੇਮ ਤੋਂ ਬਾਹਰ ਮੰਨਦੀ ਹੈ। ਉਹ ਕਹਿੰਦੀ ਹੈ, ‘‘ਮੈਂ ਖੁਦ ਨੂੰ ਕਦੇ ਨੰਬਰ ਵਨ ਨਹੀਂ ਮੰਨਿਆ। ਮੇਰੀ ਰਾਏ ਵਿੱਚ ਦੀਪਿਕਾ ਨੰਬਰ ਵਨ ਹੈ। ਮੈਨੂੰ ਜ਼ੀਰੋ ਨੰਬਰ ਵੀ ਮਿਲੇ ਤਾਂ ਕੋਈ ਇਤਰਾਜ਼ ਨਹੀਂ ਹੋਵੇਗਾ। ਮੇਰਾ ਮਕਸਦ ਸਿਰਫ ਚੰਗੀਆਂ ਫਿਲਮਾਂ ਤੇ ਦਮਦਾਰ ਰੋਲ ਕਰਨਾ ਹੀ ਹੈ।”