ਸਾਲ 2017 ਵਿੱਚ ਹਿੱਟ ਫਿਲਮ ‘ਬਰੇਲੀ ਕੀ ਬਰਫੀ’ ਦੇਣ ਵਾਲੀ ਕ੍ਰਿਤੀ ਸਨਨ ਸਾਲ 2018 ਵਿੱਚ ਸਿਰਫ ਫਿਲਮ ‘ਇਸਤਰੀ’ ਵਿੱਚ ਇੱਕ ਆਈਟਮ ਨੰਬਰ ‘ਆਓ ਕਭੀ ਹਵੇਲੀ ਪੇ...’ ਵਿਚ ਨਜ਼ਰ ਆਈ ਸੀ। ਬੇਸ਼ੱਕ ਪਿਛਲੇ ਸਾਲ ਬਤੌਰ ਹੀਰੋਇਨ ਉਸ ਦੀ ਕੋਈ ਫਿਲਮ ਰਿਲੀਜ਼ ਨਾ ਹੋਈ, ਪਰ ਇਸ ਸਮੇਂ ਉਸ ਦੀ ਝੋਲੀ ਫਿਲਮਾਂ ਨਾਲ ਪੂਰੀ ਤਰ੍ਹਾਂ ਭਰੀ ਹੋਈ ਹੈ ਤੇ ਉਸ ਦੇ ਪਿਛਲੇ ਸਾਲ ਵੱਡਾ ਹਿੱਸਾ ਇਨ੍ਹਾਂ ਫਿਲਮਾਂ ਦੀ ਸ਼ੂਟਿੰਗ ਵਿੱਚ ਲੰਘਿਆ ਹੈ। ਇਨ੍ਹਾਂ ਵਿੱਚ ‘ਲੁਕਾ ਛੁਪੀ’, ‘ਕਲੰਕ’, ‘ਅਰਜੁਨ ਪਟਿਆਲਾ’, ‘ਹਾਊਸ ਫੁੱਲ 4’ ਅਤੇ ‘ਪਾਣੀਪਤ’ ਸ਼ਾਮਲ ਹੈ। ਇਨ੍ਹਾਂ 'ਚੋਂ ਆਸ਼ੂਤੋਸ਼ ਗੋਵਾਰੀਕਰ ਦੀ ਫਿਲਮ ‘ਪਾਣੀਪਤ’ ਬਾਰੇ ਉਹ ਵਿਸ਼ੇਸ਼ ਰੂਪ 'ਤੇ ਉਤਸ਼ਾਹਤ ਹੈ ਇਸ ਫਿਲਮ ਵਿੱਚ ਆਪਣੇ ਰੋਲ ਨੂੰ ਪੂਰੀ ਤਰ੍ਹਾਂ ਸ਼ਿੱਦਤ ਨਾਲ ਨਿਭਾਉਣ ਲਈ ਉਸ ਨੇ ਖਾਸ ਤਿਆਰੀ ਵੀ ਸ਼ੁਰੂ ਕੀਤੀ ਹੈ।
‘ਪਾਣੀਪਤ' ਦੀਆਂ ਤਿਆਰੀਆਂ ਬਾਰੇ ਉਹ ਦੱਸਦੀ ਹੈ, ‘‘ਇਹ ਮੇਰੀ ਪਹਿਲੀ ਪੀਰੀਅਡ ਡਰਾਮਾ ਫਿਲਮ ਹੈ। ਸੱਚ ਕਹਾਂ ਤਾਂ ਮੈਂ ਆਸ਼ੂਤੋਸ਼ ਸਰ, ਅਰਜੁਨ ਕਪੂਰ ਅਤੇ ਸੰਜੇ ਦੱਤ ਸਰ ਨਾਲ ਕੰਮ ਕਰਨ ਲਈ ਬਹੁਤ ਉਤਸ਼ਾਹਤ ਹਾਂ। ਰਹੀ ਗੱਲ ਫਿਲਮ ਲਈ ਖਾਸ ਤਿਆਰੀ ਦੀ, ਤਾਂ ਮੈਂ ਘੋੜਸਵਾਰੀ ਦੀ ਟਰੇਨਿੰਗ ਸ਼ੁਰੂ ਕਰ ਚੁੱਕੀ ਹਾਂ। ਮੈ ਘੋੜਾ ਸਰਪਟ ਦੌੜਾਣਾ ਸਿੱਖਣਾ ਹੈ। ਸੰਵਾਦ ਅਦਾਇਗੀ 'ਚ ਕੋਈ ਘਾਟ ਨਾ ਰਹਿ ਜਾਵੇ, ਇਸ ਲਈ ਅੱਜਕੱਲ੍ਹ ਮਰਾਠੀ ਵੀ ਸਿੱਖ ਰਹੀ ਹਾਂ।’’
ਬਾਲੀਵੁੱਡ 'ਚ ਚਾਰ ਸਾਲ ਲੰਬੇ ਆਪਣੇ ਸਫਰ ਨੂੰ ਇੱਕ ‘ਅਨਪਲਾਨਡ ਜਰਨੀ' ਭਾਵ ਬਿਨਾਂ ਸੋਚੇ ਸਮਝੇ ਸ਼ੁਰ ਕੀਤਾ ਸਫਰ ਦੱਸਣ ਵਾਲੀ ਕ੍ਰਿਤੀ ਕਹਿੰਦੀ ਹੈ, ‘‘ਮੈਂ ਅਭਿਨੇਤਰੀ ਬਣਨ ਦਾ ਕਦੇ ਸੋਚਿਆ ਨਹੀਂ ਸੀ, ਨਾ ਮੈਂ ਕਿਤੋਂ ਐਕਟਿੰਗ ਸਿੱਖੀ। ਐਕਟਿੰਗ ਮੈਂ ਸੈੱਟ 'ਤੇ ਸਿੱਖਦੀ ਹਾਂ। ਦੂਜੀ ਹੀ ਫਿਲਮ ‘ਦਿਲਵਾਲੇ’ ਵਿੱਚ ਸ਼ਾਹਰੁਖ ਖਾਨ ਨਾਲ ਐਕਟਿੰਗ ਕਰਨਾ ਇੱਕ ਅਜਿਹਾ ਸੁਫਨਾ ਪੂਰਾ ਹੋਣ ਵਰਗਾ ਸੀ, ਜਿਸ ਨੂੰ ਮੈਂ ਕਦੇ ਦੇਖਿਆ ਹੀ ਨਹੀਂ ਸੀ।” ਉਸ ਅਨੁਸਾਰ ਉਸ ਦੀ ਚੌਥੀ ਫਿਲਮ ‘ਬਰੇਲੀ ਕੀ ਬਰਫੀ’ ਉਸ ਦੇ ਕਰੀਅਰ 'ਚ ਸਭ ਤੋਂ ਵੱਡਾ ਮੋੜ ਸਾਬਤ ਹੋਈ ਹੈ। ਉਸ ਨੇ ਕਿਹਾ, ‘‘ਕਈ ਲੋਕਾਂ ਨੇ ਇਸ ਫਿਲਮ 'ਚ ਮੈਨੂੰ ਲਏ ਜਾਣ 'ਤੇ ਸਵਾਲ ਕੀਤੇ ਸਨ, ਪਰ ਇਸ ਦੀ ਸਫਲਤਾ ਅਤੇ ਮੇਰੀ ਐਕਟਿੰਗ ਦੀਆਂ ਤਾਰੀਫਾਂ ਨੇ ਫਿਲਮਾਂ ਵਿੱਚ ਮੇਰੇ ਲਈ ਨਵੇਂ ਦਰਵਾਜ਼ੇ ਖੋਲ੍ਹ ਦਿੱਤੇ।” ਉਸ ਨੂੰ ਖੁਸ਼ੀ ਹੈ ਕਿ ਇਸ ਸਮੇਂ ਉਸ ਕੋਲ ਜੋ ਫਿਲਮਾਂ ਹਨ, ਉਨ੍ਹਾਂ ਸਾਰਿਆਂ 'ਚ ਉਸ ਨੂੰ ਵੱਖ-ਵੱਖ ਤਰ੍ਹਾਂ ਦੇ ਰੋਲ ਕਰਨ ਦੇ ਮੌਕੇ ਮਿਲ ਰਹੇ ਹਨ।