ਜਲੰਧਰ, 17 ਜਨਵਰੀ, (ਪੋਸਟ ਬਿਊਰੋ)- ਇੱਕ ਈਸਾਈ ਸਾਧਵੀ (ਨੰਨ) ਦੇ ਨਾਲ ਦੋ ਸਾਲ ਤਕ ਬਲਾਤਕਾਰ ਕਰਨ ਦੇ ਕੇਸ ਵਿਚ ਦੋਸ਼ੀ ਡਾਇਓਸਿਸ ਆਫ ਜਲੰਧਰ ਦੇ ਬਿਸ਼ਪ ਫਰੈਂਕੋ ਮੁਲੱਕਲ ਦੇ ਖਿਲਾਫ ਮੁੱਖ ਗਵਾਹ ਫਾਦਰ ਕੁਰਿਆਕੋਜ ਦੀ ਮੌਤ ਤੋਂ ਬਾਅਦ ਏਥੋਂ ਦੀ ਚਾਰ ਨੰਨਜ਼ ਨੂੰ ਕਾਨਵੈਂਟ ਛੱਡਣ ਲਈ ਕਹਿ ਦਿੱਤਾ ਗਿਆ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਕੇਰਲ ਨਾਲ ਸਬੰਧਤ ਇਨ੍ਹਾਂ ਚਾਰਾਂ ਨੰਨਾਂ ਨੇ ਪੀੜਤ ਲੜਕੀ ਦਾ ਪੱਖ ਲੈਂਦੇ ਹੋਏ ਪੁਲਿਸ ਨੂੰ ਇਨਸਾਫ਼ ਦੀ ਅਪੀਲ ਕੀਤੀ ਸੀ। ਇਸ ਪੂਰੇ ਕੇਸ ਬਾਰੇ ਬਿਸ਼ਪ ਹਾਊਸ ਦਾ ਕੋਈ ਅਧਿਕਾਰੀ ਬੋਲਣ ਨੂੰ ਤਿਆਰ ਨਹੀਂ ਹੈ। ਇਸ ਲਈ ਇਸ ਫੈਸਲੇ ਦੇ ਵਿਰੋਧ ਵਿਚ ਨੰਨਜ਼ ਦਾ ਰੋਹ ਵਧ ਰਿਹਾ ਹੈ।
ਵਰਨਣ ਯੋਗ ਹੈ ਕਿ ਕੇਰਲਾ ਦੀ ਇੱਕ ਨੰਨ ਵੱਲੋਂ ਫਾਦਰ ਫਰੈਂਕੋ ਮੁਲੱਕਲ ਉੱਤੇ ਸਾਲ 2014 ਤੋਂ 2016 ਤਕ 13 ਵਾਰ ਬਲਾਤਕਾਰ ਕਰਨ ਦਾ ਦੋਸ਼ ਲਾਇਆ ਗਿਆ ਸੀ, ਜਿਸ ਪਿੱਛੋਂ ਫਰੈਂਕੋ ਮੁਲੱਕਲ ਨੂੰ ਕੇਰਲ ਪੁਲਿਸ ਗ੍ਰਿਫ਼ਤਾਰ ਕਰ ਕੇ ਲੈ ਗਈ ਸੀ। ਅੱਜਕੱਲ੍ਹ ਉਹ ਜ਼ਮਾਨਤ ਉੱਤੇ ਹਨ। ਇਸ ਕੇਸ ਦੇ ਮੁੱਖ ਗਵਾਹ ਫਾਦਰ ਕੁਰਿਆਕੋਜ ਦੀ ਮੌਤ ਉਤੇ ਉਨ੍ਹਾਂ ਦੇ ਭਰਾ ਜੌਸ ਕੁਰਿਆਨ ਨੇ ਇਸ ਮੌਤ ਨੂੰ ਸ਼ੱਕੀ ਦੱਸ ਕੇ ਕੇਰਲ ਦੇ ਮੁੱਖ ਮੰਤਰੀ ਨੂੰ ਭੇਜੇ ਪੱਤਰ ਰਾਹੀਂ ਇਸ ਦੀ ਉੱਚ ਪੱਧਰੀ ਜਾਂਚ ਦੀ ਮੰਗ ਕੀਤੀ ਸੀ। ਇਸ ਕੇਸ ਵਿੱਚ ਫਰੈਂਕੋ ਮੁਲੱਕਲ ਦਾ ਵਿਰੋਧ ਕਰਦੀ ਸਿਸਟਰ ਐਲਫੀ ਪੇਲਸਿਰਿਲ, ਸਿਸਟਰ ਅਨੁਪਮਾ ਕੇਲਮੰਗਲਾ ਵੇਲਿਲ, ਸਿਸਟਰ ਜੋਸਫੀਨ ਵਿਲੁਨਿਵਲ ਅਤੇ ਸਿਸਟਰ ਐਨਸਿਟਾ ਯੁਰੂਮਿਲਮ ਸ਼ਮੀ ਨੂੰ ਕਾਨਵੈਂਟ ਤੋਂ ਚਲੇ ਜਾਣ ਦਾ ਹੁਕਮ ਦਿੱਤੇ ਜਾਣ ਤੋਂ ਬਾਅਦ ਬਾਕੀ ਨੰਨਜ਼ ਦਾ ਰੋਹ ਵਧ ਗਿਆ ਹੈ।