ਵਾਸ਼ਿੰਗਟਨ, 17 ਜਨਵਰੀ (ਪੋਸਟ ਬਿਊਰੋ)- ਜੇ ਤੁਸੀਂ ਰਾਤ ਸਮੇਂ ਛੇ ਘੰਟੇ ਤੋਂ ਘੱਟ ਸਮੇਂ ਦੀ ਨੀਂਦ ਲੈਂਦੇ ਹੋ ਤਾਂ ਤੁਹਾਡੇ ਲਈ ਨੁਕਸਾਨਦੇਹ ਹੋ ਸਕਦਾ ਹੈ। ਇੱਕ ਅਧਿਐਨ ਵਿੱਚ ਦੱਸਿਆ ਗਿਆ ਹੈ ਕਿ ਜੋ ਲੋਕ ਸੱਤ ਤੋਂ ਅੱਠ ਘੰਟੇ ਦੀ ਨੀਂਦ ਲੈਂਦੇ ਹਨ, ਦੇ ਮੁਕਾਬਲੇ ਛੇ ਘੰਟੇ ਤੋਂ ਘੱਟ ਸੌਣ ਵਾਲੇ ਲੋਕਾਂ ਵਿੱਚ ਦਿਲ ਸੰਬੰਧੀ ਬਿਮਾਰੀਆਂ ਦਾ ਵੱਧ ਖਤਰਾ ਰਹਿੰਦਾ ਹੈ। ਇਹ ਅਧਿਐਨ ਅਮਰੀਕਨ ਕਾਲਜ ਆਫ ਕਾਰਡੀਓਲਾਜੀ ਵਿੱਚ ਪ੍ਰਕਾਸ਼ਤ ਹੋਇਆ ਹੈ, ਜਿਸ ਵਿੱਚ ਦੱਸਿਆ ਗਿਆ ਹੈ ਕਿ ਜੇ ਤੁਸੀਂ ਚੰਗੀ ਨੀਂਦ ਨਹੀਂ ਲੈਂਦੇ ਹੋ ਤਾਂ ਐਥੀਰੋਸਕਲੇਰੋਸਿਸ ਨਾਂਅ ਦੀ ਬਿਮਾਰੀ ਦਾ ਖਤਰਾ ਵੱਧ ਜਾਂਦਾ ਹੈ। ਇਸ ਵਿੱਚਚ ਸਰੀਰ ਦੀਆਂ ਨਾੜੀਆਂ 'ਚ ਪਲਾਕ ਜੰਮ ਜਾਂਦਾ ਹੈ, ਜਿਸ ਨਾਲ ਉਹ ਸਖਤ ਅਤੇ ਸੁੰਗੜ ਜਾਂਦੀਆਂ ਹਨ।
ਸਪੇਨ ਦੇ ਸੈਂਟਰੋ ਨੈਸ਼ਨਲ ਡੀ ਇਨਵੈਸਟੀਗੇਸ਼ੀਓਨੇਸ ਕਾਰਡੀਓਵੈਸਕੁਲਰਸ ਕਾਰਲੋਸ ਜ਼ੋਨਸ ਐੱਮ ਓਰਦੋਵਾਸ ਨੇ ਦੱਸਿਆ ਕਿ ਦਿਲ ਸੰਬੰਧੀ ਬਿਮਾਰੀ ਇੱਕ ਸੰਸਾਰਕ ਸਮੱਸਿਆ ਹੈ ਅਤੇ ਅਸੀਂ ਦਵਾਈ, ਸਰੀਰਕ ਸਰਗਰਮੀ ਅਤੇ ਖਾਣ-ਪੀਣ ਸਮੇਤ ਵੱਖ-ਵੱਖ ਤਰੀਕਿਆਂ ਨਾਲ ਇਸ ਦੀ ਰੋਕਥਾਮ ਅਤੇ ਇਲਾਜ ਕਰ ਰਹੇ ਹਾਂ। ਓਰਦੋਵਾਸ ਨੇ ਕਿਹਾ ਕਿ ਪਰ ਇਹ ਅਧਿਐਨ ਇਸ ਗੱਲ 'ਤੇ ਜ਼ੋਰ ਦਿੰਦਾ ਹੈ ਕਿ ਦਿਲ ਸੰਬੰਧੀ ਰੋਗ ਨਾਲ ਨਜਿੱਠਣ ਲਈ ਲੋੜੀਂਦੀ ਨੀਂਦ ਲੈਣੀ ਹੋਵੇਗੀ। ਇਹ ਇੱਕ ਅਜਿਹੀ ਚੀਜ਼ ਹੈ, ਜਿਸ ਨਾਲ ਅਸੀਂ ਰੋਜ਼ਾਨਾ ਸਮਝੌਤਾ ਕਰਦੇ ਹਾਂ।