ਲੰਡਨ, 17 ਜਨਵਰੀ (ਪੋਸਟ ਬਿਊਰੋ)- ਟਾਈਮਜ਼ ਹਾਇਰ ਐਜੂਕੇਸ਼ਨ ਦੇ ਇਸ ਸਾਲ ਵਾਲੇ ਮੈਗਜ਼ੀਨ ‘ਐਮਰਜਿੰਗ ਇਕਨੋਮੀਜ ਯੂਨੀਵਰਸਿਟੀ ਰੈਂਕਿੰਗ' ਵਿੱਚ ਭਾਰਤ ਦੀਆਂ 49 ਸੰਸਥਾਵਾਂ ਨੂੰ ਥਾਂ ਮਿਲੀ ਹੈ। ਇਨ੍ਹਾਂ 49 'ਚੋਂ 25 ਸੰਸਥਾਵਾਂ ਟੌਪ 200 'ਚ ਥਾਂ ਬਣਾਉਣ 'ਚ ਸਫਲ ਰਹੀਆਂ ਹਨ।
ਲੰਡਨ ਦੀ ਟਾਈਮਜ਼ ਹਾਇਰ ਐਜੂਕੇਸ਼ਨ (ਟੀ ਐਚ ਈ) ਅਨੁਸਾਰ 2019 ਦੀ ਸੂਚੀ 'ਚ ਸਭ ਤੋਂ ਜ਼ਿਆਦਾ ਜਗ੍ਹਾ ਬਣਾਉਣ ਵਾਲਾ ਦੇਸ਼ ਚੀਨ ਰਿਹਾ ਹੈ, ਜਿਸ ਦੀ ਸ਼ਿੰਘੂਆ ਯੂਨੀਵਰਸਿਟੀ ਨੇ ਪਹਿਲਾ ਸਥਾਨ ਹਾਸਲ ਕੀਤਾ ਹੈ। ਇਸ ਤੋਂ ਇਲਾਵਾ ਸੂਚੀ ਦੇ ਟੌਪ-5 'ਚ ਚਾਰ ਸੰਸਥਾਵਾਂ ਚੀਨ ਦੀਆਂ ਹੀ ਹਨ। ਟੀ ਐਚ ਈ ਉਚ ਪੱਧਰੀ ਵਿੱਦਿਆ ਬਾਰੇ ਜਾਣਕਾਰੀ ਇਕੱਠੀ ਕਰਨ, ਉਨ੍ਹਾਂ ਦੀ ਘੋਖ ਕਰਨ ਅਤੇ ਉਸ ਦਾ ਵਿਸ਼ਲੇਸ਼ਣ ਕਰਨ ਵਾਲਾ ਇਕ ਵਿਸ਼ਵ ਪੱਧਰੀ ਸੰਗਠਨ ਹੈ, ਜੋ ਹਰ ਸਾਲ ਵਿੱਦਿਆ ਨਾਲ ਸਬੰਧਤ ਕਈ ਰੈਂਕਿੰਗ ਜਾਰੀ ਕਰਦਾ ਹੈ। ਇਸ ਵੱਲੋਂ ਹਾਲ ਵੀ ਵਿੱਚ ਜਾਰੀ ਕੀਤੀ ਸੂਚੀ 'ਚ ਭਾਰਤੀ ਵਿਗਿਆਨ ਸੰਸਥਾ ਨੇ 14ਵਾਂ ਸਥਾਨ ਹਾਸਲ ਕੀਤਾ ਅਤੇ ਇੰਡੀਅਨ ਇੰਸਟੀਚਿਊਟ ਆਫ ਟੈਕਨੋਲੋਜੀ, ਮੁੰਬਈ 27ਵੇਂ ਸਥਾਨ ਉੱਤੇ ਰਿਹਾ। ਦੋਵੇਂ ਸੰਸਥਾਵਾਂ ਇਸ ਸਾਲ ਇਕ ਸਥਾਨ ਪੱਛੜ ਗਈਆਂ ਹਨ। ਸਾਲ 2019 ਦੀ ਰੈਂਕਿੰਗ 'ਚ ਚਾਰੇ ਮਹਾਦੀਪਾਂ ਦੇ 43 ਦੇਸ਼ਾਂ ਦੀਆਂ ਲਗਭਗ 450 ਯੂਨੀਵਰਸਿਟੀਆਂ ਨੂੰ ਜਗ੍ਹਾ ਮਿਲੀ ਹੈ।