ਇਸਲਾਮਾਬਾਦ, 17 ਜਨਵਰੀ (ਪੋਸਟ ਬਿਊਰੋ)- ‘ਜਨਤਾ ਦੇ ਜੱਜ` ਦਾ ਅਕਸ ਬਣਾਉਣ ਲਈ ਯਤਨਸ਼ੀਲ ਤੇ ਜੁਡੀਸ਼ਲ ਸਰਗਰਮੀ ਲਈ ਜਾਣੇ ਜਾਂਦੇ ਪਾਕਿਸਤਾਨ ਦੇ ਚੀਫ ਜਸਟਿਸ ਸਾਕਿਬ ਨਿਸਾਰ ਅੱਜ ਰਿਟਾਇਰ ਹੋ ਗਏ।
ਜਸਟਿਸ ਨਿਸਾਰ ਨੇ ਚੋਟੀ ਦੇ ਜੱਜ ਵਜੋਂ ਆਪਣੇ ਕਾਰਜਕਾਲ ਦੌਰਾਨ ਪ੍ਰਧਾਨ ਮੰਤਰੀ ਨਵਾਜ਼ ਸ਼ਰੀਫ ਨੂੰ ਅਯੋਗ ਠਹਿਰਾਉਣ ਤੋਂ ਲੈ ਕੇ ਈਸਾਈ ਔਰਤ ਆਸੀਆ ਬੀਬੀ ਦੇ ਖਿਲਾਫ ਕੁਫਰ ਦੇ ਕੇਸ ਵਿੱਚ ਅਹਿਮ ਹੁਕਮਾਂ ਵਰਗੇ ਕਈ ਫੈਸਲੇ ਲਏ ਸਨ। ਉਨ੍ਹਾਂ ਨੇ 31 ਦਸੰਬਰ 2016 ਨੂੰ ਚੀਫ ਜੱਜ ਵਜੋਂ ਸਹੁੰ ਚੁੱਕੀ ਸੀ। ਉਨ੍ਹਾਂ ਦੇ ਰਿਟਾਇਰ ਹੋਣ ਤੋਂ ਬਾਅਦ ਆਸਿਫ ਸਈਦ ਖੋਸਾ ਉਨ੍ਹਾਂ ਦੀ ਥਾਂ ਲੈਣਗੇ। ਜਸਟਿਸ ਨਿਸਾਰ 18 ਫਰਵਰੀ 2010 ਤੋਂ ਸੁਪਰੀਮ ਕੋਰਟ ਦੇ ਜੱਜ ਬਣੇ ਸਨ। ਉਸ ਤੋਂ ਪਹਿਲਾਂ ਉਹ ਲਾਹੌਰ ਹਾਈ ਕੋਰਟ ਦੇ ਜੱਜ ਸਨ।