ਵਾਸਿ਼ੰਗਟਨ, 17 ਜਨਵਰੀ (ਪੋਸਟ ਬਿਊਰੋ)- ਯੂ-ਟਿਊਬ ਉੱਤੇ ਖ਼ਤਰਨਾਕ ਚੁਣੌਤੀ ਪੂਰਨ ਵੀਡੀਓਜ਼ ਅੱਗੇ ਤੋਂ ਨਹੀਂ ਪਾਏ ਜਾ ਸਕਣਗੇ। ਇਹਨਾਂ ਕਾਰਨ ਕਈ ਲੋਕਾਂ ਦੀ ਮੌਤ ਅਤੇ ਜਖ਼ਮੀ ਹੋਣ ਦੀਆਂ ਖ਼ਬਰਾਂ ਨੂੰ ਦੇਖ ਕੇ ਇਹ ਫ਼ੈਸਲਾ ਲਿਆ ਗਿਆ ਹੈ। ਇਸ ਸੰਬੰਧ ਵਿੱਚ ਯੂ-ਟਿਊਬ ਨੇ ਇਹ ਗੱਲ ਸਾਫ ਕਹਿ ਦਿਤੀ ਹੈ ਕਿ ਮਨੁੱਖੀ ਜਾਨ ਨੂੰ ਖ਼ਤਰੇ ਵਿਚ ਪਾਉਣ ਵਾਲੇ ਵੀਡੀਓਜ਼ ਲਈ ਅੱਗੇ ਤੋਂ ਕੋਈ ਥਾਂ ਨਹੀਂ ਹੋਵੇਗੀ।
ਯੂ-ਟਿਊਬ ਉੱਤੇ ਬਲੂ ਵ੍ਹੇਲ ਗੇਮ, ਕਿਕੀ ਡਾਂਸ, ਬਰਡਬੌਕਸ ਦੇ ਕਈ ਖ਼ਤਰਨਾਕ ਚੁਣੌਤੀ ਭਰੇ ਵੀਡੀਓ ਵਾਇਰਲ ਹੋਏ ਹਨ, ਜਿਨ੍ਹਾਂ ਨੂੰ ਆਮ ਲੋਕਾਂ ਨੇ ਪਸੰਦ ਕੀਤਾ ਹੈ। ਲੋਕ ਇਨ੍ਹਾਂ ਨੂੰ ਦੇਖ ਕੇ ਇਹਨਾਂ ਦੀ ਨਕਲ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ ਪਰ ਇਹ ਉਨ੍ਹਾਂ ਲਈ ਜਾਨਲੇਵਾ ਹੋ ਸਕਦੇ ਹਨ। ਇਹ ਮੰਗ ਵੀ ਉੱਠੀ ਹੈ ਕਿ ਇਸ ਤਰ੍ਹਾਂ ਦੇ ਵੀਡੀਓਜ਼ ਉੱਤੇ ਪਾਬੰਦੀ ਲੱਗਣੀ ਚਾਹੀਦੀ ਹੈ। ਪਿਛਲੇ ਸਾਲ ਅਪ੍ਰੈਲ ਵਿਚ ਯੂ-ਟਿਊਬ ਨੇ ਅਜਿਹੇ ਲੋਕਾਂ ਉੱਤੇ ਰੋਕ ਲਾਉਣ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਪਰ ਅਜਿਹੀ ਸਮੱਗਰੀ ਹਾਲੇ ਵੀ ਸੋਸ਼ਲ ਸਾਈਟਸ ਉੱਤੇ ਹੈ। ਯੂ-ਟਿਊਬ ਨੇ ਕਿਹਾ ਕਿ ਉਹਨਾਂ ਸ਼ਰਾਰਤ ਭਰੇ ਵੀਡੀਓਜ਼ ਉੱਤੇ ਵੀ ਰੋਕ ਲਾਈ ਜਾਵੇਗੀ ਜੋ ਛੋਟੇ ਬੱਚਿਆਂ ਨੂੰ ਭਾਵਨਾਤਮਕ ਪੱਖ ਤੋਂ ਨੁਕਸਾਨ ਪੁਚਾਉਂਦੇ ਹਨ। ਯੂ-ਟਿਊਬ ਮੁਤਾਬਕ ਅਜਿਹੇ ਵੀਡੀਓਜ਼ ਦੀ ਪੂਰੀ ਸੂਚੀ ਤਾਂ ਪਤਾ ਨਹੀਂ, ਪਰ ਉਹ ਇਸ ਬਾਰੇ ਜਾਣਕਾਰੀ ਇੱਕਠੀ ਕਰਨ ਲਗੇ ਹੋਏ ਹਨ ਤਾਂ ਕਿ ਇਹਨਾਂ ਉੱਤੇ ਰੋਕ ਲਾਈ ਜਾ ਸਕੇ। ਮਈ ਵਿੱਚ ਸ਼ਿਕਾਗੋ ਵਿਚ 20 ਸਾਲ ਦੀ ਮੋਨਾਲਿਸਾ ਪੇਰੇਜ਼ ਅਤੇ 22 ਸਾਲ ਦੀ ਪੈਡਰੋ ਰੁਈਜ਼ ਯੂ-ਟਿਊਬ ਚੈਨਲ ਲਈ ਇਕ ਸਟੰਟ ਰਿਕਾਰਡ ਕਰ ਰਹੇ ਸਨ। ਇਸ ਖ਼ਤਰਨਾਕ ਸਟੰਟ ਨੇ ਮੋਨਾਲੀਸਾ ਦੇ ਦੋਸਤ ਦੀ ਜਾਨ ਲੈ ਲਈ। ਬੀਤੇ ਸਾਲ ਅਮਰੀਕਾ ਦੀ ਇਕ ਮਸ਼ਹੂਰ ਕੰਪਨੀ ਨੇ ਅਪਣੇ ਸਾਬਣ ਦੇ ਪ੍ਰਚਾਰ ਲਈ ਅਨੋਖੀ ਐਡ ਬਣਾਈ, ਜਿਸ ਵਿਚ ਬੀਮਾਰੀ ਤੋਂ ਬਚਣ ਲਈ ਸਾਬਣ ਖਾਂਦੇ ਦਿਖਾਇਆ ਗਿਆ ਸੀ। ਯੂ-ਟਿਊਬ ਦੇ ਮੁਤਾਬਕ ਜੋ ਚੈਨਲ ਇਸ ਤਰ੍ਹਾਂ ਦੇ ਪ੍ਰੈਂਕ ਤੇ ਖ਼ਤਰਨਾਕ ਵੀਡੀਓਜ਼ ਪੋਸਟ ਕਰੇਗਾ, ਪਹਿਲੇ ਸਟ੍ਰਾਈਕ ਹੇਠ ਉਸ ਚੈਨਲ ਦੇ ਲਾਈਵ ਸਟ੍ਰੀਮਿੰਗ ਫੀਚਰ ਉੱਤੇ ਪਾਬੰਦੀ ਲਾ ਦਿਤੀ ਜਾਵੇਗੀ ਅਤੇ ਤੀਜੇ ਮਹੀਨੇ ਵਿਚ ਦੂਜਾ ਸਟ੍ਰਾਈਕ ਆਉਣ ਉੱਤੇ ਪਹਿਲਾਂ ਤੋਂ ਵੱਧ ਫੀਚਰ ਉੱਤੇ ਪਾਬੰਦੀ ਲਾਈ ਜਾਵੇਗੀ। ਇਸ ਤੋਂ ਬਾਅਦ 90 ਦਿਨਾਂ ਦੇ ਅੰਦਰ ਤੀਜਾ ਸਟ੍ਰਾਈਕ ਆਉਣ ਉੱਤੇ ਯੂ-ਟਿਊਬ ਉਸ ਚੈਨਲ ਨੂੰ ਹਮੇਸ਼ਾ ਲਈ ਬੰਦ ਕਰ ਦੇਵੇਗਾ।