ਵਾਸ਼ਿੰਗਟਨ, 17 ਜਨਵਰੀ (ਪੋਸਟ ਬਿਊਰੋ)- ਬੁੱਧਵਾਰ ਸਵੇਰੇ ਇਕ ਅੰਗਰੇਜ਼ੀ ਅਖਬਾਰ ਵਿਚ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਅਸਤੀਫੇ ਦੀ ਖਬਰ ਛਪਣ ਨੇ ਭੁਚਾਲ ਵਰਗੀ ਸਥਿਤੀ ਬਣਾ ਦਿੱਤੀ।
ਅੰਗਰੇਜ਼ੀ ਅਖਬਾਰ ‘ਦੀ ਵਾਸ਼ਿੰਗਟਨ ਪੋਸਟ` ਦੇ ਪਹਿਲੇ ਪੇਜ ਉੱਤੇ ਲੱਗੀ ਖਬਰ ਦਾ ਹੈਡਿੰਗ ਸੀ ‘ਅਨਪ੍ਰੈਸੀਡੈਂਟ`। ਇਸ ਵਿਚ ਲਿਖਿਆ ਸੀ ਕਿ ਡੋਨਾਲਡ ਟਰੰਪ ਵ੍ਹਾਈਟ ਹਾਊਸ ਛੱਡ ਕੇ ਚਲੇ ਗਏ ਹਨ। ਇਸੇ ਪੇਜ ਉੱਤੇ ਛਪੀ ਇਕ ਹੋਰ ਰਿਪੋਰਟ ਵਿਚ ਲਿਖਿਆ ਸੀ ਕਿ ਟਰੰਪ ਦੇ ਅਸਤੀਫੇ ਨਾਲ ਪੂਰੇ ਦੇਸ਼ ਵਿਚ ਜਸ਼ਨ ਦਾ ਮਾਹੌਲ ਹੈ ਅਤੇ ਲੋਕ ਖੁਸ਼ੀਆਂ ਮਨਾ ਰਹੇ ਹਨ। ਬਾਅਦ ਵਿੱਚ ਇਹ ਖਬਰ ਝੂਠੀ ਸਾਬਤ ਹੋਈ।
ਅਮਰੀਕਾ ਦੀ ਰਾਜਧਾਨੀ ਵਾਸ਼ਿੰਗਟਨ ਵਿਚ ਵੱਕਾਰੀ ਅਖਬਾਰ ‘ਦੀ ਵਾਸ਼ਿੰਗਟਨ ਪੋਸਟ` ਦਾ ਇਕ ਫੇਕ ਐਡੀਸ਼ਨ ਵਾਇਰਲ ਹੋ ਰਿਹਾ ਹੈ। ਇਸ ਫੇਕ ਐਡੀਸ਼ਨ ਵਿਚ ਅਮਰੀਕੀ ਪ੍ਰਸ਼ਾਸਨ ਨਾਲ ਸਬੰਧਤ ਫਰਜ਼ੀ ਖਬਰਾਂ ਨੂੰ ਪ੍ਰਕਾਸ਼ਿਤ ਕੀਤਾ ਜਾ ਰਿਹਾ ਹੈ। ਜਦੋਂ ਅਖਬਾਰ ਲੋਕਾਂ ਦੇ ਹੱਥ ਵਿਚ ਆਈ ਤਾਂ ਹੈਰਾਨੀ ਨਾਲ ਖਬਰ ਨੂੰ ਦੇਖਦੇ ਰਹੇ। ਪਹਿਲੇ ਪੇਜ ਉੱਤੇ ਛਪੀ ਖਬਰ ਵਿਚ ਟਰੰਪ ਦੇ ਅਸਤੀਫੇ ਦਾ ਐਲਾਨ ਸੀ। ਮਜ਼ੇਦਾਰ ਗੱਲ ਇਹ ਰਹੀ ਕਿ ਅਖਬਾਰ ਉੱਤੇ 1 ਮਈ 2019 ਤਰੀਕ ਲਿਖੀ ਹੋਈ ਸੀ। ਇਸ ਅਖਬਾਰ ਨੂੰ ਵ੍ਹਾਈਟ ਹਾਊਸ ਅਤੇ ਆਲੇ-ਦੁਆਲੇ ਦੇ ਇਲਾਕਿਆਂ ਵਿਚ ਲੋਕਾਂ ਨੂੰ ਮੁਫਤ ਵੰਡਿਆ ਗਿਆ। ਜਦੋਂ ਅਸਲੀ ਅਖਬਾਰ ‘ਦੀ ਵਾਸ਼ਿੰਗਟਨ ਪੋਸਟ` ਨੂੰ ਇਸ ਦਾ ਪਤਾ ਲੱਗਾ ਤਾਂ ਉਨ੍ਹਾਂ ਤੁਰੰਤ ਇਸ ਦਾ ਖੰਡਨ ਕੀਤਾ ਤੇ ਕਿਹਾ ਕਿ ਇਹ ਇਕ ਫਰਜ਼ੀ ਐਡੀਸ਼ਨ ਹੈ, ਇਸ ਦੇ ਧੋਖੇ ਵਿਚ ਨਾ ਆਓ, ਸਾਨੂੰ ਇਸ ਦੀ ਸੂਚਨਾ ਮਿਲੀ ਹੈ, ਇਸ ਦੀ ਕੋਈ ਭਰੋਸੇਯੋਗਤਾ ਨਹੀਂ ਹੈ, ਅਸੀਂ ਇਸ ਦੀ ਪੜਤਾਲ ਕਰ ਰਹੇ ਹਾਂ।
ਵਰਨਣ ਯੋਗ ਹੈ ਕਿ ਫਰਜ਼ੀ ਅਖਬਾਰ ਛਾਪਣ ਵਾਲਿਆਂ ਨੇ ਇਸ ਦੀ ਕਾਪੀ ਬਿਲਕੁੱਲ ਅਸਲੀ ਅਖਬਾਰ ਨਾਲ ਮੇਲ ਖਾਂਦੀ ਤਿਆਰ ਕੀਤੀ ਸੀ। ਇਸ ਵਿਚ ਅਖਬਾਰ ਦਾ ਨਾਮ ਅਤੇ ਲੋਗੋ ਵੀ ਉਹੋ ਵਰਤਿਆ ਗਿਆ। ਹਾਲੇ ਤੱਕ ਇਸ ਬਾਰੇ ਉੱਤੇ ਡੋਨਾਲਡ ਟਰੰਪ ਦੀ ਕੋਈ ਪ੍ਰਤੀਕਿਰਿਆ ਨਹੀਂ ਆਈ। ਇਸ ਅਖਬਾਰ ਨੇ ਇਹੋ ਜਿਹੇ ਕਈ ਫਰਜ਼ੀ ਲੇਖ ਵੀ ਛਾਪੇ ਹਨ, ਜਿਨ੍ਹਾਂ ਵਿੱਚੋਂ ਇੱਕ ਵਿਚ ਕਿਹਾ ਗਿਆ ਹੈ ਕਿ ਟਰੰਪ ਦੇ ਅਸਤੀਫੇ ਨਾਲ ਦਿੱਲੀ ਸਣੇ ਕਈ ਦੇਸ਼ਾਂ ਦੇ ਲੋਕਾਂ ਵਿੱਚ ਖੁਸ਼ੀ ਦੀ ਲਹਿਰ ਹੈ। ਦੂਜੇ ਲੇਖ ਵਿਚ ਕਿਹਾ ਗਿਆ ਹੈ ਕਿ ਪਿੱਛੇ ਜਿਹੇ ਉਪ ਰਾਸ਼ਟਰਪਤੀ ਬਣੇ ਮਾਈਕ ਪੈਂਸ ਨੇ ਆਪਣੀ ਦਾਦੀ ਦੀ ਬਾਈਬਲ ਨਾਲ ਸਹੁੰ ਚੁੱਕੀ ਸੀ।
ਦੱਸਿਆ ਜਾ ਰਿਹਾ ਹੈ ਕਿ ਅਮਰੀਕਾ ਦੇ ਪੇਨਸਿਲਵੇਨੀਆ ਐਵੀਨਿਊ ਤੇ ਵ੍ਹਾਈਟ ਹਾਊਸ ਦੇ ਦੁਆਲੇ ਇਕ ਮਹਿਲਾ ਫਰਜ਼ੀ ਅਖਬਾਰ ਦੀ ਕਾਪੀ ਲੋਕਾਂ ਨੂੰ ਮੁਫਤ ਦੇ ਕੇ ਕਹਿੰਦੀ ਸੀ ਕਿ ਇਹ ਵਾਸ਼ਿੰਗਟਨ ਪੋਸਟ ਦਾ ਖਾਸ ਐਡੀਸ਼ਨ ਹੈ, ਜੋ ਬਾਅਦ ਵਿਚ ਕਦੇ ਨਹੀਂ ਮਿਲੇਗਾ। ਉਸ ਕੋਲ ਪਲਾਸਟਿਕ ਬੈਗ ਵਿਚ ਇਸ ਫਰਜ਼ੀ ਅਖਬਾਰ ਦਾ ਪੂਰਾ ਬੰਡਲ ਸੀ।