ਨਵੀਂ ਦਿੱਲੀ, 17 ਜਨਵਰੀ (ਪੋਸਟ ਬਿਊਰੋ)- ਪੱਛਮੀ ਬੰਗਾਲ ਦੇ ਸੱਤਿਆਸਰੂਪ ਸਿਧਾਂਤ ਨੇ ਕੱਲ੍ਹ ਮਾਊਂਟ ਸਿਡਲੇ ਨੂੰ ਸਰ ਕਰ ਕੇ ਇਤਿਹਾਸ ਬਣਾ ਦਿੱਤਾ। ਉਹ ਸੱਤ ਪਰਬਤਾਂ ਦੀਆਂ ਚੋਟੀਆਂ ਤੇ ਸੱਤ ਜਵਾਲਾਮੁਖੀਆਂ ਨੂੰ ਫਤਹਿ ਕਰਨ ਵਾਲੇ ਸਭ ਤੋਂ ਘੱਟ ਉਮਰ ਦੇ ਸਖਸ਼ ਬਣ ਗਏ ਹਨ। ਆਪਣੇ ਇਸ ਵਿਲੱਖਣ ਕੰਮ ਲਈ ਉਨ੍ਹਾਂ ਦਾ ਨਾਂਅ ‘ਗਿਨੀਜ਼ ਬੁੱਕ ਆਫ ਵਰਲਡ ਰਿਕਾਰਡ' ਵਿੱਚ ਦਰਜ ਕੀਤਾ ਜਾਵੇਗਾ।
ਸੱਤਿਆਸਰੂਪ ਨੇ ਕੱਲ੍ਹ ਸਵੇਰੇ 6.28 ਮਿੰਟ ਉੱਤੇ ਸੱਤਵੇਂ ਜਵਾਲਾਮੁਖੀ ਪਰਬਤ ਮਾਊਂਟ ਸਿਡਲੇ ਨੂੰ ਫਤਹਿ ਕੀਤਾ। ਮਾਊਂਟ ਸਿਡਲੇ ਦੀ ਉਚਾਈ ਕਰੀਬ 4285 ਮੀਟਰ ਹੈ। ਸੱਤਿਆਸਰੂਪ ਨੇ ਇਸ ਦੀ ਚੋਟੀ 'ਤੇ ਪੁੱਜ ਕੇ ਤਿਰੰਗਾ ਲਹਿਰਾ ਕੇ ਰਾਸ਼ਟਰੀ ਗੀਤ ਗਾਇਆ ਤੇ ਕੇਕ ਕੱਟ ਕੇ ਆਪਣੀ ਇਸ ਜਿੱਤ ਦਾ ਜਸ਼ਨ ਮਨਾਇਆ। ਸੱਤਵੇਂ ਜਵਾਲਾਮੁਖੀ ਸਿਡਲੇ ਨੂੰ ਫਤਹਿ ਕਰਨ ਤੋਂ ਪਹਿਲਾਂ ਹੀ ਗਿਨੀਜ਼ ਬੁੱਕ 'ਚ ਨਾਂਅ ਦਰਜ ਕਰਵਾਉਣ ਦੀ ਆਨਲਾਈਨ ਅਰਜ਼ੀ ਸਵੀਕਾਰ ਕਰ ਲਈ ਗਈ ਹੈ। ਸੱਤਿਆਸਰੂਪ ਸਾਰੇ ਵਿਸ਼ਵ ਦੇ ਸੱਤ ਪਰਬਤਾਂ ਅਤੇ ਸੱਤ ਜਵਾਲਾਮੁਖੀ ਪਰਬਤਾਂ 'ਤੇ ਤਿਰੰਗਾ ਲਹਿਰਾਉਣ ਵਾਲੇ ਪਹਿਲੇ ਭਾਰਤੀ ਹਨ। ਇਸ ਤੋਂ ਪਹਿਲਾਂ ਅਜਿਹਾ ਹੈਰਾਨੀ ਭਰਿਆ ਕਾਰਨਾਮਾ ਸਭ ਤੋਂ ਘੱਟ ਉਮਰ 'ਚ ਕਰਨ ਦਾ ਰਿਕਾਰਡ ਆਸਟਰੇਲੀਆ ਦੇ ਡੈਨੀਅਲ ਬੁਲ ਦੇ ਨਾਂਅ ਸੀ। ਉਨ੍ਹਾਂ ਨੇ 36 ਸਾਲ 157 ਦਿਨ ਦੀ ਉਮਰ 'ਚ ਇਹ ਕਾਰਨਾਮਾ ਕੀਤਾ ਸੀ। ਸੱਤਿਆਸਰੂਪ ਨੇ 35 ਸਾਲ 9 ਮਹੀਨਿਆਂ 'ਚ ਇਹ ਕੰਮ ਕਰਕੇ ਇਕ ਨਵੀਂ ਮਿਸਾਲ ਕਾਇਮ ਕਰ ਦਿੱਤੀ ਹੈ। ਬਚਪਨ 'ਚ ਸੱਤਿਆਸਰੂਪ ਦਮੇ ਦੀ ਬਿਮਾਰੀ ਤੋਂ ਪੀੜਤ ਸਨ ਤੇ 100 ਮੀਟਰ ਚੱਲਣ 'ਚ ਵੀ ਘਰਕ ਜਾਂਦੇ ਸਨ, ਪਰ ਉਨ੍ਹਾਂ ਨੇ ਸਖਤ ਮਿਹਨਤ ਨਾਲ ਆਪਣੀ ਇਸ ਕਮਜ਼ੋਰੀ ਨੂੰ ਦੂਰ ਕੀਤਾ ਤੇ ਵਿਸ਼ਵ ਰਿਕਾਰਡ ਕਾਇਮ ਕੀਤਾ।