ਪਟਿਆਲਾ, 17 ਜਨਵਰੀ (ਪੋਸਟ ਬਿਊਰੋ)- ਇਸ ਰਿਆਸਤੀ ਸ਼ਹਿਰ ਵਿੱਚ ਪੰਜਾਬ ਪੁਲਸ ਦਾ ਇਕ ਥਾਣੇਦਾਰ ਕੱਲ੍ਹ 30 ਹਜ਼ਾਰ ਰੁਪਏ ਦੀ ਰਿਸ਼ਵਤ ਲੈਂਦਾ ਰੰਗੇ ਹੱਥੀਂ ਗ੍ਰਿਫਤਾਰ ਕੀਤਾ ਗਿਆ। ਦੋਸ਼ੀ ਥਾਣੇਦਾਰ ਇਕ ਵਿਆਹੁਤਾ ਵੱਲੋਂ ਪਾਏ ਦਾਜ ਲਈ ਤੰਗ ਪਰੇਸ਼ਾਨ ਦੇ ਇਕ ਕੇਸ ਦੀ ਜਾਂਚ ਦੌਰਾਨ ਸਹੁਰੇ ਪਰਵਾਰ ਉੱਤੇ ਕੇਸ ਦਰਜ ਕਰਨ ਦੀ ਧਮਕੀ ਦੇ ਰਿਹਾ ਸੀ। ਉਸ ਦੇ ਖਿਲਾਫ ਵਿਜੀਲੈਂਸ ਨੇ ਕੇਸ ਦਰਜ ਕਰ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਵਿਜੀਲੈਂਸ ਬਿਊਰੋ ਦੇ ਇੰਸਪੈਕਟਰ ਪ੍ਰਿਤਪਾਲ ਸਿੰਘ ਨੇ ਦੱਸਿਆ ਕਿ ਸੁਰਜੀਤ ਸਿੰਘ ਨਿਵਾਸੀ ਗੁਰੂ ਨਾਨਕ ਨਗਰ ਪਟਿਆਲਾ ਤੇ ਉਸ ਦੀ ਪਤਨੀ ਰਜਨੀ ਹੰਸ ਦਾ ਅਦਾਲਤ ਵਿੱਚ ਤਲਾਕ ਦਾ ਕੇਸ ਚੱਲ ਰਿਹਾ ਹੈ। ਰਜਨੀ ਹੰਸ ਨੇ ਆਪਣੇ ਪਤੀ ਅਤੇ ਉਸ ਦੇ ਪਰਵਾਰ ਦੇ ਮੈਂਬਰਾਂ ਦੇ ਖਿਲਾਫ ਇਕ ਦਰਖਾਸਤ ਥਾਣਾ ਅਰਬਨ ਅਸਟੇਟ ਨੂੰ ਦਿੱਤੀ ਸੀ, ਜਿਸ ਵਿੱਚ ਉਸ ਨੇ ਦੋਸ਼ ਲਾਇਆ ਹੈ ਕਿ ਉਸ ਦਾ ਪਤੀ ਸੁਰਜੀਤ ਸਿੰਘ ਤੇ ਹੋਰ ਸਹੁਰੇ ਵਾਲੇ ਉਸ ਦੀ ਦਾਜ ਦੀ ਮੰਗ ਲਈ ਕੁੱਟਮਾਰ ਕਰਦੇ ਹਨ। ਇਸ ਕੇਸ ਦੀ ਜਾਂਚ ਥਾਣਾ ਅਰਬਨ ਅਸਟੇਟ ਵਿੱਚ ਤੈਨਾਤ ਥਾਣੇਦਾਰ ਸ਼ਸ਼ੀਪਾਲ ਕਰ ਰਿਹਾ ਸੀ। ਸ਼ਸ਼ੀਪਾਲ ਇਸ ਦਰਖਾਸਤ ਬਾਰੇ ਸ਼ਿਕਾਇਤ ਕਰਤਾ ਸੁਰਜੀਤ ਸਿੰਘ ਤੇ ਉਸ ਦੇ ਪਰਵਾਰ ਦੇ ਖਿਲਾਫ ਕੇਸ ਦਰਜ ਕਰਨ ਦੀ ਧਮਕੀ ਦੇ ਰਿਹਾ ਸੀ ਤੇ ਅਜਿਹਾ ਨਾ ਕਰਨ ਬਦਲੇ ਵਿੱਚ ਉਸ ਨੇ 30 ਹਜ਼ਾਰ ਰੁਪਏ ਰਿਸ਼ਵਤ ਦੀ ਮੰਗ ਕੀਤੀ ਸੀ। ਸੁਰਜੀਤ ਸਿੰਘ ਨੇ ਇਸ ਬਾਰੇ ਵਿਜੀਲੈਂਸ ਬਿਊਰੋ ਨੂੰ ਸਿ਼ਕਾਇਤ ਕਰ ਦਿੱਤੀ। ਕੱਲ੍ਹ ਸ਼ਿਕਾਇਤ ਦੇ 30 ਹਜ਼ਾਰ ਰੁਪਏ ਵਿੱਚੋਂ 10 ਹਜ਼ਾਰ ਰੁਪਏ ਲੈਂਦੇ ਹੋਏ ਦੋਸ਼ੀ ਥਾਣੇਦਾਰ ਸ਼ਸ਼ੀਪਾਲ ਨੂੰ ਵਿਜੀਲੈਂਸ ੇੀਮ ਨੇ ਥਾਣੇ ਤੋਂ ਗ੍ਰਿਫਤਾਰ ਕਰ ਲਿਆ।