ਪਿਛਲੇ ਸਾਲ ਵਿੱਚ ਇੱਕੋ ਫਿਲਮ ‘ਨਮਸਤੇ ਲੰਡਨ’ ਵਿੱਚ ਨਜ਼ਰ ਆਈ ਪਰਿਣੀਤੀ ਚੋਪੜਾ 2019 ਵਿੱਚ ਤਿੰਨ ਵੱਡੀਆਂ ਫਿਲਮਾਂ ਵਿੱਚ ਦਰਸ਼ਕਾਂ ਦੇ ਸਾਹਮਣੇ ਹੋਵੇਗੀ। ਇਸ ਵਿੱਚ ਅਰਜੁਨ ਕਪੂਰ ਦੇ ਆਪੋਜ਼ਿਟ ‘ਸੰਦੀਪ ਔਰ ਪਿੰਕੀ ਫਰਾਰ’, ਅਕਸ਼ੈ ਕੁਮਾਰ ਦੇ ਆਪੋਜ਼ਿਟ ‘ਕੇਸਰੀ’ ਅਤੇ ਸਿਧਾਰਥ ਕਪੂਰ ਦੇ ਆਪੋਜ਼ਿਟ ਫਿਲਮ ‘ਜਬਰੀਆ ਜੋੜੀ' ਸ਼ਾਮਲ ਹਨ। ਪਿਛਲੇ ਸਾਲ ਦੀ ਇੱਕੋ ਫਿਲਮ ‘ਨਮਸਤੇ ਲੰਡਨ’ ਦੇ ਬੁਰੀ ਤਰ੍ਹਾਂ ਫਲਾਪ ਹੋਣ ਕਰ ਕੇ ਉਸ 'ਤੇ ਇਸ ਸਾਲ ਦੀਆਂ ਆਪਣੀਆਂ ਇਨ੍ਹਾਂ ਤਿੰਨਾਂ ਬਾਰੇ ਦਬਾਅ ਕੁਝ ਵਧ ਗਿਆ ਹੈ, ਪਰ ਉਸ ਨੰ ਪੂਰਾ ਭਰੋਸਾ ਹੈ ਕਿ ਇਹ ਤਿੰਨੋਂ ਫਿਲਮਾਂ ਉਸ ਦੇ ਕਰੀਅਰ ਨੂੰ ਨਵਾਂ ਮੋੜ ਦੇਣ ਵਾਲੀਆਂ ਹੋਣਗੀਆਂ। ਇੱਕ ਸਮਾਂ ਪਰਿਣੀਤੀ ਨੂੰ ਮੋਟੇ ਹੋਣ 'ਤੇ ਆਲੋਚਨਾ ਵੀ ਝੱਲਣੀ ਪਈ ਸੀ, ਪਰ ਪਿੱਛੇ ਜਿਹੇ ਦੇ ਸਾਲਾਂ ਵਿੱਚ ਉਸ ਨੇ ਆਪਣੀ ਫਿਟਨੈੱਸ 'ਤੇ ਖੂਬ ਮਿਹਨਤ ਕੀਤੀ ਹੈ ਤੇ ਉਹ ਫਿਲਮਾਂ ਵਿੱਚ ਕੰਮ ਸ਼ੁਰੂ ਕਰਨ ਦੀ ਤੁਲਨਾ 'ਚ ਬਹੁਤ ਬਦਲੀ ਬਦਲੀ ਤੇ ਨਿਖਰੀ ਨਜ਼ਰ ਆਉਂਦੀ ਹੈ।
ਉਹ ਨਹੀਂ ਮੰਨਦੀ ਕਿ ਫਿਲਮ ਨਗਰੀ ਵਿੱਚ ਫਿਟਨੈਸ ਅਤੇ ਆਕਰਸ਼ਿਕ ਸਰੀਰਕ ਰੰਗ ਰੂਪ ਨੂੰ ਟੈਲੇਂਟ ਨਾਲ ਵੱਧ ਮਹੱਤਵ ਦਿੱਤਾ ਜਾਣ ਲੱਗਾ ਹੈ। ਉਹ ਕਹਿੰਦੀ ਹੈ, ‘‘ਅੱਜ ਵੀ ਟੈਲੇਂਟ ਹੀ ਸਭ ਕੁਝ ਹੈ, ਜੇ ਕਿਸੇ ਨੂੰ ਐਕਟਿੰਗ ਨਹੀਂ ਆਉਂਦੀ ਤਾਂ ਉਸ ਦੇ ਸੁੰਦਰ ਜਾਂ ਫਿੱਟ ਹੋਣ ਦਾ ਕੋਈ ਫਾਇਦਾ ਨਹੀਂ। ਜੋ ਵੀ ਕਲਾਕਾਰ ਸਾਲਾਂ ਤੋਂ ਫਿਲਮ ਨਗਰੀ ਵਿੱਚ ਹੈ ਅਤੇ ਜੋ ਵੀ ਨਵੇਂ ਕਲਾਕਾਰ ਸਫਲ ਹੋਏ ਹਨ, ਉਨ੍ਹਾਂ ਸਾਰਿਆਂ ਵਿੱਚ ਸਿਰਫ ਸੁੰਦਰਤਾ ਹੀ ਨਹੀਂ, ਉਹ ਆਪਣੇ ਟੈਲੇਂਟ ਦੇ ਦਮ 'ਤੇ ਇਥੇ ਟਿਕ ਸਕੇ ਹਨ। ਸ਼ੁਰੂ ਵਿੱਚ ਮੈਨੂੰ ਵੀ ਮੇਰੀ ਲੁਕਸ ਲਈ ਤਾਰੀਫਾਂ ਨਹੀਂ ਮਿਲੀਆਂ ਸਨ, ਪਰ ਮੈਂ ਇਥੇ ਇੰਨੇ ਸਾਲ ਗੁਜ਼ਾਰੇ ਹਨ ਤਾਂ ਉਹ ਸਿਰਫ ਇਸ ਲਈ ਮੈਂ ਕੁਝ ਚੰਗਾ ਕੰਮ ਕਰ ਕੇ ਵਿਖਾਇਆ ਹੈ।”
ਪਰਿਣੀਤੀ ਦਾ ਮੰਨਣਾ ਹੈ ਕਿ ਔਰਤਾਂ ਦੀ ਅਸਲੀ ਸੁੰਦਰਤਾ ਉਸ ਦੇ ਚਿਹਰੇ ਤੇ ਸਰੀਰ 'ਤੇ ਨਿਰਭਰ ਨਹੀਂ ਕਰਦੀ। ਉਸ ਨੇ ਕਿਹਾ, ‘‘ਔਰਤਾਂ ਹੀ ਨਹੀਂ, ਹਰ ਵਿਅਕਤੀ ਦੀ ਸੁੰਦਰਤਾ ਉਸ ਦੇ ਵਿਅਕਤੀਤਵ ਤੇ ਉਸ ਦੇ ਮਜ਼ਾਜ਼ 'ਚ ਲੁਕੀ ਹੁੰਦੀ ਹੈ। ਮੈਂ ਉਨ੍ਹਾਂ ਲੋਕਾਂ ਵੱਲ ਆਕਰਸ਼ਿਤ ਹੁੰਦੀ ਹਾਂ ਜੋ ਦਿਲ ਖੋਲ੍ਹ ਕੇ ਹੱਸਦੇ ਹਨ। ਮੈਨੂੰ ਉਹ ਔਰਤਾਂ ਪਸੰਦ ਹਨ, ਜੋ ਖੁੱਲ੍ਹ ਕੇ ਜਿਊਣਾ ਜਾਣਦੀਆਂ ਹਨ ਤੇ ਖੁਦ 'ਤੇ ਕਿਸੇ ਤਰ੍ਹਾਂ ਦਾ ਬੋਝ ਲੈ ਕੇ ਨਹੀਂ ਚਲਦੀਆਂ।” ਉਸ ਦਾ ਕਹਿਣਾ ਹੈ ਕਿ ਉਹ ‘ਬਾਡੀ ਸ਼ੇਮਿੰਗ’ ਭਾਵ ਕਿਸੇ ਦੇ ਸਰੀਰ ਨੂੰ ਲੈ ਕੇ ਉਸ ਦੀ ਆਲੋਚਨਾ ਕਰਨ ਵਾਲਿਆਂ ਦਾ ਸਖਤ ਵਿਰੋਧ ਕਰਦੀ ਰਹੀ ਹੈ ਤੇ ਹਰ ਕਿਸੇ ਨੂੰ ਉਹ ਜੋ ਵੀ ਹੋਵੇ, ਉਸ 'ਤੇ ਮਾਣ ਹੋਣਾ ਚਾਹੀਦਾ ਹੈ।