ਜਲੰਧਰ, 16 ਜਨਵਰੀ (ਪੋਸਟ ਬਿਊਰੋ)- ਥਾਣਾ ਲਾਂਬੜਾ ਪੁਲਸ ਨੇ ਪਿੰਡ ਹੁਸੈਨਪੁਰ ਵਾਸੀ ਟਰੈਵਲ ਏਜੰਟ ਲਵ ਕੁਮਾਰ (25) ਨੂੰ ਗ੍ਰਿਫਤਾਰ ਕੀਤਾ ਹੈ। ਉਸ ਉੱਤੇ ਇਹ ਦੋਸ਼ ਹੈ ਕਿ ਭੋਗਪੁਰ ਦੇ ਕਸ਼ਮੀਰ ਸਿੰਘ ਤੋਂ ਉਨ੍ਹਾਂ ਦੇ ਪੁੱਤਰਾਂ ਨੂੰ ਕੁਵੈਤ ਭੇਜਣ ਦੇ ਨਾਂਅ 'ਤੇ ਇੱਕ ਲੱਖ ਨੱਬੇ ਹਜ਼ਾਰ ਰੁਪਏ ਲਏ ਅਤੇ ਬਾਅਦ ਵਿੱਚ ਉਨ੍ਹਾ ਨੂੰ ਨਕਲੀ ਵੀਜ਼ਾ ਅਤੇ ਹਵਾਈ ਟਿਕਟਾਂ ਫੜਾ ਦਿੱਤੀਆਂ, ਜਿਸ ਕਾਰਨ ਉਹ ਜਾ ਨਹੀਂ ਸਨ ਸਕੇ।
ਭੋਗਪੁਰ ਦੇ ਨਿਜਾਮਦੀਪੁਰ ਦੇ ਵਾਸੀ ਕਸ਼ਮੀਰ ਸਿੰਘ ਨੇ ਪੁਲਸ ਨੂੰ ਦੱਸਿਆ ਕਿ ਦੋਸ਼ੀ ਲਵ ਕੁਮਾਰ ਨਾਲ ਉਸ ਦੇ ਦੋਵਾਂ ਪੁੱਤਰਾਂ ਨੂੰ ਕੁਵੈਤ ਭੇਜਣ ਬਾਰੇ ਉਸ ਦੀ ਗੱਲ ਹੋਈ ਅਤੇ 1.90 ਲੱਖ ਰੁਪਏ ਦੀ ਡੀਲ ਹੋਈ ਸੀ। ਜੂਨ 2018 ਵਿੱਚ ਉਨ੍ਹਾਂ ਨੇ ਦੋਸ਼ੀ ਲਵ ਕੁਮਾਰ ਨੂੰ ਡੀਲ ਦੇ ਮੁਤਾਬਕ ਚਾਲੀ ਹਜ਼ਾਰ ਰੁਪਏ ਐਡਵਾਂਸ ਦੇ ਕੇ ਪਾਸਪੋਰਟ ਅਤੇ ਹੋਰ ਦਸਤਾਵੇਜ਼ ਦਿੱਤੇ। ਇਸ ਪਿੱਛੋਂ ਲਵ ਨੇ ਡੀਲ ਮੁਤਾਬਕ ਬਕਾਇਆ 1.40 ਲੱਖ ਰੁਪਏ ਲੈ ਕੇ ਕੁਵੈਤ ਦਾ ਵੀਜ਼ਾ ਅਤੇ ਉਥੇ ਜਾਣ ਦੀਆਂ ਦੋ ਹਵਾਈ ਟਿਕਟਾਂ ਫੜਾ ਦਿੱਤੀਆਂ। ਜਦ ਉਸ ਦੇ ਦੋਵਾਂ ਪੁੱਤਰ ਵਰਿੰਦਰ ਸਿੰਘ ਅਤੇ ਰਾਜਿੰਦਰ ਦਿੱਲੀ ਦੇ ਇੰਦਰਾ ਗਾਂਧੀ ਇੰਟਰਨੈਸ਼ਨਲ ਏਅਰਪੋਰਟ ਪਹੁੰਚੇ ਤਾਂ ਪਤਾ ਲੱਗਾ ਕਿ ਵੀਜ਼ਾ ਤੇ ਟਿਕਟਾਂ ਨਕਲੀ ਹਨ। ਕਸ਼ਮੀਰ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਨੇ ਆਰ ਪੀ ਲਵ ਕੁਮਾਰ ਤੋਂ ਪੈਸੇ ਵਾਪਸ ਮੰਗੇ। ਦੋਸ਼ੀ ਨੇ ਉਨ੍ਹਾਂ ਨੂੰ 50 ਹਜ਼ਾਰ ਅਤੇ ਅੱਸੀ ਹਜ਼ਾਰ ਰੁਪਏ ਦੇ ਚੈਕ ਦਿੱਤੇ, ਪਰ ਇਹ ਦੋਵੇਂ ਚੈਕ ਬਾਊਂਸ ਹੋ ਗਏ।
ਐੱਸ ਐੱਚ ਓ ਪੁਸ਼ਪ ਬਾਲੀ ਨੇ ਦੱਸਿਆ ਕਿ ਲਵ ਕੁਮਾਰ ਦੇ ਖਿਲਾਫ 10 ਜਨਵਰੀ ਨੂੰ ਕੇਸ ਦਰਜ ਕੀਤਾ ਗਿਆ ਸੀ। ਉਸ ਨੂੰ ਜਦ ਇਸ ਦੀ ਭਿਣਕ ਲੱਗੀ ਤਾਂ ਫਰਾਰ ਹੋ ਗਿਆ ਅਤੇ ਟਿਕਾਣੇ ਬਦਲ ਕੇ ਰਹਿਣ ਲੱਗਾ। ਉਨ੍ਹਾਂ ਨੂੰ ਸੂਚਨਾ ਮਿਲੀ ਕਿ ਦੋਸ਼ੀ ਲਾਂਬੜਾ ਤੋਂ ਕਲਿਆਣਪੁਰ ਨੂੰ ਜਾ ਰਿਹਾ ਹੈ। ਪੁਲਸ ਨੇ ਮੌਕੇ 'ਤੇ ਪਹੁੰਚ ਕੇ ਉਸ ਨੂੰ ਫੜ ਲਿਆ। ਬਾਲੀ ਨੇ ਦੱਸਿਆ ਕਿ ਦੋਸ਼ੀ ਲਵ ਕੁਮਾਰ ਦੇ ਖਿਲਾਫ ਇਸ ਤੋਂ ਪਹਿਲਾਂ ਲੁੱਟ ਅਤੇ ਕੁੱਟਮਾਰ ਦੇ ਸਾਲ 2009 ਤੋਂ 2015 ਦੇ ਅੰਦਰ ਥਾਣਾ ਲਾਂਬੜਾ ਵਿੱਚ ਪੰਜ ਕੇਸ ਦਰਜ ਹੋ ਚੁੱਕੇ ਹਨ।