ਲੰਡਨ, 16 ਜਨਵਰੀ (ਪੋਸਟ ਬਿਊਰੋ) : ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਥੈਰੇਸਾ ਮੇਅ ਨੇ ਬੁੱਧਵਾਰ ਨੂੰ ਪਾਰਲੀਆਮੈਂਟ ਵਿੱਚ ਪਾਇਆ ਗਿਆ ਬੇਭਰੋਸਗੀ ਵੋਟ ਜਿੱਤ ਲਿਆ ਹੈ ਤੇ ਹੁਣ ਉਹ ਆਫਿਸ ਵਿੱਚ ਬਣੀ ਰਹੇਗੀ। ਪਰ ਯੂਰਪੀਅਨ ਯੂਨੀਅਨ ਨਾਲੋਂ ਤੋੜ ਵਿਛੋੜੇ ਲਈ ਕੀਤੀ ਅਸਫਲ ਕੋਸਿ਼ਸ਼ ਕਾਰਨ ਉਨ੍ਹਾਂ ਦੀ ਬਹੁਤੀ ਸ਼ਕਤੀ ਚਲੀ ਗਈ ਹੈ।
ਮੇਅ ਨੂੰ ਇਹ ਜਿੱਤ 306 ਦੇ ਮੁਕਾਬਲੇ 325 ਦੇ ਮਾਮੂਲੀ ਫਰਕ ਨਾਲ ਮਿਲੀ। ਇਸ ਵਾਰੀ ਵਿਰੋਧੀ ਧਿਰ ਮੇਅ ਸਰਕਾਰ ਡੇਗ ਕੇ ਆਮ ਚੋਣਾਂ ਕਰਵਾਉਣ ਲਈ ਤਿਆਰ ਨਜ਼ਰ ਆਈ। ਬੇਭਰੋਸਗੀ ਮਤੇ ਨੂੰ ਮਾਤ ਦੇਣ ਤੋਂ ਬਾਅਦ ਮੇਅ ਨੇ ਆਖਿਆ ਕਿ ਉਹ ਯੂਰਪੀਅਨ ਯੂਨੀਅਨ ਤੋਂ ਬ੍ਰਿਟੇਨ ਨੂੰ ਵੱਖ ਕਰਨ ਲਈ ਵਿਰੋਧੀ ਧਿਰਾਂ ਦੇ ਆਗੂਆਂ ਨਾਲ ਉਸਾਰੂ ਲੀਹ ਉੱਤੇ ਹੀ ਗੱਲਬਾਤ ਕਰੇਗੀ।
ਕਈ ਨਿੱਕੀਆਂ ਪਾਰਟੀਆਂ ਦੇ ਆਗੂਆਂ ਨਾਲ ਮੀਟਿੰਗ ਕਰਨ ਤੋਂ ਬਾਅਦ ਆਪਣੇ 10 ਡਾਊਨਿੰਗ ਸਟਰੀਟ ਰੈਜ਼ੀਡੈਂਸ ਦੇ ਬਾਹਰ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਮੇਅ ਨੇ ਆਖਿਆ ਕਿ ਉਹ ਵਿਰੋਧੀ ਧਿਰਾਂ ਨੂੰ ਇਹੋ ਆਖਣਾ ਚਾਹੁੰਦੀ ਹੈ ਕਿ ਆਪਣੇ ਨਿਜੀ ਹਿਤਾਂ ਨੂੰ ਪਾਸੇ ਰੱਖ ਕੇ ਆਮ ਸਹਿਮਤੀ ਬਣਾਉਣ ਤਾਂ ਕਿ ਯੂਰਪੀਅਨ ਯੂਨੀਅਨ ਤੋਂ ਪਾਸੇ ਹੋਇਆ ਜਾ ਸਕੇ।