ਬਠਿੰਡਾ, 14 ਜਨਵਰੀ (ਪੋਸਟ ਬਿਊਰੋ)- ਤਲਵੰਡੀ ਸਾਬੋ ਦੇ ਪਿੰਡ ਬਹਿਮਣ ਜੱਸਾ ਸਿੰਘ ਵਿੱਚ 29 ਸਤੰਬਰ 2007 ਨੂੰ ਹੋਏ ਸਮੂਹਿਕ ਆਤਮ ਹੱਤਿਆ ਕਾਂਡ ਦੇ ਪੀੜਤ ਪਰਵਾਰ ਨੂੰ 11 ਸਾਲ ਪਿੱਛੋਂ ਇਨਸਾਫ ਦੀ ਆਸ ਬੱਝੀ ਹੈ। ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਨੇ ਇਸ ਮਾਮਲੇ ਵਿੱਚ ਦੋ ਪੁਲਸ ਇੰਸਪੈਕਟਰਾਂ ਸਮੇਤ ਨੌਂ ਪੁਲਸ ਮੁਲਾਜ਼ਮਾਂ ਦੇ ਖਿਲਾਫ ਖੁਦਕੁਸ਼ੀ ਦੇ ਲਈ ਮਜਬੂਰ ਕਰਨ, ਲਾਪਰਵਾਹੀ ਵਰਤਣ ਅਤੇ ਸਬੂਤ ਮਿਟਾਉਣ ਦਾ ਕੇਸ ਦਰਜ ਕਰਨ ਨੂੰ ਕਿਹਾ ਹੈ।
ਵਰਲਡ ਹਿਊਮਨ ਰਾਈਟਸ ਪ੍ਰੋਟੈਕਸ਼ਨ ਕੌਂਸਲ ਦੇ ਚੇਅਰਮੈਨ ਤੇ ਵਕੀਲ ਰੰਜਨ ਲਖਨਪਾਲ ਦੀ 'ਤੇ ਸ਼ੁੱਕਰਵਾਰ ਨੂੰ ਜਸਟਿਸ ਮਹੇਸ਼ ਗਰੋਵਰ ਅਤੇ ਜਸਟਿਸ ਅਗਸਟੀਨ ਜਾਰਜ ਮਸੀਹ ਦੀ ਬੈਂਚ ਨੇ ਇਸ ਬਾਰੇ ਹੁਕਮ ਦਿੱਤੇ ਹਨ। ਕੋਰਟ ਨੇ ਓਦੋਂ ਦੇ ਥਾਣਾ ਇੰਚਾਰਜ ਮਹਿੰਦਰਪਾਲ ਘਈ (ਅੱਜ ਕੱਲ੍ਹ ਸੇਵਾ ਮੁਕਤ), ਏ ਐੱਸ ਆਈ ਅੰਮ੍ਰਿਤਪਾਲ ਸਿੰਘ (ਸੀ ਆਈ ਏ ਇੰਚਾਰਜ), ਏ ਐੱਸ ਆਈ ਗੁਰਜੰਟ ਸਿੰਘ, ਹੈੱਡ ਕਾਂਸਟੇਬਲ ਮੰਦਰ ਸਿੰਘ ਅਤੇ ਮੇਜਰ ਸਿੰਘ, ਐੱਸ ਪੀ ਓ ਕਾਕਾ ਸਿੰਘ, ਹੋਮਗਾਰਡ ਜਵਾਨ ਅਮਰੀਕ ਸਿੰਘ ਤੇ ਮਹਿੰਦਰ ਸਿੰਘ ਦੇ ਖਿਲਾਫ ਕੇਸ ਦਰਜ ਕਰਨ ਦੇ ਹੁਕਮ ਦਿੱਤੇ ਹਨ। ਇਸ ਬਾਰੇ ਅਦਾਲਤ ਨੇ ਕਿਹਾ ਕਿ ਪੁਲਸ ਮੁਲਾਜ਼ਮਾਂ ਨੂੰ ਭੱਜਣ ਦੀ ਥਾਂ ਅੱਗ ਵਿੱਚ ਝੁਲਸ ਰਹੇ ਲੋਕਾਂ ਨੂੰ ਬਚਾਉਣਾ ਚਾਹੀਦਾ ਸੀ। 11 ਸਾਲ ਪੁਰਾਣੀ ਘਟਨਾ ਵਿੱਚ ਚਾਰ ਜਣਿਆਂ ਦੀ ਸੜ ਕੇ ਮੌਤ ਹੋ ਗਈ ਸੀ।
ਵਰਨਣ ਯੋਗ ਹੈ ਕਿ 29 ਦਸੰਬਰ 2007 ਨੂੰ ਪਿੰਡ ਦੇ ਕਿਸਾਨ ਗੁਰਜੰਟ ਸਿੰਘ, ਉਸ ਦੀ ਪਤਨੀ ਜਸਵੀਰ ਕੌਰ ਤੇ ਦੋ ਧੀਆਂ ਬੇਅੰਤ ਕੌਰ ਅਤੇ ਵੀਰਪਾਲ ਕੌਰ ਦੀ ਸੜ ਕੇ ਮੌਤ ਹੋ ਗਈ ਸੀ ਅਤੇ ਦੋ ਧੀਆਂ ਸੁਖਪਾਲ ਕੌਰ ਅਤੇ ਹਰਦੀਪ ਕੌਰ ਝੁਲਸ ਗਈਆਂ ਸਨ। ਇਸ ਘਟਨਾ ਵਿੱਚ ਜਿੰਦਾ ਬਚੀਆਂ ਬੇਟੀਆਂ ਨੇ ਦੋਸ਼ ਲਾਇਆ ਸੀ ਕਿ ਥਾਣਾ ਤਲਵੰਡੀ ਦੇ ਓਦੋਂ ਦੇ ਥਾਣਾ ਇੰਚਾਰਜ ਮਹਿੰਦਰਪਾਲ ਘਈ, ਏ ਐੱਸ ਆਈ ਅੰਮ੍ਰਿਤਪਾਲ ਸਮੇਤ ਹੋਰ ਪੁਲਸ ਵਾਲੇ ਛਾਪੇਮਾਰੀ ਦੇ ਨਾਂਅ ਉਤੇ ਕੰਧ ਟੱਪ ਕੇ ਅੰਦਰ ਵੜੇ ਸਨ। ਪਰਵਾਰ 'ਤੇ ਜ਼ਮੀਨੀ ਝਗੜੇ ਦਾ ਪਰਚਾ ਦਰਜ ਕਰਵਾਉਣ ਵਾਲੇ ਪਿੰਡ ਦੇ ਗੁਰਤੇਜ ਅਤੇ ਬੂਟਾ ਸਿੰਘ ਵੀ ਨਾਲ ਸਨ। ਉਨ੍ਹਾਂ ਦੇ ਘਰ ਦਾ ਬਿਜਲੀ ਕੁਨੈਕਸ਼ਨ ਕੱਟ ਦਿੱਤਾ ਗਿਆ ਸੀ ਅਤੇ ਪੁਲਸ ਨੇ ਪਰਵਾਰ 'ਤੇ ਮਿੱਟੀ ਦਾ ਤੇਲ ਛਿੜਕ ਕੇ ਅੱਗ ਲਾ ਦਿੱਤੀ ਸੀ।