ਓਟਵਾ, 13 ਜਨਵਰੀ (ਪੋਸਟ ਬਿਊਰੋ) : ਸੋਮਵਾਰ ਨੂੰ ਪ੍ਰਧਾਨ ਮੰਤਰੀ ਆਪਣੇ ਮੰਤਰੀ ਮੰਡਲ ਵਿੱਚ ਕਿਹੋ ਜਿਹੀ ਫੇਰਬਦਲ ਕਰਨਗੇ ਇਹ ਗੱਲ ਸਿਆਸੀ ਸਫਾਂ ਵਿੱਚ ਕਾਫੀ ਗਰਮਾਈ ਹੋਈ ਹੈ। ਜਿ਼ਕਰਯੋਗ ਹੈ ਕਿ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਉਸ ਸਮੇਂ ਆਪਣੇ ਮੰਤਰੀ ਮੰਡਲ ਵਿੱਚ ਫੇਰਬਦਲ ਦਾ ਐਲਾਨ ਕਰਨਾ ਪਿਆ ਜਦੋਂ ਸਕੌਟ ਬ੍ਰਿਸਨ ਨੇ ਖਜ਼ਾਨਾ ਬੋਰਡ ਦੇ ਪ੍ਰੈਜ਼ੀਡੈਂਟ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ।
ਇਹ ਉਮੀਦ ਵੀ ਪ੍ਰਗਟਾਈ ਜਾ ਰਹੀ ਹੈ ਕਿ ਕੈਬਨਿਟ ਵਿਚਲਾ ਇਹ ਫੇਰਬਦਲ ਨਿੱਕਾ ਹੀ ਹੋਵੇਗਾ। ਇਹ ਸਾਰਾ ਕੁੱਝ ਬ੍ਰਿਸਨ ਦੀ ਵਿਦਾਇਗੀ ਨੂੰ ਧਿਆਨ ਵਿੱਚ ਰੱਖਕੇ ਹੀ ਕੀਤਾ ਜਾ ਰਿਹਾ ਹੈ। ਪਰ ਖਜ਼ਾਨਾ ਬੋਰਡ ਦੀ ਅਹਿਮੀਅਤ ਨੂੰ ਵੇਖਦਿਆਂ ਹੋਇਆਂ ਤੇ ਖਾਸਤੌਰ ਉੱਤੇ ਗੱਲ ਜਦੋਂ ਸਰਕਾਰੀ ਖਰਚੇ ਦੀ ਆਉਂਦੀ ਹੈ ਤਾਂ ਕੁੱਝ ਐਡਜਸਟਮੈਂਟ ਤਾਂ ਕਰਨੀ ਬਣਦੀ ਹੈ। ਇਸ ਲਈ ਇਸ ਫੇਰਬਦਲ ਵਿੱਚ ਕੋਈ ਵੱਡਾ ਨਾਂ ਵੀ ਸ਼ਾਮਲ ਹੋ ਸਕਦਾ ਹੈ।
ਬ੍ਰਿਸਨ ਦੇ ਜਾਣ ਨਾਲ ਟਰੂਡੋ ਮੰਤਰੀ ਮੰਡਲ ਵਿੱਚ ਨੋਵਾ ਸਕੋਸ਼ੀਆ ਦਾ ਇਲਾਕਾ ਨੁਮਾਇੰਦਗੀ ਤੋਂ ਬਿਨਾ ਹੀ ਰਹਿ ਗਿਆ ਹੈ। ਇਸ ਖਲਾਅ ਨੂੰ ਵੀ ਸੋਮਵਾਰ ਨੂੰ ਹੋਣ ਵਾਲੇ ਫੇਰਬਦਲ ਵਿੱਚ ਭਰਨ ਦੀ ਕੋਸਿ਼ਸ਼ ਕੀਤੀ ਜਾਵੇਗੀ। ਇੱਥੇ ਇਹ ਦੱਸਣਾ ਬਣਦਾ ਹੈ ਕਿ ਨੋਵਾ ਸਕੋਸ਼ੀਆ ਦੀ ਸਾਰੀਆਂ 11 ਸੀਟਾਂ ਲਿਬਰਲਾਂ ਕੋਲ ਹੀ ਹਨ। ਪਰ ਸੀਨੀਅਰ ਸਰੋਤਾਂ ਅਨੁਸਾਰ ਸ਼ਾਨ ਫਰੇਜ਼ਰ ਤੇ ਬਰਨਾਡੈਟੇ ਜੌਰਡਨ ਸੰਭਾਵੀ ਉਮੀਦਵਾਰ ਹੋ ਸਕਦੇ ਹਨ।