ਚੰਡੀਗੜ੍ਹ, 10 ਜਨਵਰੀ (ਪੋਸਟ ਬਿਊਰੋ)- ਜੀਂਦ ਵਿਧਾਨ ਸਭਾ ਸੀਟ ਉੱਤੇ 28 ਜਨਵਰੀ ਨੂੰ ਹੋਣ ਵਾਲੀ ਉਪ ਚੋਣ ਵਿੱਚ ਕਾਂਗਰਸ ਪਾਰਟੀ ਦੇ ਮੀਡੀਆ ਸੈਲ ਦੇ ਕੌਮੀ ਇੰਚਾਰਜ ਰਣਦੀਪ ਸੂਰਜੇਵਾਲਾ ਕਾਂਗਰਸ ਉਮੀਦਵਾਰ ਹੋਣਗੇ।
ਕਾਂਗਰਸ ਪਾਰਟੀ ਦੀ ਦਿੱਲੀ ਵਿੱਚ ਹੋਈ ਮੀਟਿੰਗ ਪਿੱਛੋਂ ਕਾਂਗਰਸ ਚੋਣ ਕਮੇਟੀ ਦੇ ਬੁਲਾਰੇ ਕੇ ਸੀ ਵੇਣੂਗੋਪਾਲ ਨੇ ਕਿਹਾ ਕਿ ਉਮੀਦਵਾਰ ਦਾ ਨਾਮ ਹਾਈ ਕਮਾਨ ਨੂੰ ਭੇਜ ਦਿੱਤਾ ਗਿਆ ਹੈ। ਉਂਜ ਇਸ ਮੀਟਿੰਗ ਦੇ ਬਾਅਦ ਵੀ ਨਾਮ ਉੱਤੇ ਸਸਪੈਂਸ ਕਾਇਮ ਰਿਹਾ ਸੀ। ਫਿਰ ਕਾਂਗਰਸ ਪ੍ਰਧਾਨ ਰਾਹੁਲ ਗਾਂਧੀ ਦੀ ਸਹਿਮਤੀ ਮਗਰੋਂ ਰਣਦੀਪ ਸੂਰਜੇਵਾਲਾ ਦਾ ਨਾਮ ਐਲਾਨ ਕਰਕੇ ਕਾਂਗਰਸ ਨੇ ਸਾਰਿਆਂ ਨੂੰ ਹੈਰਾਨ ਕਰ ਦਿੱਤਾ। ਦੂਸਰੇ ਪਾਸੇ ਭਾਜਪਾ ਨੇ ਜੀਂਦ ਉਪ ਚੋਣ ਵਾਸਤੇ ਕ੍ਰਿਸ਼ਨਾ ਮਿੱਡਾ ਨੂੰ ਪਾਰਟੀ ਉਮੀਦਵਾਰ ਬਣਾਇਆ ਹੈ। ਕ੍ਰਿਸ਼ਨ ਮਿੱਡਾ ਮਰਹੂਮ ਵਿਧਾਇਕ ਡਾ. ਹਰੀਚੰਦ ਮਿੱਡਾ ਦੇ ਪੁੱਤਰ ਹਨ ਅਤੇ ਕੁਝ ਮਹੀਨੇ ਪਹਿਲਾਂ ਉਹ ਇਨੈਲੋ ਪਾਰਟੀ ਛੱਡ ਕੇ ਭਾਜਪਾ ਵਿੱਚ ਸ਼ਾਮਲ ਹੋਏ ਸਨ। ਡਾ. ਹਰੀਚੰਦ ਮਿੱਡਾ ਦੇ ਦੇਹਾਂਤ ਦੇ ਕਾਰਨ ਹੀ ਇਹ ਵਿਧਾਨ ਸਭਾ ਸੀਟ ਖਾਲੀ ਹੋਈ ਸੀ।