ਬੀਜਿੰਗ, 9 ਜਨਵਰੀ (ਪੋਸਟ ਬਿਊਰੋ)- ਚੀਨ ਦੇ ਇਕ ਪ੍ਰਾਇਮਰੀ ਸਕੂਲ 'ਚ ਕੱਲ੍ਹ ਸਾਬਕਾ ਮੁਲਾਜ਼ਮ ਨੇ ਹਥੌੜੇ ਜਿਹੇ ਹਥਿਆਰ ਨਾਲ ਹਮਲਾ ਕਰਕੇ 20 ਬੱਚਿਆਂ ਨੂੰ ਜ਼ਖਮੀ ਕਰ ਦਿੱਤਾ। ਜ਼ਖਮੀ ਬੱਚਿਆਂ ਨੂੰ ਬੀਜਿੰਗ ਚਿਲਡ੍ਰਨ ਹਸਪਤਾਲ 'ਚ ਭਰਤੀ ਕਰਵਾਇਆ ਗਿਆ ਹੈ। ਇਨ੍ਹਾਂ 'ਚੋਂ ਤਿੰਨ ਦੀ ਹਾਲਤ ਕਾਫੀ ਗੰਭੀਰ ਹੈ।
ਰਾਜਧਾਨੀ ਬੀਜਿੰਗ ਦੇ ਸ਼ਿਚੇਂਗ ਜ਼ਿਲੇ 'ਚ ਸਥਿਤ ਨੰਬਰ ਵਨ ਪ੍ਰਾਇਮਰੀ ਸਕੂਲ ਦੇ ਬੱਚਿਆਂ 'ਤੇ ਇਹ ਹਮਲਾ ਉਸ ਸਮੇਂ ਹੋਇਆ ਜਦੋਂ ਉਹ ਦੌੜਨ ਲਈ ਬਣਾਏ ਗਏ ਟ੍ਰੈਕ 'ਤੇ ਕਸਰਤ ਕਰ ਰਹੇ ਸਨ। ਦੱਸਿਆ ਜਾ ਰਿਹਾ ਹੈ ਕਿ ਹਮਲਾਵਰ ਪਹਿਲਾਂ ਉਸੇ ਸਕੂਲ 'ਚ ਦਰਬਾਨ ਸੀ। ਆਪਣੀ ਪ੍ਰੋਬੇਸ਼ਨ ਮਿਆਦ ਪਾਸ ਨਾ ਕਰ ਸਕਣ ਕਾਰਨ ਉਹ ਗੁੱਸੇ 'ਚ ਸੀ। ਇਸੇ ਕਾਰਨ ਬੱਚਿਆਂ ਨੂੰ ਵੇਖਦੇ ਹੀ ਉਸ ਨੇ ਹਥੌੜੇ ਜਿਹੇ ਹਥਿਆਰ ਨਾਲ ਉਨ੍ਹਾਂ ਦੇ ਸਿਰ 'ਤੇ ਵਾਰ ਕਰਨਾ ਸ਼ੁਰੂ ਕਰ ਦਿੱਤਾ। ਬਾਅਦ 'ਚ ਇਕ ਅਧਿਆਪਕ ਦੇ ਰੋਕਣ 'ਤੇ ਉਹ ਰੁਕਿਆ। ਜਨਵਰੀ 2017 'ਚ ਵੀ ਇਸੇ ਤਰ੍ਹਾਂ ਦੀ ਘਟਨਾ 'ਚ ਇਕ ਕਿਸਾਨ ਨੇ ਪਿੰਗਜਿਆਂਗ ਸ਼ਹਿਰ ਸਥਿਤ ਸਕੂਲ 'ਚ ਵੜ ਕੇ 12 ਬੱਚਿਆਂ ਨੂੰ ਚਾਕੂ ਮਾਰ ਕੇ ਜ਼ਖਮੀ ਕਰ ਦਿੱਤਾ ਸੀ। ਉਸ ਨੂੰ ਬੀਤੇ ਸ਼ੁੱਕਰਵਾਰ ਨੂੰ ਫਾਂਸੀ ਦੇ ਦਿੱਤੀ ਗਈ।