ਸਕਾਰਬੌਰੋ, 9 ਜਨਵਰੀ (ਪੋਸਟ ਬਿਊਰੋ) : ਮੰਗਲਵਾਰ ਦੁਪਹਿਰ ਨੂੰ ਸਕਾਰਬੌਰੋ ਵਿੱਚ ਇੱਕ ਰਿਹਾਇਸ਼ੀ ਬਿਲਡਿੰਗ ਵਿੱਚ ਦੋ ਵਿਅਕਤੀਆਂ ਦੇ ਮ੍ਰਿਤਕ ਪਾਏ ਜਾਣ ਦੇ ਮਾਮਲੇ ਦੀ ਪੁਲਿਸ ਜਾਂਚ ਕਰ ਰਹੀ ਹੈ।
ਪੁਲਿਸ ਅਧਿਕਾਰੀਆਂ ਨੂੰ ਸਕਾਰਬੌਰੋ ਜੰਕਸ਼ਨ ਦੇ ਨਾਲ ਲੱਗਦੇ ਸੇਂਟ ਕਲੇਅਰ ਐਵਨਿਊ ਈਸਟ ਦੇ ਦੱਖਣ ਵੱਲ ਬਰਚਮਾਊਂਟ ਰੋਡ ਇਲਾਕੇ ਵਿੱਚ ਪੈਂਦੀ ਇਮਾਰਤ ਵਿੱਚ ਸੱਦਿਆ ਗਿਆ। ਇਹ ਗੱਲ ਰਾਤ ਦੇ 2:17 ਵਜੇ ਦੀ ਹੈ। ਮੌਕੇ ਉੱਤੇ ਪਹੁੰਚੇ ਪੁਲਿਸ ਅਧਿਕਾਰੀਆਂ ਨੇ ਦੋ ਵਿਅਕਤੀਆਂ ਨੂੰ ਗੰਭੀਰ ਜ਼ਖ਼ਮੀ ਹਾਲਤ ਵਿੱਚ ਪਾਇਆ। ਕਾਂਸਟੇਬਲ ਐਲੀਸਨ ਡਗਲਸ ਕੁੱਕ ਨੇ ਆਖਿਆ ਕਿ ਮਹਿਲਾ ਇਮਾਰਤ ਦੇ ਅੰਦਰ ਪਾਈ ਗਈ ਜਦਕਿ ਵਿਅਕਤੀ ਇਮਾਰਤ ਦੇ ਬਾਹਰ ਮਿਲਿਆ। ਪੁਲਿਸ ਨੂੰ ਅਜੇ ਤੱਕ ਦੋਵਾਂ ਵਿਚਲੇ ਰਿਸ਼ਤੇ ਦਾ ਪਤਾ ਨਹੀਂ ਚੱਲ ਸਕਿਆ ਹੈ।
ਕੁੱਕ ਨੇ ਦੱਸਿਆ ਕਿ ਇਹ ਮੌਤਾ ਸ਼ੱਕੀ ਲੱਗ ਰਹੀਆਂ ਹਨ। ਪਰ ਜਾਂਚਕਾਰ ਅਜੇ ਵੀ ਇਹ ਪਤਾ ਲਾਉਣ ਦੀ ਕੋਸਿ਼ਸ਼ ਕਰ ਰਹੇ ਹਨ ਕਿ ਕਿਤੇ ਇਹ ਮੌਤਾਂ ਕਤਲ ਦਾ ਮਾਮਲਾ ਤਾਂ ਨਹੀਂ ਹਨ। ਪੁਲਿਸ ਨੇ ਆਖਿਆ ਕਿ ਹਾਲ ਦੀ ਘੜੀ ਲੋਕਾਂ ਨੂੰ ਕੋਈ ਖਤਰਾ ਨਹੀਂ ਹੈ। ਇਸੇ ਲਈ ਨਾ ਤਾਂ ਮ੍ਰਿਤਕਾਂ ਤੇ ਨਾ ਹੀ ਮਸ਼ਕੂਕਾਂ ਬਾਰੇ ਕੋਈ ਜਾਣਕਾਰੀ ਜਾਰੀ ਕੀਤੀ ਗਈ ਹੈ।