ਗੋਹਾਨਾ, 8 ਜਨਵਰੀ (ਪੋਸਟ ਬਿਊਰੋ)- ਜੰਗਲਾਤ ਵਿਭਾਗ ਵਿੱਚ ਫਾਰੈਸਟ ਗਾਰਡ ਅਮਿਤ ਕੁਮਾਰ (24) ਨੇ ਬੀਤੇ ਦਿਨ ਦਫਤਰ ਵਿਚ ਫਾਹਾ ਲਾ ਕੇ ਖੁਦਕੁਸ਼ੀ ਕਰ ਲਈ। ਕਰਮਚਾਰੀ ਜਦ ਕਮਰੇ ਵਿੱਚ ਜਾਣ ਲੱਗੇ ਤਾਂ ਦਰਵਾਜ਼ਾ ਅੰਦਰੋਂ ਬੰਦ ਸੀ। ਖਿੜਕੀ 'ਚੋਂ ਦੇਖਣ 'ਤੇ ਉਸ ਦੀ ਲਾਸ਼ ਲਟਕਦੀ ਦਿਖਾਈ ਦਿੱਤੀ। ਮ੍ਰਿਤਕ ਦੀ ਪਤਨੀ ਸ਼ੀਤਲ ਨੇ ਰੇਂਜ ਅਫਸਰ 'ਤੇ ਉਸ ਦੇ ਪਤੀ ਨੂੰ ਪ੍ਰੇਸ਼ਾਨ ਕਰਨ ਦਾ ਦੋਸ਼ ਲਾਇਆ ਹੈ।
ਗੋਹਾਨਾ ਕੋਰਟ ਕੰਪਲੈਕਸ ਪੁਲਸ ਚੌਕੀ ਦੇ ਮੁਖੀ ਰਣਬੀਰ ਸਿੰਘ ਨੇ ਦੱਸਿਆ ਕਿ ਮ੍ਰਿਤਕ ਦੀ ਪਤਨੀ ਸ਼ੀਤਲ ਦੀ ਸ਼ਿਕਾਇਤ ਉੱਤੇ ਰੇਂਜ ਅਫਸਰ ਮਨੋਜ ਕੁਮਾਰ ਦੇ ਖਿਲਾਫ ਕੇਸ ਦਰਜ ਕੀਤਾ ਗਿਆ ਹੈ। ਘਿਲੌੜ ਕਲਾਂ ਦਾ ਅਮਿਤ ਕੁਮਾਰ ਸਾਲ 2014 ਵਿੱਚ ਜੰਗਲਾਤ ਵਿਭਾਗ ਵਿੱਚ ਫਾਰੈਸਟ ਗਾਰਡ ਭਰਤੀ ਹੋਇਆ ਸੀ। ਉਸ ਦੀ ਡਿਊਟੀ ਕਥੂਰਾ ਬਲਾਕ ਵਿੱਚ ਸੀ। ਕੱਲ੍ਹ ਸਵੇਰੇ ਉਹ ਦਫਤਰ ਪਹੁੰਚਿਆ ਅਤੇ ਇੱਕ ਕਮਰੇ ਵਿੱਚ ਪੱਖੇ ਦੀ ਹੁੱਕ ਨੂੰ ਰੱਸੀ ਪਾ ਕੇ ਫਾਹਾ ਲਾ ਲਿਆ। ਮ੍ਰਿਤਕ ਦੀ ਪਤਨੀ ਸ਼ੀਤਲ ਦਾ ਦੋਸ਼ ਹੈ ਕਿ ਰੇਂਜ ਅਧਿਕਾਰੀ ਉਸ ਨੂੰ ਨਾਜਾਇਜ਼ ਤੰਗ ਕਰਦਾ ਸੀ। ਅਮਿਤ ਨੇ ਇਸ ਬਾਰੇ ਵਿੱਚ ਘਰ 'ਤੇ ਵੀ ਕਈ ਵਾਰ ਦੱਸਿਆ ਸੀ। ਜ਼ੁਲਮ ਦੇ ਕਾਰਨ ਉਹ ਮਾਨਸਿਕ ਤੌਰ 'ਤੇ ਪ੍ਰੇਸ਼ਾਨ ਰਹਿੰਦਾ ਸੀ। ਪਿਛਲੇ ਕਈ ਦਿਨਾਂ ਤੋਂ ਉਹ ਕਾਫੀ ਦੁਖੀ ਸੀ। ਅਧਿਕਾਰੀ ਦੇ ਜ਼ੁਲਮ ਦੇ ਕਾਰਨ ਹੀ ਉਸ ਦੇ ਪਤੀ ਨੇ ਖੁਦਕੁਸ਼ੀ ਕੀਤੀ ਹੈ।