ਮੇਰਠ, 8 ਜਨਵਰੀ (ਪੋਸਟ ਬਿਊਰੋ)- ਸਾਬਕਾ ਕੇਂਦਰੀ ਮੰਤਰੀ ਅਤੇ ਭਾਜਪਾ ਦੇ ਬਾਨੀ ਮੈਂਬਰ ਸੰਘਪ੍ਰਿਯ ਗੌਤਮ ਨੇ ਇੱਕ ਵਾਰ ਫਿਰ ਭਾਜਪਾ ਹਾਈ ਕਮਾਨ 'ਤੇ ਹਮਲਾ ਬੋਲਿਆ ਅਤੇ ਕਿਹਾ ਹੈ ਕਿ ਪਾਰਟੀ ਵਿੱਚ ਨਰਿੰਦਰ ਮੋਦੀ ਅਤੇ ਅਮਿਤ ਸ਼ਾਹ ਤੋਂ ਇਲਾਵਾ ਕਿਸੇ ਹੋਰ ਨੇਤਾ ਦੀ ਕੋਈ ਪੁੱਛ ਨਹੀਂ। ਉਨ੍ਹਾਂ ਦਾਅਵਾ ਕੀਤਾ ਕਿ ਭਾਜਪਾ ਵਿੱਚ ਅੱਜ ਉਨ੍ਹਾਂ ਤੋਂ ਇਲਾਵਾ ਕਿਸੇ ਵੀ ਹੋਰ ਨੇਤਾ ਅੰਦਰ ਸੱਚੀ ਅਤੇ ਸਹੀ ਗੱਲ ਕਹਿਣ ਦੀ ਹਿੰਮਤ ਨਹੀਂ।
ਇਸ ਸੰਬੰਧ ਵਿੱਚ ਸੰਘਪ੍ਰਿਯ ਗੌਤਮ ਨੇ ਕਿਹਾ ਕਿ ਅੱਜ ਦੀ ਤਰੀਕ ਵਿੱਚ ਭਾਜਪਾ ਵਿੱਚ ਨਰਿੰਦਰ ਮੋਦੀ ਤੇ ਅਮਿਤ ਸ਼ਾਹ ਤੋਂ ਇਲਾਵਾ ਕਿਸੇ ਮੰਤਰੀ, ਪਾਰਲੀਮੈਂਟ ਮੈਂਬਰ ਜਾਂ ਵਿਧਾਇਕ ਦੀ ਕੋਈ ਕੀਮਤ ਨਹੀਂ ਹੈ। ਭਾਜਪਾ ਦੇ ਇਸ ਸਾਬਕਾ ਸੀਨੀਅਰ ਆਗੂ ਨੇ ਕਿਹਾ ਕਿ ਉਨ੍ਹਾਂ ਪਾਰਟੀ ਅਤੇ ਸਰਕਾਰ ਅੰਦਰ ਬਦਲਾਅ ਦੀ ਗੱਲ ਕਹਿ ਕੇ ਨਵਾਂ ਮੁੱਦਾ ਦੇ ਦਿੱਤਾ ਹੈ। ਵੇਖਣਾ ਹੈ ਕਿ 10-11 ਜਨਵਰੀ ਦੀ ਪਾਰਟੀ ਕਾਰਜਕਾਰਨੀ ਦੀ ਬੈਠਕ ਵਿੱਚ ਇਸ ਦੀ ਚਰਚਾ ਹੁੰਦੀ ਹੈ ਜਾਂ ਨਹੀਂ। ਉਨ੍ਹਾਂ ਕਿਹਾ, ਮੇਰੇ ਇਸ ਸੁਝਾਅ 'ਤੇ ਭਾਜਪਾ ਆਗੂ ਕੁਝ ਵੀ ਕਹਿਣ, ਪਰ ਮੇਰੇ ਕੋਲ ਦੇਸ਼ ਭਰ ਦੇ ਪਾਰਟੀ ਆਗੂਆਂ ਤੇ ਕਾਰਕੁਨਾਂ ਦੇ ਫੋਨ ਆ ਰਹੇ ਹਨ ਤੇ ਉਹ ਸਾਰੇ ਮੇਰੇ ਸੁਝਾਅ ਦੀ ਪ੍ਰਸ਼ੰਸਾ ਕਰ ਰਹੇ ਹਨ। ਉਨ੍ਹਾਂ ਕਿਹਾ, ਮੈਨੂੰ ਬੁੱਢਾ ਸਮਝ ਕੇ ਚੱਲਿਆ ਕਾਰਤੂਸ ਕਹਿਣ ਵਾਲੇ ਪਾਰਟੀ ਦੇ ਜਵਾਨ ਆਗੂਆਂ ਦੇ ਮੁਕਾਬਲੇ ਸੰਘਪ੍ਰਿਯ ਗੌਤਮ ਅੱਜ ਵੀ ਸਰਗਰਮ ਹੈ। ਸਰੀਰ ਜ਼ਰੂਰ ਬੁੱਢਾ ਹੋ ਗਿਆ ਹੈ, ਪਰ ਦਿਮਾਗ ਨਹੀਂ। ਅਜਿਹਾ ਕਹਿਣ ਵਾਲੇ ਉਹ ਲੋਕ ਹਨ, ਜਿਨ੍ਹਾਂ ਦੇ ਆਪਣੇ ਇਲਾਕੇ ਵਿੱਚ ਦੋ ਵੋਟਾਂ ਵੀ ਨਹੀਂ। ਆਮ ਜਨਤਾ ਨਾਲ ਉਨ੍ਹਾਂ ਦਾ ਕੋਈ ਸੰਪਰਕ ਨਹੀਂ।